全記點心專門店 (Closed)

昨晚睇英超 (沙拿又發神威)，所以瞓晏咗，起身又想去飲茶食點心，但又怕要等位等餐死，卒之去咗兆和街的點心專門店醫肚。閒日嚟會抵食好多，午市套餐只係44蚊，星期日就無呢支歌唱。店內裝修無咩特別，至特別都係吊咗啲蒸籠喺頭頂咁啦，啲位都闊落 (相對於添好運)。三蚊一個茶位，都算經濟，我哋揀咗鐵觀音，一杯一個陸羽茶包。點心點咗4款，計落就係每人一杯兩件喇。先來叉燒腸。皮就厚咗啲，勝在叉燒都多，廿三蚊一碟，酒樓食唔到啦。馬拉糕好有蛋香，而且好鬆軟，幾好食。鮮竹卷係眾點心之中我至愛，腐竹包住豬肉，呢個配搭係好妙。呢度的鮮竹卷味道都OK。最後食菜苗餃，粉皮夠煙韌，蝦肉亦新鮮。本來想再加多碟牛肉球和鴛鴦燒賣，不過見外面排晒隊，店員又好似好想我哋走，卒之放棄呢個念頭，埋單走人。