元朗冰室

Open Now

Now Closed

其實真係好鍾意食呢度嘅豬扒，之前去過好多間分店度食，但係呢排真係肥咗好多，所以食嘢份量都要減少，雖然你知道做運動比較有效，但係都要一路做運動一路減少減少食嘢嘅份量，所以轉食白肉雞扒，但係都係叫all day breakfast 做dinner, 呢度嘅雞扒我都係第一次食，當然唔及後設豬扒咁大塊，但係對比起塊雞扒依然係巨型嘅，脂肪比例比較少唔油膩，肉質一樣外脆內軟，迫油迫得好好，其他配菜嘢質素一樣保持得好好

今日去左佐敦尖沙咀搵食，想搵個地方舒舒服服食餐安樂午餐真不容易。一路走一路走到尖沙咀金馬倫道元朗冰室，終於可以舒舒服服吃飯了。先說環境，這餐廳是我見過最多卡位的，九成坐位，幾十張卡位，很能滿足我想舒服吃飯的條件。我們點了一個拉麵之選中的 洋日風味配拉麵，選了我最愛的地獄湯底。另一個餐點了全日早餐。洋日風味很有驚喜，基本上就是半份全日早餐加拉麵。地獄湯底好得， 很有以前出前一丁地獄濃湯影子，辣得黎很美味。全日早餐大大份，牛角包夠軟熟。太多選擇，太多想吃的下次再試。

其實平時冇乜食過茶餐廳，又講唔出想食茶餐廳叫乜嘢，淨係記得什麼特餐什麼快餐什麼茶餐，但係又唔想食個餐粉麵，所以睇咗好耐好多間茶餐廳都冇入到去，之後就見到呢度有厚切豬扒 all day breakfast, 合我口味一於試吓，有大概一隻手板咁大嘅後設豬扒，煎得比較香脆，有少少豬扒筋，肉質細嫩腌製得平均，沙律菜唔係太多，配上蛋黃醬欲罷不能，再食熱辣辣牛角包，香脆鬆軟，炒滑蛋半生熟軟滑嘅質感，加茄汁豆一齊食，勁正

呢排喺公司，日日開會，日日打仗，食個飯最緊要快，所以同同事揀咗最近嘅元朗冰室，午餐繁忙時間都唔使點等位，即刻可以坐低，落單之後好快就有嘢食，速度一流。我同同事每個人都叫左一個厚切豬扒餐，我嗰個係厚切豬扒司華力腸，豬扒保持水準不在話下，咬落去鬆軟多汁，份量十足，差唔多成塊面咁大，真係夠晒滿足，至於司華力腸，外脆內軟，白飯份量多，飽到食唔晒。雖然只係茶餐廳，不過都好有驚喜，竟然個豉油碟係心型，為沉悶嘅工作同午餐加添左一份驚喜。

是0甘的, 原本係打算食禾牛薈, 但疫情下好多間食肆都停業, 除0左禾牛薈, 旁邊0既LA MER都一樣停業, 0甘就近就去0左元朗冰室, 入到去先知原來幾大, 開業唔係好耐所以都好乾淨企理。卡位設紙巾, 好少茶記會0甘做, 加分, 睇MENU, 超多選擇, 不過主要都係豬, 應該幾出名, 0甘試下啦!我點0左焗豬意粉 , 同事點0左豬扖飯, 同事0個個0黎先, 有驚喜, 碟係西餐碟, 好大個好靚, 汁用心形碗上, 有0的好笑, 同事話個扖煎得幾香。我個意粉12:45落單, 1:05先到, 以尖沙咀茶記0黎講呢個速度真係唔合格, 0黎到仲要係飯, 唔係意粉, 原來落錯單, 我當然唔會要求換, 因為已無時間, 個焗豬好熱, 似即叫即焗, 雖然要等, 不過都理解, 豬扖都多, 即使係男同事份量都夠, 但對於我0黎講就太HEAVY, 豬扖唔會太乾身都OK好味,  焗豬索價60蚊連餐飲, 疲情下個人覺得有少少貴。

今天晚上剛剛完成報告講及在過年前遞交 這個時候突然很像日劇裏孤獨美食家的那樣肚子非常餓 但是喺呢個鐘數我諗真係乜冇咩選擇 佢哋呢間嘅元朗冰室聲稱自家製嘅豬扒係人哋嘅兩倍所以決定大吃一餐好好慰勞自己工作上嘅疲勞我嗌咗個豬扒配蓮藕餅豬扒顧言之 如坊間所講真係非常之大我諗差唔多有成兩隻手掌咁長但係佢嘅蓮藕餅就真係失望啲 一塊威化 頂嘅size咁大左右 另外佢嘅秘製豉油亦都其實普普通通 不過價錢 方面亦都中規中矩如果大家想喺深夜裏面食到一啲好大量嘅肉類嘅話呢度可以滿足您尤其是豬扒愛好者都可以試下

#小秘書 #星期五 收工，諗住入 #salon 求其修吓髮尾就走人，點知比 #髮型師 講兩句就由小修變咗大維修🤪 一坐就坐到10點幾先走得，出到嚟咁啱落住 #毛毛細雨，唯有搵地方食啲嘢先返屋企。呢晚街上異常多人，咁夜都仲有人喺街上排隊搵嘢食😋 我唯有揀間靜小小嘅，食飽快快脆脆就走人。我行到街尾入咗去 #元朗冰室，#服務員 帶我去 #卡位 坐，咁啱過咗10點正係貓頭鷹（宵夜）時間，我要咗個 #厚豬扒飯，#配菜 我揀咗 #蓮藕餅。#厚豬扒飯 大概5分鐘就送到，最吸引我嘅唔係件豬扒，反而係個 #心形豉油兜😚 厚切豬扒肉質鬆化，帶少少肥肉，口感非常唔錯， 但係 #配菜 #蓮藕餅 可以講話冇味道，唔講我真係食唔出係啲咩黎，加上唔凍唔熱... no good no good😑 好在件 #厚豬扒 同 #豉油汁 非常配搭，我爭啲成碟飯都吞哂落肚😋

“元朗冰室”在香港有多間分店，主打厚切豬扒，無論早餐、茶餐定午市，餐牌一定有佢做主角。我食過多次份量大十足厚豬扒肉質鮮嫩，肥瘦均衡是好好食值得推薦。今早去做運動前來到這裏位於尖沙咀金馬倫道，食個簡單方便的早餐，價錢黎講都算親民，服務員態度殷勤有禮，地方大坐位滿多的，時代感裝修簡潔乾淨俐落。早餐種類都繁多，有經典嘅早餐都有美式嘅早餐，有麵食、包類、多士、豬扒、雞扒、豬扒、魚柳等等.......我叫了經典早餐B HK35元便宜扺食沙嗲牛肉通+蒜蓉厚多士+炒滑蛋+熱檸水沙嗲牛肉是罐頭牛肉,食落都食到鮮甜牛肉味,通粉煮得剛剛好不硬不會太過腍蒜蓉厚多士~多士夠厚烘焗後外脆內軟陣陣蒜蓉焦香，是我的至愛必食炒滑蛋～炒蛋的口感蓬鬆軟嫩熱檸水～感謝衝得沒有苦澀味，檸檬味道是酸，但可幫助排毒瘦身美容。

今日放假，出了尖沙咀吃午飯。朋友在附近返工，提議到「元朗冰室」。我12點半到達，只坐滿七成。大把卡位我揀黎坐，非常好啊！朋友未到，我便慢慢看餐牌，發現選擇非常多。我吃：沙薑咸雞飯。賣相不錯。雞的件數少了點。沙薑醬很美味。配菜有：青瓜和花生，味道OK。朋友吃：厚豬🐷扒蓮藕飯。賣相同樣不錯。豉油汁是另上。厚🐷扒很大塊我試吃了一口豬🐷扒，味道相當不錯，值得推薦給大家呢！蓮藕餅有2塊，朋友只吃了1塊，他說不好吃。是日星期五，食物水準不差，價錢也很合理。但放飯時間，食客竟然唔滿。這裡是約朋友輕鬆傾偈，吃個「快閃午飯」的好地方。早到也沒有伙計催我落單。吃飽也沒有伙計催我走人。原因是在場食客只有七成。

今日嚟到尖沙咀搵食，男朋友想食肉醬意粉，所以我哋就搵吓有冇茶記，見到元朗冰室唔使等位，座位都幾舒服，就入咗去。睇下個餐牌先，除咗午市套餐之外，都仲有好多選擇，仲有all day breakfast 同拉麵添選擇困難症都一定可以揀到嘢食啊！我哋嗌左一個精選午餐焗芝士肉醬意粉🍝（$58），一個厚豬扒配辣肉醬飯（$52），再散嗌多一個炸雞比（$28）。首先上咗個豬扒辣肉醬飯，辣肉醬都幾辣，用嚟撈飯好刺激，招牌厚豬扒就覺得都幾好味，容易咬，但冇咩特別不過不失～之後呢個焗芝士肉醬意粉，我就覺得幾好味囉，芝士份量都好多夠晒撈晒成個意粉，幾入味最後用呢個新鮮熱辣嘅炸雞髀來做完結，雞髀炸得外脆內軟，切開皮下仲有肉汁別出嚟，出色！

行過諗住求其搵嘢醫肚，叫咗個雞脾多士辛辣麵中大伏，煮得勁求其，麵又好淋多士烘到燶晒，雞脾還可以，但其他兩樣已經令人極度失望另外叫咗個厚豬扒飯，聽講係王牌招牌食落好普通，係價錢唔貴，但絕對唔算好食豬扒好靭又鞋，汁係茄膏飯度仲有芝士，洋蔥，菠蘿，都算係typical中嘅typical, 味道普通自稱專做豬扒，哪來嘅自信蕃茄太大舊又酸，飯底底還可以，但如果更硬身會合乎標準整體嚟講，同出面茶餐廳分別不大，但樣樣嘢食都令人失望，切勿光顧，後果自負

成條街有好幾間冰室，由麼地道入去就見到元朗冰室，雖然門外無好似隔離舖頭咁大排長龍，但質素又唔錯喎見門口大大隻字寫住厚豬扒，就嗌咗個全日早餐食吓，入面都牛角色、炒蛋、腸仔，當然唔少得成個餐嘅靈魂所在招牌豬扒啦！都算係真材實料嘅，骨唔算多，咬落去啖啖肉充滿油香，以茶記質素來講確係唔錯。至於個拉麵都算係中上，無諗到茶記都可以咁多元化比一般餐室乾淨企理，店舖後方牆上面嘅設計都幾有心思創意，如果落單伙記態度再好啲就good喇！

元朗冰室除左出名厚切豬扒外還有其他選擇今次就試左日式系地獄湯底 x 頂級肥牛拉麵配料更附上糖心蛋添~蛋蛋流心正湯底都有啲料到 不過又無平時日本稱既地獄辣感覺愛食辣的新朋友想嘗試一下 完全適合試試頂級肥牛 望落樣子ok 食落都幾有牛味拉麵麵質爽口彈牙配埋海苔糖心蛋整體升華左~

厚切厚豬扒係呢間餐廳賣點!! 當然要試試啦點了厚豬扒配辛辣麵餐~上菜時間都快豬扒厚度約有一吋份量 比其他餐廳大塊豬扒炸到脆邊 肉質咬落唔硬 而且食落無想像中太油 食到有啲豉油味道辛辣麵都煮到麵質剛好 係平時食到農心味道不過建議唔太食得辛辣既人 可考慮餐廳另上辛辣粉多士係蒜蓉多 夠味餐價錢就不過不失啦~ 唔算貴既如果叫飯就會配埋特制豉油

作為屯天元人，第一次食掛住「元朗」名嘅元朗冰室係係尖沙咀。平時對豬扒嘅印象就係嚡口。所以就試試呢間最出名係嘅厚豬扒可唔可以打破呢個定律。叫咗港人最愛之一焗意式厚豬扒飯。配料正正常常，有蕃茄同菠蘿，最重要係蕃茄汁上面有芝士！蕃茄汁唔會太流質，味道唔會太酸，好岩餸飯。至於主角豬扒，都有一個指甲嘅厚度。厚得黎唔會嚡，亦都唔會好似坊間用鬆肉粉整到太淋，好味。值得一提嘅細心位係已經幫你切好曬豬扒，對女士黎講好重要架。跟餐有熱奶茶，不過唔夠奶導致唔滑。奶茶唔出色，早知轉飲紅豆冰。服務方面，明明唔係繁忙時間，店員都會有d趕人走。茶記一大缺點。