我比較out，其實我一直未食過「燒肉LIKE」㗎！
上星期朋友帶我去時，見到一人一爐嘅設計已經覺得好得意，而且menu內有好多套餐選擇，想加配單品又得，好彈性！
點咗「牛五花套餐」200g，「牛小排&牛五花套餐」100g，再加點豬五花腩、溫泉蛋、海鹽窩夫雪糕、棉花糖朱古力餅。
1
肉類嘅顏色睇落幾新鮮，因為切得好薄身，所以燒起嚟又香又脆。我鍾意牛小排，油花分佈得好靚，入口有濃濃牛肉香，肉質幾腍，忍唔住食完一塊又一塊。
加點嘅豬五花腩無牛肉咁香，不過一樣咁腍，燒完都好惹味。
估唔到「海鹽窩夫雪糕」係要燒嘅，店員幫我哋換一個網，教我哋直接將成個窩夫放網上燒20秒，說是窩夫，比較像餅。
燒完後，就變成咗「流心窩夫」，外熱內冷，海鹽雪糕入口微甜，然後會滲少少咸味出嚟，口感幾有趣。
棉花糖朱古力餅就係普通食法，即係燒軟棉花糖用朱古力夾住，亦係外脆內軟，小朋友至愛。
