星滙演 (Under Renovation)

要分享呢間餐廳，先嚟暴露年紀系列先，話說阿叔老豆、媽子後生時都好鍾意聽流行曲，除咗哥哥、梅姐演唱會外，佢哋都曾經帶兒時嘅我到過酒廊聽歌，印象中嘅酒廊有少少似今次阿叔嚟嘅呢間餐廳，當然當時嘅酒廊面積細好多，Live band、歌手就喺正你面前，如果想點歌，可問職員拎紙仔寫低，當佢哋唱出你點嘅歌時，都有莫名其妙嘅興奮架！ 言歸正傳，呢間餐廳面積超大，除咗有Live band 設備外，仲有一個無敵海景伴著大家一齊食飯，撞啱今次下晝嚟到有藍天白雲、太陽曬入餐廳嘅天氣，簡直食都食得開心啲！佢哋午市有7款套餐可揀，價錢由$148起，包餐湯或沙律、前菜、主菜、甜品同飲品，啱晒附近嘅上班一族想上嚟望吓海，嘆番個高質午餐。 龍蝦扁意粉 ($258)廚師巧妙地拼砌出原隻龍蝦，賣相唔單止吸睛，而且份量夠晒足料。龍蝦肉肉質扎實有彈性，味道鮮甜，配埋意粉一齊食，食緊都唔會膩！美國頂級西冷配川式炒雜菜 $238煮到5成熟、中間粉紅色嘅西冷牛扒，肉味濃郁，肉汁又夠多，即使唔加醬汁都已經好入味，值得一食。