凱旋點心小廚

Open Now

Now Closed

平霸街坊小菜館，d小菜嘅味道都Ok，勝在性價比高，$148可以揀2款小菜，選擇都幾多，有成十幾款，我最後揀咗蟹肉金菇扒豆苗同埋西檸魚塊。蟹肉金菇扒豆苗真係落足料，超多蟹肉，而且豆苗嘅份量都多，好大碟。西檸魚塊雖然個賣相麻麻地，不過食落都ok，魚塊嘅質素都幾好，起碼唔會成舊都係粉無乜魚肉。加咗一碗白飯，連埋茶錢同碟花生，合共$183，抵。

$648的超值套餐話就話係4人餐，其實6個人食都綽綽有餘。沙薑雞半雞都幾大碟吓，啲雞肉有彈性，面而且都算滑。咕嚕肉唔太肥又唔太酸，肉嘅份量都算多。瑤柱金菇豆扒苗絕不欺場，無論瑤柱同豆苗嘅份量都算多。清蒸龍躉仔又係比想像中大條，而且好新鮮。粟米魚肚羹都幾大窩，我哋5個人每人起碼飲到3碗，入面都幾多魚肚。臘味糯米飯又係好大碟，炒得夠香又夠乾身，不過啲臘腸同臘肉就肥咗少少，但係味道真係唔錯，幾好食。埋單連埋茶錢同花生錢先至每人$140，直頭係反通脹價錢。

心血來潮想食點心，搵到附近有一間凱旋點心小廚，見門口擺滿點心蒸籠就入去試下。街坊小店主要做附近街坊生意，平時lunch時間經過都無入去試過，今次就試下啦！原來佢哋夜晚有做小菜，dinner時間有其他小炒選擇。蒸飯孖寶籠仔蒜蓉魚片飯加一碟菜，魚上面鋪滿蒜蓉來蒸，陣陣蒜蓉香味，魚片咬落幾滑，飯稍為有點硬。又想試下蒸鳳爪同流沙包，蒸鳳爪普通但都夠味，流沙包熱辣辣咬一啖裡面奶黃流出來。街坊小店水準不過不失，可以一試。食太飽流沙包食唔哂要打包走

呢一間街坊小炒真係非常抵食， $138有兩個餸，啲餸嘅款式都幾多，而且份量都算幾大碟，目測三至四個人都夠食。因為我哋得兩個人所以食到好飽，我哋揀咗粉絲蝦煲同埋黃金魚球，揀粉絲蝦煲嘅原因好簡單，就係見佢單價比較高，所以套餐叫佢好似抵啲，至於個黃金魚球純粹係因為想叫你睇吓究竟係乜東東。粉絲蝦煲味道唔錯，蝦嘅數量比想像中多，粉絲索晒啲蝦嘅味好正。個黃金魚球亦都比想像中好，事關我一開頭係諗住魚蛋或者鯪魚球，然後外面加d鹹蛋黃去炸，結果原來佢係魚肉起球再加鹹蛋黃喺外面再拎去炸。