雅悅點心燉湯專門店 (Closed)

難得我地幾個可以一齊食飯，早小小book呢間食點心。係正金馬倫道，好易搵。店鋪以為細細間，都幾多位，我地多人，就安排我地坐入面一個角落，啱哂我地一班女仔可以傾下計。首先一人一湯，價錢唔算貴，天氣咁凍，唔過份。我呢個係黨參杞子燉瘦肉，湯飲得出夠耐，瘦肉好夠味，真係入口即溶，暖胃大愛。叫咗超多點心，牛肉球正常，唔會太韌；小籠包皮薄餡靚，多湯；馬拉糕夠鬆，味道ok；腸粉嘅粉稍為韌咗啲，料唔夠紮實；春卷超脆，餡份量剛好，大致點心都比一般好。呢個龍躉腩飯唔係講笑，我地都可以一人有碗，魚蒸得恰當，唔會過老。蟲草花鮮雞，雞滑，呢度嘅蒸飯真係幾好。甜品時間，一人一個甜品再紅豆沙share。一直食到呢度，我地都係有讚無彈。等左成半個鐘，一個甜品都無出過。中間催過，個職員入左廚房好耐無出嚟解釋咩階段。最後三催四請先出甜品，個職員仲係度開玩笑（其實中間一直搭嗲，我地都麻麻），其他職員服務態度都麻麻，呢點要寫番。雙皮奶好好食，好滑，再加啲紅豆沙，又另一番滋味。百幾元一位，又傾左好耐計，都ok啦。