去前諗住book定位，點知佢地做緊外賣自取8折，咁抵就梗係轉軑，外賣返歸慢慢安心嘆啦，落單時店員會mark清楚自取日期時間及早準備，等我到店比埋錢就可以提取兩袋以保溫袋打包好嘅美食，超方便貼心!
我就精選左以下幾項，包括 雞脾（半份) (唔辣)、 瑤柱群翅雞湯、 花甲王、 帶子皇、 鬼馬墨魚、 健康什菜籃。返到屋企即刻開餐，一打開雞煲個盒香味撲鼻，引唔住放入煲前就偷食，雞脾肉夠晒滑，配菜如豬皮洋蔥勁惹味，之後加入真材實料嘅瑤柱群翅雞湯湯底繼續烚烚烚，花甲王同帶子皇都睇得出勁新鮮，放入口夠晒爽甜，冰鮮真係冇得比!再試埋將蟹籽墨魚滑釀左係油炸鬼上面嘅鬼馬墨魚，口感好特別，名符其實好盞鬼，難怪店家會列為必試系列啦! 什菜籃份量足，樣樣都有啲，加埋自家嘅烏冬、豚肉同一口牛，我地食到飽一飽!留係屋企食雞煲火鍋真心嘆，店家提供埋獨立餐具同消毒搓手液，開餐前消毒乾淨就唔怕變成打邊爐家族2.0啦!!
