不過同事最近就終於發現喺深水埗大埔道有一間賣咖啡的小店，對於想飲番杯咖啡嘅朋友來講心情簡直係喺沙漠中發現綠洲一樣興奮！所以我同同事一不做二不休，我哋嘅目標點止買杯咖啡咁簡單吖，今日就索性嚟食個lunch試吓有幾正！
呢間小店只有四個堂食座位，所以嚟到都要等一等，喺等嘅期間不斷見到有人嚟買外賣，睇嚟喺區內已經有一定嘅名氣，亦儲到一班熟客嚟幫襯。
喺門外已經見到有餐牌，可以揀定心水嘅食物同飲品。
店內有個小小嘅玻璃櫃，陳列出呢度嘅牛角包🥐同bagel🥯，如果我可以早起身的話，我都會過嚟買份早餐返去享受一個good good good morning！
店內掛有簡單嘅圖畫，都好適合一眾文青嚟打個卡，依家臨近聖誕，加咗好多聖誕佈置，充滿節日氣氛。
落單之後店員好快手就已經準備好我哋嘅食物，既然呢度咁打卡able，等我都影返張大合照先！
呢個All Day Breakfast總共有八款食物，包括多士、炒滑蛋、炒雜菇、茄汁豆、青瓜、車厘茄、煙肉同埋香腸，每一樣食材都有經過精心製作過。我尤其欣賞佢嘅多士，係好香脆嘅蒜蓉多士，滑蛋炒得好滑，炒雜菇充滿咗牛油蒜蓉香味，簡單如青瓜同車厘茄都會灑上胡麻醬，而佢嘅香腸選材好美味又唔太鹹，好有興趣知道係邊款香腸，因為我都好想買返屋企。
另外就叫咗我最鍾意嘅卡邦尼意粉，仲加咗煙三文魚，加$18嘅煙三文魚份量都幾多，而佢嘅卡邦尼意粉比起出面相對就冇咁多汁醬，取而代之嘅係蒜鹽同芝士粉，別有一番風味，而佢嘅麵質非常彈牙，少少煙煙韌韌嘅感覺，我就好鍾意呢個口感。
最近流行一款咖啡叫髒髒咖啡Dirty，係一個凍嘅奶底上面加一個shot，可以慢慢感受咖啡融合鮮奶嘅唔同層次，不過唔係間間咖啡店都有售，而喺呢間Will’s Coffee就搵到。所以呢度唔止係一間小小嘅Cafe，簡直係一間Coffee House。
另外叫咗一杯抹茶latte，鮮奶味濃郁得來亦可以感受到抹茶嘅香濃，面頭仲灑上抹茶粉，所以啖啖都有抹茶味道。
店外放咗一個紙箱，原來係盛滿咗咖啡渣嘅紙箱，無論你係唔係食客，都可以按個人需要攞啲咖啡渣返屋企，放喺衣櫃、鞋櫃等，吸味之餘仲令到櫃內有陣陣嘅咖啡香味，既天然又環保，下次再嚟光顧嘅時候，我都會自備容器攞返屋企用。
