一線之緣 (Closed)

當全港嘅密室都玩晒，可以去邊到玩？呢個大細路M佬近排又迷上玩Board Game，以前就去樓上Cafe玩，依家旺角有齋玩Game哪舖頭，30蚊兩個鐘。玩完就係要食飯啦！我哋又想食泡飯，又想食米線，搵呀搵呀，畀我哋行到去太子，搵到呢間一線之緣，滿足晒我哋願望。麻辣豬耳入口即刻有麻痺感，麻辣味超級醒胃，豬耳好爽口，正！小窩濃湯米線食麵之前梗係要試下嗰湯先，熱辣辣，好香濃，米線吸晒啲味。秘製爽脆墨魚丸入口彈牙，仲有好多墨魚肉，配埋本身嘅芽菜同肉燥，正呀！巨無霸桶蠔泡飯一嚟到就聞到好香嘅蠔香味啦，嘩，大家睇下隻蠔幾大隻，一碗有4隻，真係非常足料。湯底香濃，加埋炸蒜、芫荽同芹菜，真係好香口。雖然咁大碗，我哋兩個都食晒，一滴湯都唔放過。龍鳳七喜咸檸檬加鮮檸檬，清新解渴，為呢一餐劃上完美嘅句號。