其實近年來我都好少去樓上Cafe，可能係已經過咗果個年齡層啦lol
不過次次拍拖都係行街睇戲食飯其實都好快會悶，所以今次極力推薦男朋友過嚟！
開頭佢都唔係好想彩我，話薯仔屋個名好似唔多吸引，當然我就唔會理佢啦，霸王硬上弓夾佢過來XD
一上到去由於暫時未有座位，服務員就介紹我哋可以打住機先。
PS 服務員勁nice，有可能係老闆都未定。
呢個雙打Joystick連接住電視，有六百幾款懷舊街機，童年回憶頓時返晒來，仲有我細個最鍾意玩嘅炸彈人添！
跟住呢幾張相大家望吓周圍嘅環境先，地方唔算大，但周圍佈置都係充滿心思。
門口貼有好多相片，大概都係以前D明星藝人到訪嘅時候拍攝嘅。
仲有幾個好大嘅Figure櫃，好多都係懷舊嘅玩具，例如聖鬥士星矢、超人等等，相信都會給人一眾男士嘅目光。
仲有大量嘅漫畫、Board Game等等。可以話係麻雀雖小五臟俱全！
好啦，打完機參觀完地方，就梗係要來到今晚嘅重頭戲，叫嘢食啦！
厚厚的menu超多選擇，好彩比我發現有個二人至尊份量套餐，如果唔係真係有排揀。
2人至尊份量套餐 (配特飲每人1杯) $188/per head
呢個套餐分三個價錢，最平嘅就係我叫呢個係可以每人揀一杯特飲。中間價格嘅就係可以有無限餐飲，而最貴嘅就係可以每人都叫無限特飲。其實無限特飲都只係$228一位，不過預計今晚其實都唔會留太耐，所以我哋揀一杯特飲嘅都OK。睇吓個套餐有啲咩嘢食先：
芝士蒜蓉包
吞拿魚長通粉沙律
新鮮係有前菜：蒜蓉包以及沙律。其實開頭對呢度既野食冇太大期望，因為這裏主力係做玩嘅，估計食物未必特別出色，但以下落嚟介紹嘅每一樣食物都令我好有驚喜！
蒜蓉包烤得外脆內軟，雖然上面嘅芝士唔多，但味道配合得非常恰當，蒜蓉味道在口裏徘徊，可惜每人得壹件，如果有多一件俾我食就好了。
長通粉沙律，非常好味，沙律醬超足夠，每一啖都可以沾滿沙律醬，但又唔會多到好似浸湯咁。
長通粉彈牙、吞拿魚唔腥，仲有粟米粒。淨係兩度前菜已經叫我對之後既食物更加期待。
西班牙茄汁磨菇煙肉意粉
茄汁意粉，好大碟好有睇頭，夠晒兩個人食。入面有煙肉粒火腿粒紅椒青椒等等。味道酸酸甜甜好開胃，讓人禁不住一啖接一啖咁樣食落口。
薯仔屋蜜汁雞翼
來到小食雞翼了，雞皮微脆好香口，黏黏的因為外皮沾滿蜜糖，所以睇相都見到係立立令嘅。
食雞翼最怕雞肉會乾爭爭，將佢嘅雞肉仲係好Juicy，食嘅時候要小心有汁滴落啊！
醬燒豬仔全骨配肉醬薯仔屋鋪天薯條
主角主角主角！點餐時服務員都有介紹呢個豬肋骨係得獎菜式，一直以來我都好喜歡食豬肋骨，雖然切嘅時候係有少少麻煩，但既然男朋友係度就梗係由佢代勞啦lol
再配埋肉醬薯條，呢個配搭簡直係無得輸。
豬肋骨外面睇落雖然燒到好乾身，但裏面啲肉一啲都唔乾，非常嫩滑。味道亦恰到好處，不會太過濃也不會太過淡，有時如果食出面嘅豬肋骨，太濃味嘅話，開頭一兩舊都仲係好食，但係食到後面就會太濟唔想再食落去。
呢度嘅豬肋骨完全冇呢個問題，好快已經俾我哋兩個KO晒。
飲品選擇非常多，足足佔十幾頁嘅Menu，所以揀無限特飲既朋友其實都幾着數架，可以試到好多唔同嘅款式。
榛子可可
味道都可以，飲到有榛子味道，唔會淡茂茂又唔會甜到好似飲糖水落肚咁。
粉嫩小桃
呢杯特飲係士多啤梨加蜜桃加蜜糖，可能因為有蜜糖既關係，稍甜了一點點。
但味道非常清新，即刻覺得自己健康左。
是日甜品 - 泡芙
見到個甜品再一次令我睇薯仔屋加分，就連一個普通嘅泡芙，都好用心去裝飾，係靚嘅。
而且裏面係堅有料，唔係空心，而係滿滿嘅雪糕，超滿足。
食飽飽之後就玩下呢度嘅Board Game，其實簡簡單單既遊戲，已經可以玩得好開心，我仲笑到肚痛添！
所以，有時放低你嘅智能手機，好好同身邊嘅人用最直接嘅方法去交流啦，唔好再成日攬實部電話＝）
又多嘢玩又多野食，我一直會再帶朋友過來。
