【雞煲放題 填滿個胃】
有冇人同我哋一樣成日都會邊爐&燒肉癮起😂 我哋上個禮拜又好想打邊爐，見到好多foodie食呢間嘅雞煲烤魚放題，價錢唔貴之餘仲免加一，就去試吓佢🥸
嗰日店員好細心，見到我哋隻碟有骨就幫我哋倒啲骨落隻空咗嘅大碟到一次過收走，仲間唔時收走啲嘢飲盒，都幾好服務🤓
～我是Menu～
雞煲/烤魚/肉骨茶煲/胡椒豬肚雞煲放題 (2位起) 免加一
18:00前離座 90分鐘 $88
18:00後120分鐘 $128
呢度嘅放題一嗌就要一枱，而佢哋係可以兩人一煲🥘 變相係可以試曬唔同款嘅嘢食。至於我哋揀咗胡椒豬肚雞煲🍲 滾咗之後先飲一啖湯睇吓佢質素如何，佢個湯底好清香，亦好有胡椒味。而本身個煲嘅份量都唔少，夠曬兩個人Share嚟食，啲雞好嫩滑🐔 而豬肚亦都好乾淨爽口🐷 食落都幾唔錯。
而呢度嘅自助吧雖然選擇唔多，不過淥落都幾好食～ 但係啲豬就太肥，所以我哋淨係試咗少少，之後就冇再拎過🐒 佢嘅自助吧有唔同嘅紙包飲品同罐裝汽水、啤酒任飲，另外亦都有雞、豬、牛肉、腸仔、丸、蔬菜、寬粉、年糕等，而令我哋出乎意料嘅係，佢嘅牛丸係出色至極🤩 既彈牙又爆汁，令人食完一粒又一粒。而喺我哋食完先發現，佢哋係直頭有得單買牛丸😲
//涼拌土豆絲//
除咗放題之外，我哋都嗌咗碟薯仔絲嚟食吓🥔 首先要一讚嘅係，佢啲薯仔真係好脆口，亦都好入味，辣得嚟又好有薯香。而最緊要嘅係，佢嘅薯絲好大份，差啲就食唔曬😋
//炸三鮮水餃//
佢哋嘅炸餃子整得好正🥟 炸得好靚好脆之餘，啲餃子仲好多汁，入面啲餡料調味亦啱啱好🦦 除咗餃子之外，碟邊仲有啲泰式辣醬，點埋又有另一層次嘅享受🥰
～評分～ (5分滿分）
環境：🦦🦦🦦🦦
食物：🍯🍯🍯🍯
服務：🐻🐻🐻🐻
總分：💛💛💛💛
地址：
渝痴漁醉 (銅鑼灣)
銅鑼灣記利佐治街1號金百利廣場8樓R1號舖
