吞POT 雞煲火鍋.住家菜 (Closed)

90s👦🐥情侶吃貨|😚飲食著數|🇭🇰hkfoodie🍽️(👦)自稱三星米芝蓮食評家(🐥)自稱拉麵沾麵專家👉 主打不專業食評🍽️👉 快閃飲食著數🤑____________前排唔想去任食打邊爐，所以黎左呢間油麻地分店吞POT試下😝.先講下餐廳環境，餐廳座位適中，每枱之間嘅空間充足，落地玻璃view 一定正好多，好多枱可以一邊打邊爐一邊欣賞城景。晚上6:00去到，可以欣賞到日落～晚上燈景，726呢個位置確實唔錯。.點左個滋補螺片花膠(半隻) $208.整體會話好足料，雞肉肉質細嫩，花膠足料✨✨熬出來的湯底變得非常鮮甜而且飲完唔口渴，冇乜味精既感覺！.配料選擇豐富同埋高質，多款可供選擇。調味料整齊排列，連埋豉油有九款咁多。.我點了芝士響鈴，佢主打即叫即炸，我真心覺得值得推介，可能因為我鍾意食響鈴，而響鈴又十分索味，加上芝士味好濃真係好邪惡😍😍.總括而言，推介鐘意嘅你試一試吞pot~!野好食，環境靚，性價比都唔錯，服務周到😋

已經好耐無食雞煲啦~依間有驚喜喎! 環境乾淨，服務都唔錯，門口仲有個大魚缸，帶埋小朋友都唔怕佢地悶親🤭唔想食辣又口痕想食雞煲嘅有口福啦，我哋今次都試咗$238 滋補螺片花膠雞煲已經包左半隻雞，餐廳另外仲有花雕藥膳雞煲或者胡椒豬肚雞煲口味揀，都係唔辣架👍🏻湯底雞味勁濃郁超推呀，好似飲雞湯咁，食完之後仲可以用嚟打邊爐或者配烏冬都perfect match😋另外推介$75 自制韭菜餃有6粒足料，值得一試。

食last day飯啦🫣🫣今日去左吞pot 入到去有超大落地玻璃如果朝早會望到幾靚嘅城景🙊重慶麻辣雞🐥🐥煲 中辣💚💚💚💚落單後等10mins就有得食啦😊😊一上枱就食得😜好香好麻辣度都好夠岩哂重口味人士去試吓半隻雞嘅份量都唔少連埋洋蔥芹菜超惹味🥳🥳之後加湯打邊爐🍲啦泰式生蝦🍤🍤刺身💚💚💚💚Oh my god仲以為佢係好似平時啲餐廳得五六隻蝦仔點知成碟勁多😱😱好新鮮唔霉🫶🫶脆肉鯇片💚💚💚爽口彈牙不錯😌本身見網上面啲人係推薦炸芝士響鈴不過朋友唔食響鈴唯有留返下次啦😸😸服務都很好及有禮🥰🥰🥰🍽吞pot 雞煲火鍋📍地址：九龍彌敦道726號23/F📞電話：2508 0002

唔知點解人大咗會比較鍾意食中餐今日晏晝同朋友出街食飯, 就揀咗呢間吞pot一直都以為呢間餐廳剩係得雞煲, 原來仲有午市套餐午市套餐可以自選一款小菜, 然後仲配有白飯、例湯、素菜同埋餐飲, 豐富得黎又抵食<回鍋肉>大食妹好耐冇食過回鍋肉, 見到有就忍唔住嗌回鍋肉雖然都係椰菜比較多, 但係肉嘅份量都唔少, 味道中規中矩, 送飯一流<梅子蒸排骨>朋友嘅排骨肥瘦適中, 仲配搭吸收左梅子精華嘅豆卜, 超好食配搭嘅蔬菜、例湯同嘢飲都幾有質素, 午市套餐整體黎講非常抵食

呢間係上樓嘅餐廳，一開𨋢門，見到個超級大嘅魚缸，魚魚生生猛猛咁樣👍🏻由於時間尚早，好好彩都仲有可以位置選擇，我走嘅時候就已經full house😆睇返餐牌都有好多選擇，由於同枱嘅都係女生，所以選擇咗女生至愛嘅花膠雞煲，既養生又好味，再叫多幾個菜就已經夠飽～必須讚美花膠的確大隻，而且雞嘅份量好多，湯底更加一流，係必飲item！！身為一個芫荽控，食乜嘢都會加芫荽，味道同雞煲都好夾🫶🏻韭菜餃應該係自家製，內裏嘅菜肉均勻亦都有結實口感！好味道！

餐廳地理位置方便，喺旺角市中心，場地亦都好大，而且通風都好好，唔會怕打完邊爐成身味🙈 提醒大家可以book枱時request坐窗邊位，日落時間嚟都可以同個靚景打個靚卡架🤭女士們鍾意飲養生湯嘅話，可以嗌螺片花膠雞湯， 好夠鮮甜， 又唔會太 鹹我自己一個人都飲咗三碗🙈雞肉唔老， 都幾唔錯👍我哋仲特登嗌咗呢度自創嘅爆芝響鈴，即叫即炸，上枱時已經熱辣辣， 浸一浸下啲湯，熱熔吓啲芝士，食嘅時候真係會有爆芝嘅感覺！ 淡淡嘅芝士味都估唔到幾夾，幾特別！推介一試！

今日想食雞煲，揀左呢間雞煲專門店，我地5點半就去到，好好彩可以坐到窗邊位，睇住城市景，都坐得好闊落。呢間有辣雞煲同埋滋補雞煲揀，我地之前通常食辣既，今次試左滋補螺片花膠雞煲，有驚喜✨滋補螺片花膠雞煲 （半隻） $228雞煲分量十足，入面有好多螺片、花膠同雞肉。我地試左個湯先，花膠雞湯湯底味道清甜濃郁，螺片亦能提升鮮味，呢個湯好飲。雞肉口感嫩滑，有咬感，雞味都好濃郁。花膠口感較軟，size好大件，煮到好淋。螺片口感滑溜有彈性，都有d菇做配料，總括真係真材實料，滋補養顔✨自創爆芝響鈴（3件）原價$45，半價 $22第一次見咁大件既響鈴，都係第一次食響鈴入面包住芝士，原來呢個搭配都唔錯淥左大概5秒，口感仲幾脆，咬到中間會有芝士爆出來，好特別✨大檸樂 $36✨醬料（每位$12）店員係入座既時候會拿醬料過來，有成9種，拿完會收走，想要再加湯/醬料都可以同店員講大檸樂味道正常，夏天打邊爐配凍飲，正早鳥優惠-19:30前埋單火鍋配料及小食半價宵夜時段21:30後入座即享所有火鍋配料及小食半價

廳位於旺角彌敦道726, 旺角站落車五分鐘就到, 交通都幾方便. 店內都幾多人, 但座位都幾舒適闊落.呢度嘅醬料費係十二蚊一位, 但係種類都幾多.特別嘅係仲有麻辣醬. 就算雞煲冇食到麻辣,都可以起醬料方面自己加番.滋補螺片花膠雞煲(一隻) $298雞煲份量十足,叫一隻雞分分鐘夠四個人食, 因為煲裏面除咗雞之外仲有好多花膠同埋螺片, 花膠煮得好冧, 好大件. 同埋螺片一齊煲個湯變到好滋潤.芝士響玲 (3件) $45芝士響玲係即叫即炸. 食落好脆. 而且咬入去芝士味爆曬出嚟.花枝片 $70花枝片份量幾多,而且大小的適中,放入口後得啱曬. 而且口感唔錯,好彈牙

23樓打邊爐. 夜景無敵未試過打邊爐可以望住個成條彌敦道. 一上去就見到有落地大玻璃. 旺角嘅夜景真係好靚. 邊度嘅雞煲就唔係任食.但好就好在可以任坐, 反正無限時. 火鍋有好多個湯底可以揀. 但我一見到menu. 第一時間比螺片花膠雞煲吸引住. 因為真係太特別,好少餐廳會有呢隻嘅湯底. 啱啱上嚟嘅時候我第一時間就飲佢個湯, 好甜同花膠味好重, 另外成個湯底都佈滿咗花膠同埋螺片, 果然係真材實料, 花膠嘅份量都幾大, 而且幾黏口. 螺片嘅份量都好多, 兩個字抵食. 講番個主角雞先.雞都幾滑的, 每件入面嘅雞都有雞肉,唔似其他餐廳會畀好多骨你. 但留意返雞唔可以煮太耐, 所以煮到差唔多熟就可以拎返出嚟 OR 較返細火啲. 食完雞煲之後, 可以叫餐廳職員落清湯打邊爐. 我就叫左佢地招牌 - 芝士響玲, 新鮮炸起既芝士響玲果然好脆. 芝士都幾多. 最後埋單計數都係500蚊左右. 我覺得算幾抵.

見用Openrice訂枱有discount，就同朋友去試呢間晚市雞煲。裝潢都幾精緻，一出lift就見到個大魚缸，店員服務態度都OK nice，都算helpful。試左個辣酒花螺雞煲，D雞幾入味，唔算好滑，但唔會太肥！出面D任食雞煲通常都好肥，食到怕怕食完雞煲就打邊爐，朋友想食雞子但無貨。見到有牛骨髓係surprise既仲叫左個封門柳，口感好食，都有牛肉香，但牛肉味可以再重D。食到興起想叫酒飲，佢menu雖然有紅白酒，但好多都無貨..最後叫左啤酒only..有D美中不足另外仲叫左D菇菇菜菜，85折(用Openrice book)後唔洗$800埋單。呢個價錢係合理既，加上我地坐窗口位，個景真係一流  好浪漫，好適合打卡! (不過今次我同frd去，浪漫都無用)不過佢地一晚都係得4、5枱客，入座率一半都未必有。不過正正係人少，個環境好舒服清淨...希望佢繼續做得住

失望的一個晚上牛肉好一般，但價錢並非一般餃，丸完全同價錢相反價錢高，品質劣去旺角是但一間粉麵店都可能好食過佢！但佢既價錢夠食三碗花膠湯底，花膠唔似花膠似豬皮不可一，不可再！

叫咗個細雞煲 份量勁少 應該得10舊有肉 又細件 多骨 啲雞件完全唔入味 麻辣雞煲 成煲淨係得 辣 &麻既味 未試過食咁難食既雞煲。。成間鋪好細 同隔離位坐到勁貼 唔會再食呢間。。。。

今日又去咗旺角行街,行咗一陣就開始搵嘢食,最方便就係想openrice望下,見到彌敦道726號23樓有間火鍋店幾好,一於去試下。由於疫情關係所以早啲去打邊爐,正上到去地方都算整潔,坐得都幾舒適,而且望落去彌敦道環境都算唔錯。坐低我哋揀咗個雞煲跟住打邊爐,你可以揀唔同嘅辣味,因為唔食得太辣所以揀咗小辣,雞煲嚟到分量都好多,而且雞肉非常嫩滑入味,煮多一陣味道更加香濃。食完雞煲叫少少配料打邊爐,頂級安格斯牛小排,牛肉味非常之香,而且好新鮮,加上有少少脂肪,入口特別香而且肉汁香甜,真係食一碟都唔夠喉。另一個重點推介,爆芝響鈴,響鈴即叫即炸,上枱已經非常之香,拖一拖水已經食得,響鈴吸收咗雞煲嘅精華,加上中間嘅芝士,令到味道嘅層次非常豐富,入口香脆,回味無窮。手打四寶丸, 呢個都係好好食,有牛丸,蝦丸,墨魚丸,黑墨丸,牛丸爽口彈牙，而且牛肉味重。蝦丸非常鮮甜爽口，同樣都係好出色。兩個人下午嚟打個邊爐，真係另一番風味。

最近天氣又凍返，又係時候食雞煲打邊爐啦，呢間好出名都係第1次嚟食，叫做吞pot雞煲火鍋住家菜。一上去就見到好大魚缸，都好容易認得，地方吾算大，不過就都坐得舒服，如果坐窗邊仲可以遠望旺角 鬧市嘅景觀，打卡吾錯。我地嗌左個重慶麻辣雞煲$188，有走辣，bb辣同小中大辣，我地嗌左bb辣，岩岩好，味道調得好好，超惹味又香口，雞揀左半隻，好滑，雞質素吾錯，又有雞味，幾好食。食完就可以加水打邊爐，再自選點料嚟打，點左菜丫丸丫日本廣島蠔丫牛柏葉，想特別推介牛柏葉同蠔，因為都係質素好高，蠔好大隻，又重蠔味，好正，而推介牛柏葉係因為吸晒d雞煲辣味，又爽口，份量又多，抵食得嚟又好食。最後要讚一下服務，會快上碟又會走嚟主動加水，吾錯。

呢間吞pot已經出名左一排，一直都未去食過，今晚特登上去試下，睇下係咪真係好好食😜地方環境都不是太特別，跟一般打邊爐店差不多，一坐下，店員就比你揀醬料先，之後就揀雞煲，可以不雞煲，直接打邊爐都得， 揀咗一個雞煲 ，有唔同嘅辣度，我就揀咗bb辣，唔使好耐就有得食啦， 啲雞真係超好食！因為肉質好嫩滑，又有雞味， 仲有好多配料例如洋蔥蒜 蔥頭香葉等等，所以好惹味！食完都差唔多，我哋就嗌多少少嘢食打邊爐，點左三秒象拔蚌$75，份量都吾少，幾平食，仲有牛柏葉$62，又係勁大碟，索晒d味，又爽口好正！最後加個出前一丁，個汁咁正，個面最好食，哈哈。