火山燒 (Closed)

我同老公俾門面及餐牌氹左入去。。。叫左一份美國頂級牛板腱火山燒，加$29 跟餐，揀左麵豉湯，雞串，飲品。另外再叫左燒千層安格斯肋腰背忌廉滑蛋珍珠米丼。碗麵豉湯得一粒豆腐仔，好咸，份量少，兩啖飲哂。。。雞串係我食過最難食既，啲肉又硬又鞋。。。飲品揀左特濃朱古力，第一眼望落去外表包裝得好靚，啲cream好味既，我地即刻食哂，無撈落杯朱古力入面。但朱古力部分係奶茶色，完全飲唔出係特濃，味道同普通茶餐廳用粉沖既朱古力相差無幾。（一開始好靚個時無影相。。。）牛板腱啲肉正常，不至於好好味。至於安格斯肋腰背真係唔得，雖然好淋，但專登咬多幾下都無牛味，忍唔住問老公覺唔覺得食極都唔知自己食梗咩肉類？老公都同意，食牛板腱好過。。。最後到碗飯，又乾又硬，真係食唔落。。。賣單約$350，食啲咁既野。。。餐廳外觀幾靚，餐牌都吸引，但難食，食完過一陣仲要勁口乾，不停飲水。。。以後都唔會再去！