石籬粉仔

Open Now

Now Closed

久仰石籬粉仔呢個大名， 由一知道佢開咗已經諗住嚟，望番原來已經開咗兩年，我今日先第一次嚟食咋。餐廳裝潢復古得嚟夠新淨。嗌咗個細粉仔，另外再加咗個呢度嘅名物豬油渣同埋牛肉球，粉仔味道不過不失，有少少嫲嫲嘅味道，原來原本已經浸住三四舊豬油渣㗎喇，早知唔使特登另外再加多一份啦，除咗因為我覺得本身已經浸淋咗嘅豬油渣更加好食之外，另外加多一包實在太多喇，雖然未浸過嘅會唔同食法，會勁脆同埋豬油味勁好多，但係始終一個人啪哂多少都有啲吃力。食到中段試吓啲辣菜脯，以辣菜脯嚟講完全唔係路， 只係有少少嘅辣味，而鹹酸味完全欠奉， 隔離淺色嗰隻菜脯就無再試喇。個牛肉球就唔知係咪因為剁得太過細碎，搞到個口感好似出面落咗好多粉嘅粉團肉丸咁樣，完全無咬口，不過我估老招牌應該唔會做埋啲咁嘅嘢掛。不過睇番張單原來牛肉球只係12蚊，都有咁樣嘅可能性。