The Butchers Club (K11購物藝術館) (Closed)

假日下晝嚮尖沙咀突然想食Burger，就諗起呢間路過見到嘅Burger店。三點幾到，裡面只有零星幾枱客人。我係一個鍾意傳統嘅人，所以一坐低就叫咗個The Burger，簡簡單單芝士煙肉牛肉patty，全無花巧。個漢堡稍為細個，亦都唔算太油膩。包身係一絕，外脆內軟，微微焦黑。漢堡之靈魂 － 牛肉patty，做得唔錯，牛味重，雖然肉汁唔多，但係冇煮到太老，口感好好。牛肉之上配上兩色芝士加楓糖煙肉再加上蜜糖bbq汁，一啖咬落去，好正！塊煙肉煎得夠實，同牛肉patty嘅肉質配搭，可以話係口感上嘅絕配。呢個漢堡，係香港而言，可以話係一流水準。至於個Duck Fat Fries，亦甚有特色。佢有一種普通炸薯塊冇嘅厚實油感，幾香。啲薯塊唔係太脆，只係外面有層軟脆嘅皮，而皮同內裡嘅薯仔會有少少分開，口感算係特別。價格雖然有啲貴，但係呢種質素，絕對值回票價。