小魚兒 (寶漢大廈) (Closed)

【灣仔區】【小魚兒】好耐冇同真正哥食飯，佢之前嗰日凌晨四點仲打嚟搵我解決問題。我就唔識幫人解決問題嘅，有咩叫佢自行了斷啦。之但係佢搵得我亦都代表住佢對我嘅信任，今日我想試呢間銅鑼灣嘅川菜食肆，就搵埋佢啦。餐廳喺銅鑼灣地鐵站附近，出口行過去好近。佢係一間氣氛相當之好嘅餐廳，黑色為主調嘅裝修但係一啲都唔覺得陰暗。既然餐廳名叫做「小魚兒」，當然要試下佢哋有關「魚」嘅出品啦。首先就睇中咗佢哋嘅「碳火風味烤魚」，都有四款魚可以選擇，而烤魚口味更加有十款味道揀，變化都好多。我哋試咗 $308 嘅「海鱸魚」，口味就揀咗「黃金蒜香豆花」，懦夫如我就揀呢個「不辣」嘅口味，唔關真正哥事。不過食落都好好食，就算冇出動到餐廳最擅長嘅「麻辣」嘢都好，我都想像到佢哋麻辣嘅出品應該都唔會差，真正哥都話估唔到個蒜香咁正。之後試 $88 嘅「金銀蒜燒黃花魚春」，係我勁中意嘅魚子加上金銀蒜燒出嚟，我覺得超級好食。而飲品方面我哋揀咗 $28 嘅「飲品放題」，選擇都非常多，熱嘅又有凍嘅又有，仲有兩款自家製作茶飲，幾好。連埋加一嘅價錢係 $497，以呢個質素嚟講唔貴。。。（地址：銅鑼灣波斯富街24-30號寶漢大廈1樓）#1am