餐廳位卡尖沙咀K11附近，不算難找，食完仲可以去K11行街街~
因為冇得飛日本非常痛苦，行完DONKI後就決定食番餐日本菜一解思鄉之苦。
平成不只店名有日本風，連內部裝潢都非常有日本居酒屋風!
肚子很餓，於是叫咗燒五花腩三重芝士蛋餅、泡菜牛肉燒餅、紫薯沙律、三文魚籽紫菜胡麻冷麵、巨峰提子乳酸梳打同荔枝乳酸梳打。
紫薯沙律，唔好睇佢細細地一碟，因為佢係用真材實料嘅紫薯mix埋少少沙律醬黎整，所以纖維十足，非常地飽!! 紫薯味濃，食落又幾滑口，幾新鮮既食法。
三文魚籽紫菜胡麻冷麵~冷麵彈牙煙韌，芝麻味濃，三文魚籽份量都唔少，食落唔會滯，非常之清爽，好適合夏天食~
我最鍾意都係呢個燒五花腩三重芝士蛋餅!雖然係落咗五花腩但係唔會過於肥膩，三重芝士芝士味濃郁，芝士蛋餅係成個小鍋仔咁上，非常之熱辣辣~呢個好適合兩三個人開心share，因為一個人食真係會唔哂!
泡菜牛肉燒餅燒得幾香脆，估唔到泡菜可以整燒餅，呢個組合幾新鮮~泡菜量十足~
兩杯梳打嘅味道都唔錯，幾開胃又唔會太甜~真係有巨峰提子嘅味道~
如果你係好想體會日式居酒屋風格嘅朋友可以嚟呢度試下~靜靜地坐喺度傾計都幾開心~冇得去旅行既我都仲有呢度一解相思之苦~
