🍊 北海道小青龍蝦
餐廳嘅海鮮即叫即劏，龍蝦斬件後上枱仲會郁，食材非常新鮮，生嘅時候龍蝦肉晶瑩剔透，煮熟之後肉質結實彈牙，龍蝦膏豐盈甘香，整體味道鮮甜
🍊 清酒昆布鰹魚湯鍋
充滿日式風味嘅火鍋湯底，昆布鰹魚湯嘅味道非常清甜，加上日本清酒嘅甘甜，好適合用嚟煮海鮮，煮熟北海道龍蝦之後嘅湯底充滿鮮味，另外仲有木魚絲同額外嘅清酒，火鍋中途覺得唔夠味可以再加
🍊 頂級美國牛板腱
一份牛板腱嘅份量都好多，牛肉嘅油脂部份好少，食落去肉質結實而且牛味濃郁
🍊 企鵝丸
企鵝丸嘅造型非常可愛，企鵝嘅前面係白色墨魚丸，後面係黑色墨魚丸，企鵝造型做得好細緻，食落去墨魚嘅味道亦都好濃郁，而且口感彈牙
🍊 手打蝦滑
手打蝦滑絕對係必嗌嘅食物之一，入面有九成係蝦肉，近睇會見到一隻隻嘅蝦，食落去整體口感非常軟滑，而蝦滑入面嘅蝦隻肉質就好彈牙，食得出係新鮮手打嘅蝦滑，而唔係坊間預先製成一整件都爽口彈牙嘅蝦滑
🍊 沙白
沙白嘅味道鮮甜，咬落去無沙石，同昆布湯嘅味道好夾
🍊 萵筍
萵筍切成條狀，滾熟之後仍然爽口，味道清甜，而且吸收咗湯底嘅精華
🍊 飲品
我哋嗌咗大紅袍奶茶同茉莉綠茶，大紅袍奶茶嘅紅茶底特別香濃，紅茶嘅比例較鮮奶重，加入鮮奶之後口感好順滑；茉莉綠茶味道清新，淡淡地適合配打邊爐
🍊 甜品
餐廳贈送咗菠蘿乳酸沙冰同紅豆豆奶布甸，沙冰嘅味道帶有菠蘿嘅酸同乳酸飲料嘅甜，可以中和打邊爐嘅油膩感；豆奶布甸嘅豆味香濃，加入少量紅豆，整體味道清淡又唔會好甜；自助區有時令水果，今日嘅西瓜同哈密瓜都好清甜
📍九龍城啟德協調道2號AIRSIDE 6樓L603號舖
位置就腳：🍊🍊🍊🍊🍊
餐廳環境：🍊🍊🍊🍊🍊
食物味道：🍊🍊🍊🍊🍊
整體CP值：🍊🍊🍊🍊🍊
