匯發茶餐廳

晚餐時段，兩人各自叫了一客三餸飯，要自行前往serve食物的counter揀餸，餐牌列出的餸，不一定會有（佢話天天新款），總之counter有咩餸，都可以揀，眼見都有十多款：

餐牌 ～ 睇落好似好抵！

我選了蒸水蛋，豬肉餅及薯仔雞翼：
水蛋係阿姐推介，剛剛蒸起，夠熱，連少量免治豬肉，
質感較挺身，唔會一夾就散，這已是三樣餸之中最好的一款了；
肉餅好硬身，薯仔又太腍，雞翼油淰淰，最弊仲要唔夠熱，
連微暖嘅感覺都無，肯定係煮完之後，攤咗好耐，冇再加溫！

另外三餸 ～ 蕃茄炒蛋，白蘿蔔及蓮藕炆豬肉：
又係唔夠熱！蕃茄炒蛋算係比較好，起碼食得出蕃茄夠新鮮，
白蘿蔔腍到似冬瓜，蓮藕味道OK，豬肉韌到不得了，咬到口攰！

幸好飯還夠熱，撈埋啲餸嚟食，口感暖返啲，仲可以要求多飯！

例湯係粟米豬骨湯，味道清甜，夠大碗，唔使再另叫飲品！