翠湖(嘉爵)園林酒家

Open Now

Now Closed

早兩日有個Auntie打嚟話喺佢屋企附近有間酒家新開張，所以就特意約我們一家去飲茶！一坐低我們就即刻攞張點心紙嚟睇吓揀選邊款點心嚟食？一睇發現原來他們有多款創意點心，所以就即刻叫咗嚟食！首先係哩個千島醬薄餅，金黃香脆嘅薄身配埋蟹柳、紫菜、芝麻再加上醒胃嘅千島醬一齊食，真係好正呀！而且感覺相當和風，唔諗過會喺中式酒家都可以食到哩種和風味道！而哩個水煮牛肉片腸粉亦都令到我們好驚喜，因平日食開通常都係蝦腸、叉燒腸、牛肉腸或炸米網腸，但哩個水煮牛肉片腸無諗過會咁好食，因腸粉嘅質感非常煙韌軟滑，包著鮮嫩嘅牛肉片，再淋上秘製嘅醬汁，效果出奇咁夾，令到我們有種食完再想要叫多一碟嚟食嘅衝動！陳皮牛肉球雖然唔係新款創意點心，因值得一讚嘅係平日食開嘅牛肉球通常都係得三粒，但哩度竟然有四粒，所以感覺好抵食！最後到咗重點推介嘅係哩個食得睇得靚花瓶，一上碟嗰陣我們都一齊嘩⋯⋯因個造型賣相真係超級精緻吸引，而且味道極之清甜，令人有種透心涼嘅感覺，再加埋喺底部嘅粒粒果肉，令到口感更加豐富，精緻度加創意度滿分！