好旺茶餐廳 (李鄭屋商場) (Closed)

位於李鄭屋商場嘅好旺茶餐廳格局雖然有啲地踎，但係又黃又有良心，會定期派飯，絕對值得支持💪。叫咗個勁量常餐，我揀咗沙嗲牛肉紅腸公仔麵，配多士同火腿奄列。食沙牛，個汁當然重要，但係我同樣重視牛嘅質素，我最怕嗰啲用鬆肉粉乸到軟腍腍成塊發水擦紙膠咁樣嘅牛肉。呢度嘅牛肉雖然唔稱得上好高質素，但至少鬆肉粉落得唔重手，有肉味有咬口，雖然某一、兩塊有少少韌。至於沙嗲汁就正常味道，唔算太濃，食完無須洗腎，配埋兩塊煎得微脆嘅紅腸，個麵其實都幾豐富。至於個奄列，不但賣相靚仔，仲有好豐富嘅內涵，入面嘅火腿出乎意料之多。旁邊嗰兩塊多士都好有誠意，烘得好香，上面仲搽咗幾重手嘅牛油（我最怕食嗰啲只有丁屎咁多牛油、烘咗等於冇烘嘅多士）。我同（疑似）老闆娘講個奄列好好食，佢指一指大廚，笑言係佢得意之作。講講呀，佢又同其他阿伯食客吹水，喧寒問暖，盡顯小店溫馨。

間飯堂每日只開早上6時至下午2時。間飯堂每日中午派飯。我問老闆，係有善長翁人贊助。我點咗個水蒸蛋飯，加個中湯章魚湯。加杯冰奶茶共$47。因為個老闆有善心，我個人付出$50免找。個水蒸蛋有魚仔。加埋入白飯一齊食就非常好味。杯奶茶好重奶味。我覺得一般好飲。個中湯好足料，食到有章魚肉。好飲。

老闆表示奶茶既茶葉不是一般x榮的茶葉，係他們溝不同種類的茶葉整成的茶底！絕對好飲大家係附近買嘢不坊一試，就算走甜都一樣出色！食物方面，我推薦沙嗲牛肉麵。大家買開餸又或者嚟開依頭就去試下啦支持小店。

琴日去李鄭屋村探朋友 朋友極力推介呢間茶記 試左招牌熱狗 紅豆冰 新鮮熱辣夠好味 ，一睇價錢牌 眼都凸埋$22元 轉紅豆冰只加4大元 老闆你是做公益的嗎？價錢彷彿回到我學生年代 ，底讚下次經過 不要錯過