誤打誤撞行咗去元朗出名食大排檔嗰區，本來諗住隨便食返啲嘢，點知喺幾間大排檔中間，發現咗呢間細細間嘅日本料理店——淦·水產。乍眼睇以為只係普通拉麵舖，點知入到去完全唔同世界。老闆娘好熱情，介紹佢哋主打壽司同刺身，仲特別提到啲魚全部都係由日本直送。老實講，喺元朗呢個地段開壽司店要突圍而出，真係要有料到。一打開餐牌真係幾驚喜，魚類選擇比一般壽司店多好多，仲有大拖羅、象拔蚌、蜜柑鯛、伊佐木等，全部都係平時唔容易食到嘅品種。當晚我哋叫咗大拖羅刺身、象拔蚌刺身、鮟鱇魚乾壽司、海膽壽司、系撚鯛壽司、蜜柑鯛壽司、伊佐木壽司，仲有壽司12貫。其中印象最深係吞拿魚面頰壽司，魚味香甜細膩；大拖羅油脂豐富、入口即溶，水準直逼日本；象拔蚌刺身爽口彈牙，新鮮到不得了。成餐飯最大嘅驚喜係，喺咁細一間舖頭竟然可以維持到咁多魚種又新鮮，真心唔易。後來同老闆娘傾開，先知原來老闆本身係做日本直送海鮮起家，除咗星期三同星期日（日本市場休市）之外，其他日子每日都有日本新貨入港。難怪啲魚質咁穩定。除咗刺身壽司，壽司飯都非常出色，飯粒分明、有彈性，酸甜比例剛好，唔輸俾高級Omakase。最後我哋仲嗌咗碗魚湯作結，原來係用當日唔同魚嘅魚骨魚頭慢火熬成，清甜無腥，一試難忘。整體嚟講，淦·水產係一間有實力、真心做食物嘅小店，食材高質、新鮮度極高，價錢合理，環境簡潔乾淨。喺元朗呢個臥虎藏龍嘅地方，真係值得專程嚟試。…Read More
