朋友介紹我去【姓膠煮麵】試下，個名就好出la，去到係一間小店嚟，舖頭牆上貼滿媒體報道，原來舖頭係一對90後夫婦開，主打無味精，以蕃茄湯+ 芫荽湯為店舖招牌湯底，除咗麵亦都有飯、小食、甜品選擇
姓膠煮麵🍜
個名係噱頭嚟，實情都係車仔麵，揀麵、揀湯底、揀餸，我揀咗酸辣湯底配紅薯寛粉，餸就揀咗豆卜、廚師腸、生菜同蜆肉，第一次食車仔麵有蜆肉揀，份量都算多。雖然酸辣湯唔夠辣，但用麵豉湯做湯底有種食緊日式拉麵嘅感覺，湯底好味之餘食得出真係無味精，食完無口渴，下次想試埋蕃茄湯底！
皇牌台式肉燥豬頸肉飯🐽
大大碗肉燥飯+超爽脆邊豬頸肉，口感同味覺都一流，$52碗飯絕對性價比高！順帶一提依到用嘅豬頸肉係好爽口無肥肉㗎！
椒鹽豆腐◻️
即叫即炸上枱熱辣辣～巨量炸蒜堆到成炸蒜山，一口椒鹽豆腐夾雜超香炸蒜+少少辣味，邪惡又好味！我發掘一個隱藏食法，食完椒鹽豆腐剩低好多炸蒜唔好浪費，放入麵湯底食更加惹味！
泰辣雞軟骨🐤
極度推介一定要試！泰式醬汁做得好出色，青檸味比平日泰式汁多，入口超fresh～酸酸辣辣加上脆口雞軟骨非常開胃！
桃膠雪耳紅棗糖水🔴
一款滋潤養顏糖水，入口立即潤喉，凍食有透心涼感覺，材料亦非常多，每啖都食到桃膠
📍地址：屯門屯利街1號華都商場1樓59-60號舖
