地方唔算方便，好彩起左隧道，唔駛出去淋雨係幾好，可以直到新太陽廣場。
初初打去book位個陣，接聽電話嘅真係麻麻，遇上服務麻麻嘅人都幾扣分。黎到店，店員無呢種感覺俾我，都幾好服務嘅。
呢間都係和民集團其中一間，似乎係高級一啲。價錢又唔會話好貴，合理範圍內。我地5個人俾咗個隱蔽8人枱，好啱我地勁笑都無問題。
明太子芝士厚燒（$38），無想像中多明太子同芝士，蛋係燒得唔錯，如果你係明太子迷係會失望。
清酒煮蜆（$68），人越大越鍾意食蜆，佢個湯好鮮甜，蜆都算多，無乜沙。
牛油焗帆立貝（$78），都焗得幾入味，唔過太老或者啲計乾哂。
鹿兒島和牛壽喜燒鍋（$158），和牛係入口即融，記得一熟就食，唔係好易老咗唔好食。
呢個蜜糖芥末原隻雞腿（$88），本身有芥末味道提昇，炸都恰到好處，唔會太油，可以加小小七味都配。
軟殻蟹牛油果壽司卷（全份，$98），唔錯，一口咬落剛剛好，又夠full。
海鮮炒烏冬（$68），估唔到咁大份，多海鮮，炒得好好，我地幾個都有一碗有多。
雞翼還好，我地分別叫有明太子同普通，普通有隻血仍有，其他還好，好味。
話說我地黎嘅路上剛巧有派coupon，我地都拎左，每人可以有一杯38或以下嘅飲品一杯。我揀左呢個青柑桔柚子蜜梳打，自己好想飲梳打類，清下口都幾好，唔算甜。
