見到有間新開嘅餐廳就走咗入去試下。
餐廳格局幾企理，行簡約風，都坐得幾舒服。
店員服務質素幾好，一坐低佢哋就會介紹餐廳有咩特色食物推介。
今次我哋就試咗雞煲羊腩煲同埋串燒拼盤
羊腩煲比起出面食開嘅會比較少汁，但係好處就係味道會比較濃郁，而羊肉都燜得好淋。
雞煲亦都唔係平時食開嘅雞煲，佢個煮法會比較類似炒嘅形式，似小菜多啲。個人會比較鍾意食平時食開嘅煮法多啲，但係大家都不妨可以試吓佢嘅煮法。
而最後串燒拼盤係我最推薦嘅食物，會係我再返嚟食嘅原因。佢嘅串燒全部都好入味，肉汁飽滿。比起出面食開嘅串燒更加足料，唔係細細舊肉燒得好乾嗰啲，可以睇得出廚師係串燒上面花咗唔少功夫。
最後實在太好食，我哋再encore左豬頸肉同埋雞肉。啲飲品就試咗佢哋自家製嘅檸檬薏米水，因為食嘢都比較肥膩，咁樣配搭就會比較清淡啲。
整體而言呢間都係一間幾比到驚喜我嘅餐廳，以後喺旺角食嘢都可以多一個新嘅選擇。
