濠園茶餐廳 (Closed)

大好星期天，約左個識左幾十年的街坊食下午茶，佢提議來這裡，原因得一個，因為有電視可以睇馬。兩點幾到來，坐滿應都是馬迷，因為眼光都注視在電視上面。呢度下午茶有非常多的選擇，由A到Q，成十七款咁多。我們要了焗豆牛尾螺絲粉及豬扒包的A餐，及札肉檬粉的N餐。我的A餐有螺絲粉又有豬扒包，份量豐富。焗豆牛尾原來只是茄汁焗豆加幾顆牛尾粒，味道幾酸，不過茶餐廳出品，係咁架啦；豬扒包用上雪藏豬扒一塊，加烘脆的硬豬仔包，味道不會差，食左碗粉加埋個包，幾飽；朋友的檬粉就一般水準，但見隔離檯叫的K餐星州炒米都有睇頭之餘又夠鑊氣，佢猛咁呻笨。兩位伙記的服務是不敢恭維，單是短短五分鐘內已經見他們送錯幾次野，包括拿了杯齋啡比我說是鴛鴦走糖﹝有無搞錯！﹞；我的豬扒包又拿了去前面檯，是那個小妹妹醒目地拿回給我的；她叫的「泡菜什菜卷湯拉麵」竟然沒有什菜卷，她問：「咁而家米變左泡菜拉麵？」伙記答：「係。咁即係搵笨X囉！」今時今日咁既服務態度，勁！埋單40蚊，又真係幾抵食的。又有段時間會全場靜晒，就係馬匹出閘之後嘞。