滋潤燉湯二人套餐好似幾抵食，$168有兩個餸、兩盅燉湯、白飯同飲品。
見茶記有酸菜魚，咁少有就即管試下佢，估唔到有驚喜喎！今餐飲左好多水落肚，又有燉湯，又有酸菜魚湯，仲有紅豆冰，要去定洗手間先可以搭車返屋企🤪。
🌖迷你老壇酸菜魚
全碟魚都係無骨架！真係細路仔都啱食～～
最欣賞佢個湯底，少少酸少少辣少少麻得黎又唔會太嗆喉，飲落真係好舒服，我自己都飲左兩大碗。未上枱已經聞有少少鹹酸菜果種up 味，同榴蓮一樣，如果你接受到呢種特別嘅氣味，你就一定會唔會抗拒呢道菜，反而會成日心思思想encore 😛。
🌖九層塔薑蔥粉絲海蝦 （九月季節小菜）
海蝦🦐色澤紅潤，全部都好新鮮，一個霉嘅都無！食落仲幾入味，反而粉絲味道偏淡又太乾身，濕潤返少少，多返啲色水同味道會更好～
🌗黑松露沙拉一字骨 $88
心血來潮想食沙拉骨所以就叫左。黑松露醬都俾得幾重手；沙律醬味道偏酸；一字骨多肉有咬口又唔會乾。
🌖樽仔奶茶 跟餐+$15
而家夏天咁鬼熱，飲杯凍飲真係人生一大樂事，樽仔奶茶係雪櫃拎出黎夠曬凍，無冰唔會沖淡茶味奶味，$15真係唔慳得！
🌖茶走紅豆冰 跟餐+$15
茶味唔會太濃太苦，一開始飲覺得煉奶太少唔夠甜，不過加埋紅豆一齊食係啱啱好！唯一爭少少嘅係唔夠凍。
