常相聚小廚 (Closed)

早前團年飯聚 5 位只不過 $500 有找，平到笑抵到爛。見餐牌上添加大量新菜色，五光十色，吸引力不弱。沙薑雞腳，全晚最好味的菜色。熱辣辣沙薑味濃厚入味剛剛好，不過咸不嗆喉。膠彈黏滑的雞皮包著爽脆腳筋，損得過癮，滋味滿分。大白菜豬骨湯細，重重奶味蘊藏著白菜鮮甜在後，幼滑清甜陣陣肉香。趁熱飲超讚，凍飲大打折扣。桶骨啖啖甜肉，還有甘香肥美骨髓啜啜，大滿足。生芋炆雞煲，椰奶味特濃，完全係奶味，不是芋頭味。雞件炸到乾爭爭，雞胸雞背鞋烚烚，骨多肉少。消失的雞髀雞翼無影無蹤跟早前食過的啫啫雞煲情況一樣。炸蠔餅，蠔仔細細瘦奀奀不肥美，不香甜出完水無味，乾柴縮水無味道。蛋漿除了脆口就一無是處，對面新鹿鳴居好食百倍。馬拉盞炒莜麥菜，大量蒜蓉兜炒，油滴滴而有鑊氣！油到不得了，食完把口啷過油。油麥菜本身味道爽甜多汁，但食不到辣味。水煮牛，突然阿妹興起想食辣，一向家庭飯局不會選的味道。飲啖紅湯痲味夠重，辣味近乎食唔到，牛肉𢲡到滑潺潺腍劈劈，醃味清淡，大豆芽爽脆爆汁更加好食。沙薑雞，肥美咸雞招牌菜。全熟沒有一絲血漬出現，皮薄肉甜，鳳脂甘香撞上咸鮮白肉，彈滑髀肉，軟棉胸肉，食得津津有味無投訴，咸雞肉送飯一流。茄子斑腩煲，厚厚青衣柳讓鬆軟炸粉包著，完全吸收芡汁滑嘟嘟，陣陣魚味咬落結實。茄子肉半爽不綿，茄皮乾硬扣掉不少分數。茄子併斑腩齊齊食，味道更吸引。中式牛柳，突然想食就去食，不知何其多年不見。酸酸甜甜開胃洋蔥茄汁，牛柳超韌，少點牙力都趙唔到，走過油外層微脆香口，肉汁可以還有著牛甜味的。椒絲腐乳炒通菜，炒得有點黃帶點渣，不夠鮮嫩爽脆，乳汁杰撻撻，乳香特濃。梅菜扣肉煲，極咸地獄，扒多兩啖飯才頂得緊！微暖那會好食，扣肉仍是室溫，乾鞋不鬆化。墊底大白菜硬掘掘，太生難食。依舊我請客吧，食得開心最緊要。…Read More

爸爸生日揀左佢鐘意食嘅客家菜。客家菜，主要指客家人嘅飲食，喺廣東菜嘅三大流派中，客家菜可以話係最原始的嘅廣東“土”菜，就地理條件同物產而言，食物大多數係家養禽畜同山間野味。因客家地區主體分佈喺閩粵贛交界處，所以又叫東江菜、閩西菜、贛南菜。因為客家族群多遷徙且居住喺華中、華南丘陵嘅丘陵山地地區，遷徙行程中只能以鹽保存食物，勞動出汗多亦需補充鹽分以維持體力，因此飲食傾向多油多鹹嘅重口味菜，同埋會加入各式處理過嘅醃製菜類（如酸菜、福菜、梅乾菜、大葉品種嘅芥菜）。客家菜嘅口感偏重“肥、咸、熟”，喺粤菜或閩菜系中獨樹一幟。雖然我哋唔係客家人，但我哋成家都重口味！客家飲食文化古老，有以下四個特色，以肉類為主，水產品較少突出主料，原汁原味，講求酥軟香濃注重火功，以炖、烤、煲、釀見稱，尤其以餐廳舖面同平時d茶仔差不多，貼咗d招脾菜嘅poster，仲有歡迎光臨嘅走馬燈，其實都有d大陸feel~入面裝修簡潔，大圓枱加茶樓櫈，都係一般飯店格局，光光猛猛，坐得幾舒服。 酸蘿蔔客家人好醃製菜類，連前菜都係用醋醃製過嘅酸蘿蔔，酸may may 囗感爽脆，令人好開胃，差唔多食晒先記得影相。馳名缽頭桶骨大白菜（大）呢個係招牌菜之一，成個木桶裝住一大缽熱辣辣嘅豬骨湯，以瓦煲裝住，保存湯溫，外套木桶，保留農村風味印象。全煲豬骨加埋奶白菜，起碼要用幾個鐘先煲好，火喉十足。一個大份足夠我哋一家7囗飲，媽咪話喺肉檔買份桶骨其實都幾貴，呢份湯入面起碼有5、6舊拳頭咁大， 我覺得呢個湯都幾抵食！豬骨係選用豬腿同豬手嘅臂骨，入面有大量骨髓，最美味嘅莫過於將浸飽靚湯嘅骨髓啜出來，啖啖鮮味，原汁原味。金牌沙薑雞沙薑雞都係客家菜嘅常見菜式之一，雞肉夠入味不過比較鞋咗d!客家炆豬肉呢個簡直係客家菜嘅佼佼者，當中包含晒所有客家菜的特點！以肉為主通常選用五花腩，煮果陣加入醃製過嘅鹹酸菜，用老抽、蠔油同生抽炆煮豬肉，上枱時已經聞到陣陣香氣，豬肉色澤誘人，食落夠焾、香口。薑蔥爆魚鰾魚鰾則係魚卜，大多數嘅硬骨魚體腔上部嘅消化管同脊椎間都有鰾, 裡面有很多膠原蛋白,可以令皮膚更加光亮同有彈性。薑蔥爆炒夠香，但可惜魚鰾較韌。雜菇薯仔牛柳粒牛肉煎封後香口唔韌，薯粒都煎香咗，加埋走過油既雜菇，淋上少少蜜汁一齊炒。唔錯！黃金鮮魷雖然話傳統客家菜，無乜海產嘅菜式，不過而家嘅食店，都會加入d新派菜式，例如近幾好受歡迎嘅"黃金"系列！魷魚新鮮彈牙，外皮炸得酥脆，而"黃金"則係鹹蛋黃，通常會預先蒸熟佢，再將炸好嘅鮮魷同牛油炒勻，超級惹味！宮廷醬燒蝦球呢個好明顯唔係客家菜，但因為我哋鐘意食海鮮，所以點都會點d~不過呢個比預期中無咁好味，因為原來所謂宮廷醬燒就係泰式酸甜汁。蝦仁好大隻，不過無乜味，麻麻地。…Read More

星期日爆晒場要得位呢，八點先坐低，又係牆邊好迫既半邊枱，是但啦，我地都係兩個啫，最怕係枱太細唔夠攞食物，您要記得我好大食先得架。真係六合彩又唔見中，要咩無咩 ﹗連點四道菜都無，Win 左啦！順德魽魚煲無、椒鹽鱔片無、薑蔥魚鰾無、子薑米鴨都無 ﹗不如您地話我知有咩食好麻，當然要係我會想食嗰啲啦。酸蘿蔔，爽脆無味，夠晒酸，開胃開胃。我唔食花生架，次次侍應嬸嬸都幫我換，多謝啊 ﹗差不多兩年無黎幫襯，估唔到老闆及職員們都仲認到我。木桶白菜豬骨湯細，兩口子飲細 size 有多無少，熱燙燙送到，香氣貫穿腦袋，急忙倒碗入口，濃稠黏口而帶滑，厚厚豬骨味道夾雜白菜清甜，觸動每一吋舌頭，擋不住的引誘，連啪幾碗才可以稍為平伏情緒。但此湯必須趁熱品嚐，否則吸引力大減，如果變凍左，味道及香氣都離開了。今晚白菜爽甜多汁，無苦澀味又唔會硬屈屈，烚既時間剛剛好，吸引左豬骨湯更加好味。三四舊桶骨當然唔可以放過，貴就貴在佢地喇。雖然無咩肉食，但黐骨肉絲既豬肉味特別濃郁，軟骨位仲骨膠原豐富添，居然連骨髓都有得啜，夠晒補身，正呀 ﹗煎封黃花魚，簡單又好味。最緊要即叫即做又熱辣辣送到，薑蔥味道香噴噴，只要調味得宜，不太咸不過火，天然鮮魚甜味已夠殺，肉質幼滑、外皮香脆，好味啊 ﹗迅間剝光豬，得反棚骨啦。啫啫雞煲，又係佢，一定有得供應囉。以前次次都雞頸、雞翼、雞背脊，今次有進步喇 ﹗雞胸、雞翼、雞背脊。賣相好、顏色靚，味道香濃夠惹味，聞落香噴噴仲啫啫聲飛到，但味道只留在外而不在內，雞肉無味，無點醃過喎，失敗。都唔算難食，合格既。京都骨，一字骨都啖啖肉，唔係得條骨，靚料。重口味 ﹗炸過既排骨勁香口，肉質夠彈夠趙頭，索得 OK 汁滿滿的放入口，濃厚甜酸味直達胃部，非常醒神好味。撈飯一定好鬼正，但今餐係無飯晚宴呢。木桶白菜豬骨湯細、煎封黃花魚、啫啫雞煲、京都骨，雖然無粥粉麵飯，但兩口子嘆一湯三餸都好飽喇，雖然有點小插曲食唔到想食既佳餚，不過都滿足滿足 ﹗…Read More

今晚最初係計劃去翠榮食雞煲架，但我收工返到大埔等埋女友差不多七點半先到，邊度仲有位喎，要七點前先有位架 ﹗依家要等一個鐘先有得食，唯有轉場黎常相聚啦 ﹗點解得閒既朋友仔唔去翠榮攞位先呢？係要等我返黎先？木桶白菜豬骨湯大，白菜鮮甜爽嫩，完全無澀味，好好食啊 ﹗雖則侍應嬸嬸話個湯有落奶煮，但都無法證實，唔緊要，最緊要好飲。湯汁濃郁清香，豬味菜味都非常出眾，正呀 ﹗趁熱連飲四五碗停唔到口，凍左就唔好飲架喇，要快。大大舊豬桶骨有肉食又有骨髓啜，勁濃豬肉味，好食好食 ﹗依舊巨形豬桶骨有我手掌咁長呀，可以直接用手搾住黎損正呢 ﹗好有霞想，哈哈。雖然無咩肉，但黐住骨頭既肉味道特別濃郁、特別有咬口，好好味 ﹗依個大湯足夠六個人飲，雖然有兩架飛機，幸好剩低我地四個都唔係飲剩太多啫。楊州炒飯走菜，我話走菜乍喎，無話走蔥喎，少左陣香蔥味喇 ﹗今日師傅心不在弦？還是侍應嬸嬸們落錯單呀？沒有叉燒的楊州炒飯，因為常相聚一向都無叉燒供應，改用火腿味道差成條街囉。炒功了得既黃金炒飯，每粒飯都分開而被蛋漿牢牢包著，飽滿、嚥韌、乾爽、有鑊氣、有蛋香、有飯香，味道一流，好好食 ﹗如果有蔥就更香口啦，但唔好加生菜呀，太濕就唔好食 ﹗涼瓜炆鯧魚，突然女友要求食依道菜，佢同我都一樣唔食苦瓜架喎，點解要 order 呢？淨係食魚？最後咪又要我食晒苦瓜去，幸好今次苦瓜處理得非常好，甘而不苦，又爽又多汁，幾好食喎。鯧魚肉質幼滑，先煎封再炆，外皮煎得香脆，皮香肉嫩，仍保持肉汁。第一次食涼瓜炆苦瓜，比想像中好食得多，都幾滿意。西蘭花炒花枝片，估唔到劉德華既廣告橋段今日發生係我地身上 ﹗黎左碟西芹花枝片，我地不約而同話我地係要西蘭花，唔係西芹喎。幾驚侍應叔叔會夠膽答我地西芹仲好過西蘭花啦，哈哈。侍應叔叔話我地只係 order 碧綠花枝片，如果無指定時蔬的話，師傅就會隨意配搭架。最後侍應叔叔都攞返去廚房，等左十分鐘轉返西蘭花比我地，好明顯係抽出剛才既花枝片翻炒。花枝片質感完全腍劈劈、不爽、不彈、不脆、不鮮，明顯係雪蔵貨。西蘭花煮理得宜，鮮爽多汁，不會過腍，滿意。啫啫雞煲，吱吱咋咋、嘈喧巴閉咁送到 ﹗出晒煙，色香味聲音都好吸引，好有氣氛 ﹗豬潤嫩滑爽口，多汁彈牙好好味，難得煮得咁好 ﹗好多時都煮到乾硬鞋，只能吊味或做裝飾品，入唔到口呢。點解全部都係雞翼、雞頸、雞腳、雞背脊架？雞胸雞髀去晒邊呢？骨多肉少，無肉食，雖然味道非常惹味又香噴噴。發現雞件未熟透，裡面見血而且仲有點凍，只有七成熟左右。雞皮滑溜，味道都十分香口惹味，但唔熟講咩都無用啦，趕時間唔換喇，唯有只食熟既部份。已試過好幾次雞件唔夠熟架喇，可否走油多半分鐘呢？師傅您係咪失戀啊？今晚又唔係好忙，又唔係跑馬，order 五味餸有兩味都出事喎。…Read More

焗炸大蝦伊麵，炸漿沾上大量粗糙麵包糠炸到硬屈屈，人造硬殼一樣。油炸味濃厚遮蓋大蝦味道，剝左殼再食好好多呢，起碼食到蝦既味道，仲微爽帶肉汁添。應該大蝦去殼去腸加蛋漿麵粉，慢火炸第一次，再用猛火炸第二次，上碟就最好食喇。水汪汪既芝士汁，味道淡如水又無香味，真係睇唔過眼呀 ﹗太過淡口，唯有自己加料啦。好采屋企有好多調味料啫，開鑊加入大量芝士粉待芝士粉完全溶化後，撒下少量意大利香草及黑椒粒兜勻，開餐喇﹗好好食啊，好味百倍 ﹗…Read More

豉汁蒸鯧魚，幫襯多年都係第一次叫魚食，似乎蒸耐左少少，輕微 over cook 呢。都預左唔會係游水魚架喇，解凍需時之後再蒸，所以要等段長時間才送到。萬眾期待熱騰騰蒸鯧魚出場，請以熱烈既掌聲歡迎。魚味雖然香濃，而且有點肉汁，味道肉質還可以啦，肉質結實、魚味特濃，不過不失，都唔能夠太高要求喇。魚皮蒸得膠膠黏黏的，很喜歡。豉汁調得香濃而不濁，依點非常重要，好怕勁多豆豉，多到又苦又澀呢。不過魚肉質地有點硬實，未見鮮嫩滑溜。師傅係魚身界左幾刀先蒸，可以令魚更快蒸熟，但使到大量肉汁及水份流失呢，好采整體黎講味道真係幾好，好味。被強姦完的鯧魚小姐光禿禿咯，連骨都啜得乾乾淨淨，證明食得過。剁椒魚頭，全家都唔食辣，依碟為我而設架。難得個辣椒汁係自家調喎，青辣椒、指天椒、蒜蓉、蔥、等等，鋪係魚頭上面，但可否鋪得均勻一點呢？或是撈勻先蒸啦。不是每件魚頭都有沾上辣椒汁，唯有先係辣椒汁度打返幾個關斗、沾夠辣汁先食啦。鯇魚頭細無咩肉食，還好魚雲滑溜，魚肉鮮甜美味。加上辣椒汁十分之刺激開胃，只需小辣程度，撈飯食都唔錯。糖醋黃魚，我一向都麻麻地依個煮法，魚類酸酸甜甜怪怪的，其實同五柳魚差不多啦，先炸透後上個咕嚕汁。黃魚無開菊花變松子魚，即時扣晒分，變得平平無奇。煎封黃魚做得不俗，香口魚皮包著嫩滑雪白魚肉，仍鎖住少量肉汁，算滿意，我只係個人口味唔鍾意個汁啫。木桶白菜豬骨湯細桶，每次必 order 既例湯，招牌菜無甩拖，受歡迎情度仿如每日例湯。好香濃既豬骨豬肉味道，配上白菜清甜香味，十分甜美好飲。緊記一定要趁熱飲呢，凍左味道插水式下滑，唔好飲架喇。趁熱連飲三四碗湯，凍左味道會變差呢。飲晒湯先開飯，仲要食埋白菜先肯罷休。白菜新鮮爽甜，濃郁白菜甜味索入豬骨濃湯令味道更香更甜更多汁，乾腍中帶點爽口，不愧為招牌菜之一。豬骨大大舊，雖然無咩肉食，不過骨膠原豐富，一定要食晒去 ﹗記得食埋骨髓呀，精華所在，可以用飲管飲架，不過一定要小心唔好淥到生水泡呀。兩大舊豬骨黏著少許肉及軟骨，唔好浪費要全部吞噬 ﹗仲有骨髓汁啜架，千奇咪走雞添呀。正正正，滿分 ﹗阿姐曾經透露豬骨湯中有加牛奶一齊煲架，才而先會造出奶白色既湯汁，您估真係餚足十幾個鐘豬骨濃湯咩。我真係以為係真材實料、原汁原味長時間餚出黎既豬骨湯，不過我始終飲唔出喎。都無所謂啦，最緊要好飲，味道依然清香無比、甜美非常。沙薑雞一隻，常相聚招牌菜，還算滿意啦。沙薑醬分開上，雞味似鹽焗雞，雖然係全熟，但肉質保持嫩滑，薄薄一層雞皮，唔會太肥亦無多餘肥膏，雞肉散發淡淡咸香，都唔需要再點沙薑醬啦，質數唔錯，咸咸地送飯非常開胃。蠔皇鮑魚菇炆鵝掌，鮑魚菇真係非常似鮑片味呢，食落好爽口而且散發濃郁菇味，好好食 ﹗鵝掌炆得皮光肉滑，啜啜啜就立即骨肉分離，蠔汁已浸全滲透我掌皮膚之中，每一啖都充滿水份及蠔油味道，好好味啊 ﹗女友唔鍾意損腳指，非常好唔洗掙，無限骨膠原益晒我，正 ﹗生菜鮮甜爽口，依碟清得黎又健康好味，抵食。啫啫雞煲，食晒碟蠔皇鮑魚菇炆鵝掌都未黎，好明濕漏左單啦，催一催唔夠五分鐘即上，仲要出晒煙、滾熱辣炸炸聲添，但食落有兩舊雞唔夠熟呢。快還快，都要夠熟先得架麻。從未試過咁多豬潤架，有五六片咁多，誇張左少少，好采女友同我都愛吃豬潤啫，幾片豬潤小兒科。爆得夠晒嫩滑爽口、不乾不硬，好味道 ﹗係略厭厚左少少。消失的雞髀，整煲雞件只係雞胸、雞翼、雞背脊，雞髀一舊都無，以前都唔係咁架喎 ﹗味道就一流喇，但係用料差左少少。炸大腸，細妹好喜歡依味餸，因為有菠蘿。阿媽都好喜歡，因為有大腸。用菠蘿底喎，真係幾特別。我地討論到底菠蘿係罐頭定新鮮呢？但最後都無答案，又唔記得問侍應姐姐添。大腸炸得透徹脆卜卜，但只得得塊腸皮，硬係欠缺左少少野囉，點上甜酸汁不過不失。其實有埋絨毛先好食架麻，好似街邊小食店做法囉，外脆內嫩麻，雖然要冒住洗唔乾淨既風險。芝士牛肉粒，我對依道菜麻麻地，仲要勁多芽菜墊底，我唔食芽菜架呢 ﹗屋企人話鍾意依味餸喎，而且我又唔食芽菜呢、洋蔥，好采阿爸咩都會食啫。初時暖暖地個味道都還可以，但越凍就越咸囉。牛肉粒已經醃得太咸，再加上咸芝士，就更咸咸咸，可能送飯會好一點，但芝士撈飯怪怪的，又唔係 risotto 呀。椒絲腐乳生菜，近幾日經常掛住依味餸，真奇怪。今晚無論如何都要食到，一解單思之苦。味道不俗，生菜鮮爽甜美，只不過椒絲腐魚汁太水呢，掛不到係生菜上面啊 ﹗唯有每次都要大大束咁食，希望腐乳味可以更濃啦。蝦醬鮮魷炒通菜，除左糖醋汁配魚我唔喜歡外，蝦醬都係我唔喜歡既醬料，厭佢太咸太嗆太霸道囉，但我依一刻突然好想食喎，order 試一試啦。鮮魷爆得好香啊，仲非常富彈性，唔會腍劈劈，好好食 ﹗再加上蝦醬既香味，就更加香口添。水通爽甜多汁，炒得十分有鑊氣。大大束跟鮮魷齊齊食，有蔬菜既清爽加上海鮮既味道、蝦醬既香氣，好好味啊 ﹗…Read More

約了親戚到大埔行街,晚上時段,好多市肆不是休息就是滿座了,一直行到太和看看有冇其他店子,阿姨想起附近有間小店,是客家菜,抵食又好味的,於是去博一鋪,太好了!有開,我們4人,等了一會兒就有位了。是小小的店子,環境有點兒擠迫,新年時段,果然好爆滿,多是一家大細,電視播放新年節目,氣氛喜氣洋洋。這裡的招牌菜,見大部份人都是點以上的,特別是糖醋黃花魚,而我,也是被這道菜吸引了。看餐牌,都幾多選擇,價格合理,點了4款小菜及兩碗白飯。餐前小食有花生,茶要了水仙。糖醋黃花魚,$88,招牌菜之一,油炸的黃花魚,味道香口,配上酸酸甜甜的糖醋醬好醒胃,太美味了,條魚好快就清晒,醬汁都唔好嘥拎來撈飯。金牌沙薑雞,$80,招牌菜之一,沙薑味道適中,不濃不淡,雞肉不算太幼滑,正常水準。金翠蒜香骨,$75,招牌菜之一,味道香有咬口,但蒜香不算太濃郁。秘製黃金豆腐,$68,招牌菜之一,因為食了太多肉要叫碟菜,對豆腐本身不太有感趣,但估不到有驚喜,油炸的豆腐,外脆,內裡豆腐香軟滑溜,有點似玉子豆腐,但味道更濃,好味呀,個醬汁都有水準,加上好多冬菇,好抵食呀。果然好味又低食,食物有水準,價格合理,環境係迫左少少咁,叫餸食飯之選。…Read More

「大埔飯堂」真係無誇張到嫁!!! 因為我番大埔除左係屋企食飯 ,就係去常相聚食飯雖然距離我家有點遠 ,加上唔係咁方便 ~係大埔和太和的中間~但對於揸車既朋友就方面 ,因為门口對住有幾個拍車位!!!講到係飯堂 ,我當然食左好多次先寫blog !點解??? 只係介紹d 最最最好食 ,最最最出色俾大家 ~第1 ) 薑葱魚雲煲例牌必食~~~因為係其實地方真係食唔到 ~~~每一件魚雲都好有鑊氣 ,而且份量都有好多 (我估都有2個魚頭) 第2 )  糖醋黄花本身喱個餸只係得我鐘意食 ,但你一睇相就知.....我映相映慢左少少 ,就俾人食左半條=0=""所以唔洗我講都知好食啦~~~條魚煎完都唔會怕太油 而且仲好香口 ,而且仲有汁俾我送飯食 ....讚~~3)鐵板生啫薑蔥魚鰾鐵板生啫薑蔥魚鰾我起碼去左第3次先食到 ,因為每次都賣哂~~今次排隊個時叫定先 ,但都唔夠整一碟 .老闆問我地介唔介意配多樣餸我地當然唔介意啦 ,呵呵!! 最緊要有得食 ,因為每次都見到人地食自己就食唔到 ~~當然喱個餸無令到我失望 ,而且加左少少黑椒仲正~~~4) 蠔仔煎蛋角有少少出奇地好味 ,因為蠔我鐘意生食 ,熟左我都係一般 ~~~~但我爸食到津津有味 ,所以我就試下啦 ~蛋煮得岩岩好 ,唔會過耐 ~~喱個餸會配埋魚露俾你 ,但我覺得就咁食已經拍手掌!!!5)蒜香骨炸完仲有肉汁,唔會太乾 ~簡單一個餸就已經好好味~~基本上 ,我稱「常相聚小廚」為我既飯堂 ,當然讚到不得了 (絕對唔係賣廣告)另外係早幾個月前仲翻新左 ,所以地方都乾淨左好多 !!而且入面有2張12人台 ,加10張左右4人台 ...大家唔介意仲可以坐街外 叫得做飯堂,仲點少得仲有2部電視俾我送飯食XD…Read More

因過兩日就要出外公幹，所以團年飯提早今晚食，不幸地間間酒樓都爆滿，最後只好黎相聚小廚用餐啦，但係依餐真係超低水平，麻麻地，啲出品一次比一次差，如果撞啱客多的話，就更慘不忍睹，唉 ~沙薑雞腳，好味有咬口，炆得夠膠口，損腳指做前菜唔錯唔錯。炸白鱔球，真係越黎越差，以前薄薄一層蛋漿炸粉，炸到靚靚金黃色，外層非常鬆化，裡面肉質彈牙味鮮。依家炸粉勁厚，顏色核突又炸到硬屈屈，咬落成口粉，食唔到白鱔既味道。中式牛柳，肉質又硬又乾又韌呢，要手口並用先扯得開呀。味道可以啦，個汁酸酸甜甜都幾好。鐵板生啫薑蔥魚鰾，要趁熱食，凍左會好油。薑蔥加埋豬潤炒得勁香，魚鰾膠口又鮮爽，正呀。鮑片鵝掌扒生菜煲，唔夠熱既，微暖唔得咁架喎，唔熱邊好食架。生菜新鮮爽口多汁，平價鮑片預左唔會點好食架喇，鵝掌免強接受，炆得唔夠腍。啫啫雞煲，雖則依家咩都貴咩都加價啫，但都要保持質數麻。整煲得約十件雞件，仲要係雞背、雞全翼斬件，無肉食，雞胸雞髀一舊都無。味道係就係好香好惹味喇，加埋豬潤另香味更濃，但成煲都係雞頭雞尾唔得囉。…Read More

時菜斑腩脆麵，麵炸得乾爽又脆卜卜，但唔夠汁，太少喇，完全浸唔晒啲脆麵，搞到要乾哽脆麵，而且個汁好咸。菜芯新鮮爽口又充滿水份，熱辣辣。斑腩又腍又滑，薄薄一層炸粉，都尚算唔錯啦。…Read More

突然阿媽又話出街食飯，唔想煮，我當然立即讚好啦 ~ 依家阿媽都無心機煮飯比人食，次次都去燒臘舖買碟送，再求其蒸條魚或炒碟菜，咁都搞兩個鐘先有得食，仲要煮得勁難食，以前煮咩都好好味，依家越煮越差，煮少少野個廚房好似災後費墟咁 ~ 佢煮比啲貓貓狗狗食既仲有心機過煮比人食，仲要係買新鮮野煮添 ~ 唉，因此我寧願出街食好過，或者自己煮即食麵算 ~今日星期日，都預左超多人，但估唔到只係七點過啲已經爆晒場，要等十幾分鐘先有位。見咁旺已知不妙，每次一多人就出事架喇，唔係錯單就食垃圾，今次兩樣都齊。什菇黄金豆腐，好似放左好耐先攞黎咁，唔夠熱，只暖無鑊氣，啲芡杰達撻。依味係用玉子豆腐黎做，炸過既表面勁香蛋味，裡面就勁嫰滑。什菇一般啦。其實可以煮得更好，點解唔比多少少心機煮好啲呀，依味本身真係唔錯架喎。粟米斑塊，由坐低追到食飽都未黎，一路追一路講左十幾廿十次係要芝士焗班塊呀，咁都要錯，唉 ﹗客多少少啫，定啲黎，唔洗亂成咁麻。好普通既一碟粟米斑塊，口感鬆軟嫰滑，可以啦，味道一般。枝竹羊腩煲配西生菜，每次客多既時候質數都插水式下滑，配料又少，兩三粒馬蹄、兩三粒竹筍、好辛苦先發現一片仔冬菇，羊腩得幾舊，骨多肉硬唔夠腍。味道保持水準，湯底香濃好味。西生菜依然好新鮮爽口，灼一灼、索晒啲羊腩精華，再點啲腐乳醬，好好味。…Read More

自從前幾年介紹左依間飯店比阿媽，依家成日都話要黎食芝士麵，唉 .... 食得多都厭啦，又唔真係好食得咁緊要，而且依家都唔係當年成五六吋大蝦、又爽又脆、芝士汁又多又濃，變左喇。細妹就一直唔鍾意黎，覺得無樣野好食。我就話某啲好食、某啲唔掂囉 ~ 而且時好時壞，唔知係啲炒散師父定係兼職師父，定係視乎師父心情 ~酸菜，糖醋浸紅、白蘿蔔，爽口，開胃小食。金銀蛋莧菜，即係咸蛋皮蛋，好普通既家常小菜，菜都夠嫰口無渣，味道一般，無咩特別。上枱時唔夠熱，開住冷氣好快就凍，凍左味度無咁好。馬拉盞炒通菜，時令通菜超爽嫰，多水多汁，配以馬拉盞微辣且味濃，好食。椒鹽豬扒，好香口，又鬆化，且軟棉，仍能保存到少許肉汁，微辣，但可以再做得更好，表面炸耐一點、脆口、香口一點。火腩白鱔煲，配料有紅燒豆腐同什菇，豆腐好滑，炸過既白鱔肥美香口，味道香濃可口，必食。鐵板薑蔥爆魚鰾，勁香，鮮味又爽又膠口，熱辣辣一定要趁熱食，正 ﹗凍左就會油淋淋又腥架喇 ~什肉炒飯，叫住走菜架啦，又做錯野，最憎炒飯落菜，搞到濕答答。…Read More

我幫襯依間飯店係由羊腩煲開始，話說幾年前行過索到好香，又未黎過，就衝入去試一試，就係咁，連續食左四晚羊腩煲，自此就經常黎依度食小菜喇 ~ 講真依家啲小菜比以前差左好多，廚房轉左，但某些菜式仍保持水準﹗木桶大白菜豬骨湯，大大舊豬骨，次次都有兩三舊，睇吓叫大桶定桶啦，慢慢啜，食埋啲肉同骨髓，好味。湯有香濃奶味同大白菜味，好好飲，要襯熱飲，凍左無咁好飲﹗生啫雞煲，勁香，必食﹗雖然唔多見到有雞脾肉，但啲雞胸、雞翼都好入味好香﹗加埋豬潤一齊炆，令香味同味道更加提升﹗焗炸大蝦伊麵，越做越差，雖然我知道換左廚房又唔夠人手。見到碟伊麵仍然水汪汪，底下全部有水，伊麵並無隔乾水，烚完就直接放落碟，炸蝦放面，求其倒個芝士汁上去就算﹗只係一碟會伊麵，跟本完全無焗過。啲蝦縮晒水，得中蝦咁上下，仲要炸到掟死狗，硬掘掘﹗伊麵可以啦，軟硬適中，個芝士汁都幾好味啦。以前會用真真正正既大蝦，薄薄一層炸粉蛋漿，炸得香脆彈牙非常﹗請改善吓啦﹗楊州炒飯，鑊氣十足，炒得乾身、一粒粒分開、蛋包飯、好香，絕無欺場，好﹗…Read More

我同屋企人好喜歡去呢間小菜館食飯的，雖然係鋪子細細，但整既小菜都不錯的。其中有幾樣特色食物如什菌黃金豆腐、桶骨大白菜湯、大良炒鮮奶。琴晚我地七點幾黎到已經好多人，好在都有張細檯可以即時坐，不過以四人來說就逼左少少了。環境都係一般小菜館格局，空間細細，多人既時候會好嘈吵。勝在有部大電視可以比人電視送飯，不用錯過睇某些節目。一入座每檯都會有一碟酸蘿蔔既前菜，有白同紅蘿蔔兩款，咬下去爽口，酸蘿蔔十分入味，酸酸的很開胃。今次我地叫左桶骨大白菜湯、羊腩煲、賽螃蟹同蠔仔前蛋角。1) 桶骨大白菜湯每次黎都會叫，有大煲同細煲，四五個人飲細煲已經十分足夠。湯是白白的，飲落味道有豬骨香味亦有少許牛奶味，整個感覺很特別，與平時既豬骨湯好唔同。雖然係豬骨湯，但飲落一喲都唔肥膩。除左有湯飲，亦有大白菜同豬骨可以食。白菜吸收左湯既味道，更加鮮甜好食。豬骨就好似平時食豬骨煲既樣，肉不多但有骨髓可以啜黎食。2) 羊腩煲大部份檯都有點，味道同普通酒家的差不多。三個人食每人都可以有四舊食，份量都合理。不過枝竹既分量就好似太多，變左好似枝竹先係主角。羊肉油香十足而且沒有太勁既蘇味，不過在我個人而言，食羊多喲蘇味先夠好味。利用附送既生菜浸入湯汁，吸收哂湯既精華，正啊，不過當然就較為唔健康。3)賽螃蟹另一款每次都會食既菜式，蛋白炒得香滑而不會很散。撈埋生蛋一齊食就更加美味，仲可以配埋醋，不過個人認為不點醋已經好好味。賽螃蟹除左有少少蟹肉絲外亦有些帶子粒。口感更加豐富。4)蠔仔煎蛋角蠔仔既數量合適，蠔仔冇太重腥味同沙，不過整體煎蛋角感覺好濕好油，冇左平時食果種干身同香脆既感覺。所以覺得不太好食。總括而言味道不過不失，不過都是招牌菜較為出色，其他就比較普通。呢度既服務唔錯，同客人有講有笑同親切。不過人多既時候手腳較為不足。但價錢就算是便宜，大部分小菜都只係四十至五十多元，不失為一個平價之選。共$224…Read More

呢間野每次去必叫最出名既湯"大白菜豬骨湯"真係好好飲...又有分大細SIZE..仲有一味叫咩"炒蝦球"又係超好味的!!而且服務態度不錯...成班人去食就最岩喇!!…Read More