愛文生

Open Now

Now Closed

有電子牌輪候的潮潮大排檔 好多人等位 但好快有位 朋友介紹而來 第一次去街邊做廚房的大排檔 很有風味 很有鑊氣 睇住佢炒餸有火 實在好似表演咁 炒辣蟹是店中最出名的菜式 但本人覺得味道一般 但很足料 反之炒聖子則不錯 很大碟 而且少見的小聖子很入味 很新鮮最後最驚喜的是京都豬扒 但很有水準 醬汁好美味 豬肉扒好鬆軟 值得一試 金銀蛋炒豆苗 都很入味 上湯都好飲 豉汁蒸白鱔有點失望 好大碟 大到食唔晒 很便宜 但是成碟都無鱔腩 很失望 位置有點偏僻 離地鐵站很遠

好耐無食過大排檔 而鐵皮街邊大排檔更加無試過見呢間真係好旺場 街頭坐到街尾又見到師傅炒鑊火光紅紅 見到都知有鑊氣呀 黑椒薯仔牛柳粒 $98見好多枱都有叫的菜式 我地都唔執輸 跟人叫一樣的薯仔外皮好脆 好似平時食炸薯角的外皮牛柳粒亦唔會難咬 好有鑊氣！ 黑椒咸豬手138又係見每枱都有叫 連埋個鐵板上枱時熱辣辣咸豬手唔會太咸 但外皮太肥 有點漏 潮式炸蠔餅 $88佢個粉漿好薄 蠔仔又大粒 點埋魚露食剛剛好 生炒骨 $88生炒骨又係炸得香脆 即使有汁都唔會淋哂 酸甜恰度好處 配料都唔少 青椒紅椒菠蘿洋蔥都有 金銀蛋浸時蔬 $78同樣地沒有失準 真係好耐無食過咁地道又有鑊氣的街邊大排檔喇價錢比平時食開的比都唔貴 而且仲大大碟款式多又好食 正！

深水埗大名鼎鼎的愛文生大排檔，深水埗A2出口走出來後還有大概5-10分鐘的路程。大排檔當然很有廣東人愛說的wok氣！但是因為冬天，食物很快凍，夏天來吃又怕熱，太尷尬了。黑椒牛柳粒98HKD，入味，牛肉還被爆炒得一點都不老！好吃！炸九肚魚98HKD，包裹一層厚厚的麵粉，但是確實是酥脆香口，凍了吃都像小吃一樣可以吃不停。還點了一瓶生力啤酒🍻共222HKD⋯⋯據說最好吃的是豬手，下次還要試一下炸豆腐。

環境：大排檔環境, 要冷氣既話要等, 如果唔係要早d去攞位; 不過佢位置有d 隔涉, 從深水埗地鐵站行過去都要15-20分鐘.食物：愛文生和一般大排檔一樣, 都是主打小菜小炒海鮮等. 今次主要叫左什菜煲, 豉油王炒鵝腸, 黑椒豬手和椒鹽九肚魚. 首先, 推介大家一定要試黑椒豬手. 初初是因為見隔離幾枱都有叫所以都叫左碟, 佢個豬手整得好淋, 好入味, 黑椒味好香. 什菜煲都唔錯, 足料低食, 有粉絲尤魚菜心...鵝腸都好似佢拿手菜, 我就覺得同出面差唔多, 冇咩咁特別, 不過都係大排檔打冷必食.價錢：愛文生同其他大排檔價錢差唔多, 但勝在食物高質素, 性價比高. 會和朋友下次再黎試試佢其他菜式.

—喺條街個到炒餸 好大火好有鑊氣咁款椒鹽炸魷魚($98)脆口彈牙 有嚼勁黑椒薯仔牛柳粒($98)用咗美極嚟調味 牛肉都腍嘅避風塘茄子($78)平時都係食天婦羅茄子 呢個食法真係第一次茄子唔算油膩 同炸蒜辣椒都夾潮式炸蠔餅($88)見到隔離枱食 我哋又跟著嗌蠔仔都多 香脆皮唔會死鹹沙嗲牛肉粉絲煲($88)d沙嗲汁偏稀 變咗湯嗲牛肉湯粉絲雜菜煲($80)都足料————————————愛文生深水埗石硤尾街1號地下B-C號舖

今日媽咪話想食大排擋...問我深水埗有邊間大排擋好食...我諗左陣，就話 不如去愛文生啦...好耐冇去過啦！我好掛住佢個鹽水雞🐔，另外仲叫左3個餸，分別有 魚香茄子煲🍆、椒鹽豆腐、仲有 黑椒薯仔牛柳粒🐮，樣樣都好好食，果然係老字號👍👍👍我地5個人 叫左4個餸都食唔晒...因為份量都真係幾架最後打包左食剩嘅鹽水雞🐔🐔同埋魚香茄子煲🍆🍆返屋企做宵夜🤤🤤🤤🤤🤤我媽咪話呢餐好滿足呀！見佢地都食得咁開心，我不禁喺呢到要俾個好評

和同事一班人去食愛文生飯店，是一間係深水埗的大牌檔，我的同事話愛文生係深水埗必食秘店！入到去係坐係街邊的食店，感覺是一間好有人情味的食店。因爲保留了很多舊時的東西。店鋪有鐵皮檔仔的開放式廚房是傳統，感覺懷舊，好多人食客係度拍照。除左香港人會去愛文生之外，我見到有外國人都去這餐廳吃飯。飯菜好快手上菜啦，所以飯菜都熱辣辣好吸引，真係相都無影多張就被我地食曬啦。小菜全部都好有鑊氣好正。除左小菜仲有叫黑椒鹹豬手，係食愛文的招牌菜，查不多日日賣幾百隻。豬手個黑洋蔥椒汁好濃郁，豬手好大但煮得好霖唔難咬，D肉仲好嫩。怪不得同事說文生係深水埗必食秘店！

幾個朋友太耐冇見，話要約出嚟食飯！唔係討論去邊食飯嘅時候，朋友提議食大排檔-愛文生！估吾到斯斯文文既朋友會推薦大排擋因為佢極力推介，我地就一於試試佢啦！黎到大排擋街～原來有幾間架！終於搵到愛文生啦！比想像中大！有幾間鋪位，都已經差不多坐滿左人！我地一行四個人，就諗住叫五個菜！點知～黎到既份量比想像中大碟好多好多呀！我地一個男三個女，食都飽肚都食吾哂！最後仲要打包返去添！碟碟都好有火喉！食得好滿足呀！如果一大班人去食就爽！最後愛文生成為我既心水，一定會介紹俾朋友！

一直都想黎試，今日終於可試啦！大排檔坐街邊食特別有風味黎到已經見到好多人，好彩好快有位，唔駛望住人食下次真係早啲黎，差不多九點，好多菜式都冇晒乳鴿、桂林炒生腸、蠔餅...全部冇晒，要再揀過😭最後揀咗黑椒鹹豬手、椒鹽田雞、避風塘茄子、黑椒薯仔牛柳粒。黑椒鹹豬手，黑椒夠辣，豬肉粉紅色，夠腍，外皮Q彈，撈埋汁好正，連洋蔥都好入味田雞炸得啱啱好，外脆內軟避風塘茄子第一次食炸茄子！票原來係咁好味！茄子外皮炸到卜卜脆，內面軟淋淋，熱辣辣，口感特別，即刻要叫碗飯送飯食黑椒薯仔牛柳粒，牛柳粒太鹹，食兩件已經唔想食，但薯仔就炸到好脆，好好食要黎食一定要早啲黎，唔係就只可以睇人哋食，自己冇得食😭

相信好多遊客都慕名面黎,所以去到門口已經大排長龍,以前黎都冇咁多人,咁多年黎味道依然一樣好食。椒鹽鮮魷,外脆內鮮,絕不油膩,炸蒜都唔少。本身叫聖子,但係賣哂所以轉左炒蜆,醬汁好濃,蜆冇沙。魚香茄子煲,最重要係個煲,所以茄子好有味道,魚香就真係食到大粒梅香咸魚。黃金蝦唔講得笑,咸蛋足料,用上鮮蝦炸到黃金色,蝦殼外脆,份量都好夠,。鹽水雞即係沙薑雞,雞肉蒸到剛好,有雞味,咸度剛好,建議唔洗再點沙薑已夠味!

七點半黎到，好多人等緊位我地都拎左飛先眼見都幾多兩個兩個甘等但其實我又見到戶外有檯但無人座既跟住企左陣，過去問下等幾多張檯先，睇到係等六張檯再問下係咪等座入面先要拎飛排隊跟住答我: 你座唔座出面呀？我話: 可以座？佢話你座出面，有幾張，你睇下想座邊張哈哈，緊係座啦，又唔使等，出面又唔熱跟住我地就座底左了呢間愛文生真係多人到不得了叫左招牌黃金蝦 D蝦好大隻，有九隻炒到癡滿晒鹹蛋好食呀豉椒炒聖子嘩，呢個正到呢，聖子爽甜又彈牙！超好食仲有佢個汁都有D辣，好惹味家鄉小炒王正常啦，有蝦乾，魷魚，腰果，都幾大碟椒鹽鮮魷就炸得薄但淡味左D再叫左兩碗白飯，兩罐可樂

朋友遠道而來,想找尋地道香港美食。夠地道既一定大排檔莫屬,香港人最鐘意有鍋氣，夠火候。今日黎到爰文生，客似雲來，需要等一等至入到位。入到去一坐低就即叫炒蜆　炒聖子，但可惜可能係平日關係，９點左右已經賣哂！後來點左；生炒骨（無咩粉，食落都係肉）　一口哎落去都係肉汁　（正！）茄子煲（略為逖色——雖然食到用咸魚入味，但食落味道好淡，唔夠風味避風塘炒蝦（份量有Ｄ少，４個人食幾啖就無哂，同時值得一提係，師傅落辣椒落得岩岩好。　辣到好爽，好到位過癮。椒鹽鮮魷（勁好食，　份量好多，　食落去脆ＰＯ　ＰＯ。個日去到好多野都賣哂，下次會早Ｄ去

等位都唔算好耐大約二十分鐘左右,我地叫左乳鴿,椒鹽九肚魚,薯仔牛柳粒,啫啫雞煲同埋炒硯咁啦,已經好鬼餓但係都覺得麻麻地。椒鹽九肚魚係硬身，平時食開其他大牌檔都係炸到外脆內軟又入味但佢真係炸得好硬。薯仔牛柳粒唔知係咪個日太多人炒曬啲牛柳粒，成碟都係薯仔個比例真係嚇親人。啫啫雞煲個煲真係太少野食。炒硯啲硯勁細粒，粒粒都有沙，仲要得個辣字。比較好既都係乳鴿不過凍冰冰，最好都係啤酒超級冰凍，真係齋飲啤酒無咁嬲

今日去左愛文生， 第一次去， 6:30 到都要等位。 位置唔方便， 係深水埗同太子都要行好遠。椒鹽九肚魚， 幾香口， 魚偏細， 九肚仔都唔係， 係九肚孫。金銀蛋白菜， 食食下有條菜蟲， 證明啲菜好新鮮。豬大腸好香口， 夠乾身， 幾好。乳鴿 普通， 乳鴿都係津津好食。有舊上半身既， 有啲血味。內藏可能洗唔夠。魚肚勝瓜 冇乜特別， 淡口啲。魚香茄子， 有幾舊唔夠淋。薯仔牛肉粒， 好香口， 大排檔食呢啲係好正炒聖子，普通， 炒得唔夠香。廚房係馬路中心

今晚接完老公收工就去愛文生食飯，我們8:30到但已見到有好多人排隊，不過老闆話10分鐘有位，所以就等了等的時候見到一碟碟又大又香的野食，我們已經好肚餓，樣樣都想食，但發現差不多檯檯都有黑椒豬手，所以我們都跟住叫！ 隻豬手真係好大，兩個人淨係食豬手都飽左本來想食炒蜆，但已經冇晒，好彩仲有蝦，所以叫左個黃金蝦。 每隻蝦都好大隻，隻隻蝦都被黃金漿包住！好香好野味我們仲叫左碟小炒王，因為老公話小炒王送酒一流！ 呢碟小炒王又係大碟到食極都食唔完其實愛文生每樣都好好食，香港呢類好食又有風味大排擋愈黎愈少，要好好珍惜同支持