椰粉湯紅 (Closed)

筆者定期都會推介返啲靚湯，比大家滋補養生一下！今次係我第一次食佛跳牆，仲要用原個椰皇去燉，有種中西fusion感覺，補到不得了，而湯料比想像中更多，唔洗加其他食物已經夠飽，誠意推介，一定會覺得物有所值！。碗啲湯料係我食到一半先影，但都仲有咁多，證明真係多到成個椰皇都係，燉出嚟每一滴都係精華～我食到嘅包括咗鮑魚，雞肉，排骨，竹笙，栗子，干貝，金華火腿，冬菇，白菜，魚翅（唔知係咩質素的翅，但事實係有小小係入面）等等等等，食完成個人都充滿精神，完美呀～呢個只賣$98，一個夠飽，比起你而家食茶記晚市都要$80埋單，食呢個實在CP值完勝！佢哋全部燉湯都係用椰皇去整，無添加，但最好早一日預訂，因為新鮮嘅料同椰子佢哋每日都只會預返適當份量，walk-in有機會食唔到～。另外簡單食咗2個家庭小菜feel套餐，每個只需$48～首先係柚子雞配彩虹飯，原本以為似韓式炸雞，但佢一嚟調味唔會調得好重手，二嚟個炸法唔油膩，所以好健康而又好食；之後仲有個紅酒炆牛腩配米粉，都係水準之上而個米粉係配椰子雞湯幾特別！