檸濛濛手打檸檬茶 (Closed)

【灣仔區】【檸濛濛手打檸檬茶】最近好流行手打檸檬茶，好興講「暴打渣男」，不過同歇後語「香港人攪革命」一樣，都係「得個講字」，喺現實世界中，渣男都係最得到愛錫嘅一群，我呢種毒男已經被逼到社會邊緣嘅最盡頭。一個個切實執行嘅論述，都不及一句虛無縹緲嘅假大空承諾。去銅鑼灣嗰頭做嘢，喺天后巴士總站見到呢間嘢，適逢我有啲口乾，就用佢啦！見佢都 keep 住有人幫襯，應該唔差，就叫經典檸檬茶系列裏面嘅其中一款嚟飲吓。我飲 $32 嘅「招牌手打檸檬茶」，要少冰少糖，估唔到檸檬味幾香，唔會話好香精味，有驚喜。咁我去得嗰頭做嘢，就梗係買埋畀嗰邊啲同事，得感應姐一個話想飲，都照買畀佢啦。佢話想飲靈感鮮果檸檬茶系列裏面 $44 嘅「金菠蘿檸檬茶」，都係要少冰少糖。佢飲落就話好好飲，仲話我好識揀，有冇咁誇張，不過我都相信佢哋嘅出品係幾好嘅。。。（地址：天后英皇道1號地下4號舖）