其實只係入左佢呢間神秘房間，就會搖身一變主打江戶前Omakase。
其實做人好簡單，唔洗諗得咁複雜，食物只要對得住價錢，
間中食餐好少少，唔通我又會驚比連登仔批鬥咩？👇
1
📌お任せコース25品 - $1680/1人前
▪️ 先 付 -
▫️ 前菜第一道先食個「沖繩水雲」先，同樣以日式髮菜再配搭酸汁
同埋紫蘇花，賣相吸晴之餘，為之後既食材開一開胃先。
「北海道白栗米」色澤望落青靚白淨，粟米粒粒均勻，入口完全無渣，
質感清爽，帶少少甜香，幾特別。「汁煮鮟鱇魚肝」唯最後一個
次序享用，入口果陣非常幼滑，夠哂creamy，即使唔太鍾意
食內臟既朋友，完全無腥味，值得一試。
▪️ 刺し身 -
▫️ 開始進入「刺身六品」環節，先黎個「岩手縣廣田灣真蠔」，曾經榮獲日本第二屆鑑賞冠軍，
亦姐係壽司界既最上鏡小姐，原隻上望落真係相當新鮮肥美，食落一樣唔差，
口感夠creamy，味道鮮甜，唔錯。
「北海道鮫蝶」亦姐係右口魚，師傅將佢分左一魚兩味，左邊係包住芽蔥
同埋右口魚裙邊；而另一邊係包住小川赤海膽，兩者面頭灑上岩鹽同埋青檸汁，
整體口感軟綿，油脂豐腴，加埋海膽將個味道提鮮得更高點！
「北海道海膽豆腐」海膽入口即化，味道鮮甜，面頭蓋上甘海老，入口甘甜，
面頭沾上本身甘蝦既蝦膏，濃香惹味，而底部尊菜好似食緊啫喱咁，口感好特別。
「沙甸魚磯邊卷」裡面夾雜住紫蘇葉、芽蔥、黃蘿蔔同埋茗荷姐係薑花冧，
沙甸魚口感爽脆，魚味突出，配菜完全發揮佢地作用，增加左魚肉既鮮甜度。
「高知縣火炙大拖羅」熟成左3日，所以油份比較重，火炙後油香更加明顯，
入口即化，貿感香滑；而中間夾住中拖羅、紫蘇葉，魚味更顯濃郁，好食！
「北海道毛蟹」師傅預先拆哂肉，見到一梳梳蟹肉，啖啖蟹肉相當清甜，
配搭面頭既根室海膽，再用最中餅包住，好似burger一啖過，過足口癮呀！
▪️ 茶碗蒸し -
▫️ 食完刺身，抖抖先，整返個「茶碗蒸」就最好不過，一開蓋見到面頭滲上蟹籽、
黑松露、同埋鳴門卷，蛋身夠滑溜，連埋黑松露一齊食，惹味感即刻提升唔少。
▪️ にぎり -
▫️ 終於輪到開始「壽司十款」之旅，第一道「北海道活北寄貝」口感很柔軟，
擠少少青檸汁，搽上豉油，師傅強調食返本身食材原味，相當欣賞呢種
唔花巧但講究既心思。
「伊佐木」人稱雞魚，佢味道比較淡身，但入口爽嫩、鮮甜，
肉質好有彈性，配搭醋漬飯就最岩。
「油甘魚BB」師傅利用脫水紙技術熟成左4日，魚味濃郁左之外，反而比平時
油甘魚無咁重油膩感，肉質偏向乾身d，口感更加爽彈。
「皮剝魚」師傅用返皮剝魚本身既魚肝擺係面頭，魚肝用左鹽同埋酒醃製，
鹹香份外突出，魚肉口感軟爽甜，煙韌彈牙，好食。
「島根縣手釣池魚」池魚仲要手釣真係第一次試，
肉身望落晶瑩通透，紋理清晰可見，比深海池魚更加鮮甜。
「天草縣小肌魚」無論賣相定味道個感覺都好似秋刀魚，
亦係江戶前壽司既代表食材，同樣只需用醋漬醃製，
個魚香味道已經相當突出。
「火炙鯖魚」一連四道火炙壽司，呢個鯖魚經醋漬過後先再燒，
咁樣將鯖魚本身清淡既味道帶出更強烈既焦香，肉質同時亦變得腍滑，唔錯。
「火炙吞拿魚面頰」亦姐係吞拿魚既面珠墩，賣相睇落真係幾似和牛咁，
油脂香十足之外，肉質爽口有彈性，經火炙過完全無筋位，好滿足。
「火炙吞拿魚腦天」屬於吞拿魚額頭上面既肉，個人認為係吞拿魚
最好食既部分，尤其是用火槍燒過，將魚油香迫哂出黎，夠哂惹味。
最後一道壽司「火炙紅瞳赤鯥」濃濃既油香充斥住味蕾，炙燒後肉質軟滑，
師傅係面頭再放上「北海道吉田產白海膽」，簡直係十級誘惑。
▪️ 季節の品 -
▫️ 完左壽司後，基本上都已經9成飽，但見到呢四樣野，胃口又開返出黎，
呢個「橘子水產白海膽」當日贏得排名第14名，色澤望落比赤海膽偏淡身，
入口比較清爽，同時口感真係好似食緊雪糕咁，完完全全融化我的心。
「銀次郎白海膽」因為比較罕有，所以佢係屬於最貴既一種海膽，
色澤望落鮮黃出眾，飽滿而挺身，食落佢既水份最高，味道最清甜。
「澳洲黑邊鮑」用左8個鐘慢火熬煮而成，完完全全鎖住鮑魚體內水份，
肉質更顯爽甜煙韌，師傅再係面頭拍打木之芽，將個香味迫出黎，幾有驚喜。
「芝士龍蝦」龍蝦肉夠爽甜，就算配搭芝士都唔會太膩，
旁邊仲有沙律菜做配搭，賣相吸引。
▪️ 椀 -
▪️ デザート -
▫️ 食完哂熟食，去到尾聲整返碗熱辣辣既「麵豉湯」暖下胃，你都咪話唔爽，
跟住甜品仲有「靜崗縣赤肉蜜瓜」同埋「宇治抹茶奶凍」。前者蜜瓜清新解膩，
果種果香認真一絕；而後者由師傅自家製成，奶香十足，夠哂滑溜。
整體呢餐用呢個價錢食到咁驚人既份量，性價比超哂班！
