平昌 (Closed)

曾幾何時在旺角食過一次平昌韓燒，今次search返見到樂富有間新分店，裝潢風格、食物質素均一樣，但就新淨少少，同無咁多人，記憶中旺角店都係爆曬棚好好生意。由於最高一級嘅「國王御膳」價錢相差太遠，所以揀選左中間嘅「世子御膳」，但其實食物選擇已經非常豐富，每樣食少少已經好飽。有無限任食爐邊蛋，仲可自行加入泡菜，味道更香更惹味！炸物整體黎講幾酥香美味，炸一口芝士脆香得黎好cheesy；吉列大蝦同樣香酥好食。牛肉款式都算豐富，有LA牛排、牛肋骨肉、牛前胸腹肉、T骨、肉眼、西冷、牛舌等等：西冷就會原塊上，自己剪，其脂肪較少，肉味較重，但無咩油香；相反肉眼脂肪較多，油香豐富，肉質亦較滑嫩；另外厚切嘅「西班牙捲狀豬腹肉」大大件，油香及豚肉味並重。T骨脂肪較多，肉質幾鮮嫩，肉味適中；牛肋骨肉亦夠軟腍。雞腎無雪味，自己燒都可以燒到爽滑彈牙及多汁！雞軟骨都正，大大粒，連住適量嘅雞肉，唔係細細粒得舊骨果種，同樣脆香惹味，食到停唔到口！