賀小月 (Closed)

呢間餐廳嘅前身（好似叫杏花X）曾經係我哋一家嘅指定上海菜食堂，皆因佢嘅酸辣湯好得。其實呢間賀小月開咗之後都嚟過一次，感覺都係一般；今次相隔N個月後再試之後，只覺己經徹底失去再幫襯嘅理由。

（事先聲明，小弟對酸辣湯有十分高嘅要求，而今次嘅評分亦主要取決於酸辣湯嘅質素，故對酸辣湯冇興趣嘅朋友可能有另一番體會）

晏晝一點幾入到嚟，除咗我哋就只有三四圍枱。坐低之後老闆一號如常揸fit，點嘅亦係啲typical嘅上海菜（醉豬手、酸辣湯、鍋貼、銀絲卷同高力豆沙）。

最先上嘅係：

醉豬手——唔太差，除咗個汁苦咗少少

然後就係萬眾期待嘅酸辣湯。然而第一口就覺得唔對路——太酸。我同老闆一號試過香港唔少上海舖嘅酸辣湯，所以第一口己經知道出事。不過更令人失望嘅係……正所謂有圖有真相，都係自己睇啦

酸辣湯——太酸不特止；嗰啲半固態生粉水結晶體間直係敗筆中嘅敗筆！

之後上嘅菜：

鍋貼——幾好

炸銀絲卷——幾好

高力豆沙——幾好，勝在夠熱

雖然最後三道菜都唔錯，但由於佢哋相對難度比較低（因好多餐廳都整到咁嘅水準），所以對整體分數冇大幫助。

服務方面算係唔錯，不過價錢就一啲都唔平，性價比頗低。