全新美食店 (Closed)

今天行過這小食店，諗住買煎釀三宝食，平時那些姐姐嘟會幫你翻炸三宝，等你可以熱d食。排隊時，我前面的男人要求翻炸，但店內那男員工拒絕，說那些煎釀三宝是剛炸起，是暖的，拒絕翻炸。但那男人繼續叫姐姐翻炸，最後那些姐姐嘟翻炸給那位男仕。但店內那男員工另繼續教訓那客人，說什麼佢店不是即叫即炸，又說食物是剛做起的..等等。到我order 時，我說了3遍我想要的食品，那男店員只問我後面的女人order ,我同那男店員說，是我排隊先，剛剛已被人打了尖，現在你又問我後面的女人order...只知我只换來比那男店員粗口問候，又說看不見我，又話聽不到我講，又話我燥，我心想，買小食嘟比人用粗口問候，佢自己燥又話我燥，佢自己聽吾到又話我，罵完一個客又一個客，今時今日的經濟氣候，仲那樣對客! 要再幫襯佢的客人，慎重! 買小食，隨時比人粗口問候! 不幫襯佢哋，其實佢對面店，仲有一間相同食品的小食店! 食咗呢d差能量員工制造的食物，想想自己的身體會好嗎?!

唔知大家鍾唔鍾意間中「掃吓街」嘅呢？小秘書就好鍾意喇！不過因為衛生同公眾安全問題，好多車仔檔都已經搬哂入舖，甚至結業改行🤨就好似佐敦呢間「美食店」，我諗大部份九龍人都會幫襯過。今日小秘書喺尖沙咀做完嘢，都特登行過去整碟腸粉+粉果醫吓肚😋 阿姐幫我喺啲腸粉上加上芝麻、甜醬、麻醬同豉油，童年回憶返哂嚟！滑嘟嘟+混醬腸粉只賣$15，加多兩隻潮式粉果夾埋都只係$25。夠飽肚、又好味，簡直係窮人恩物呀😄

多少年，美味依然。講起來容易，做起來卻不易！話說街邊的小食，我只喜歡吃煎釀三寶，較合口味的有兩間食店，一間是土瓜灣的譚公道小食（初記），另一間是佐敦道寶寧街與白加士街交界的美食店（全新）。以前在土瓜灣工聯會總部上興趣班，都會去隔離街光顧初記，買煎釀三寶的魚蛋和豆腐。已經很久沒去那區，昨日經過便再去初記，煎釀三寶現在賣十元四件。可惜吃進口，已今非昔比，不論味道和份量都大為遜色。失望之餘，今日特地走到寶寧街，希望尋回昔日的味道，幸好沒令我失望，魚蛋和豆腐仍然美味！煎釀三寶是普通不過的街頭小食，但要做得好食又是另一回事。美食店的煎釀三寶雖然愈賣愈貴，現在是$13四件，不過仍可以接受。我較喜歡吃的魚蛋和豆腐，誇張點說，其實可以代替正餐來吃，因為魚蛋和豆腐都頗飽肚。先說炸豆腐，他們也不是經常新鮮熱辣地放在架上待賣，客人如有需要，可以要求他們翻炸來食。我則覺得豆腐太熱反而難入口，稍為冷卻了才吃，亦沒那麼油膩。豆腐的質地很幼滑，也只是一般的豆腐，沒有甚麼花巧。釀上一層薄薄的魚肉，加點甜醬或辣醬，已經十分美味。而炸魚蛋，這裏做得堅實彈牙，別處的所謂魚蛋，魚肉內混入了很多粉，吃進口像在吃鹹的「糯米糍」！

睇openrice 先知呢間中學已經成日幫襯嘅舖頭叫全新。由於以前放學成日經過，所以經常會去買串魚蛋同煎攘三寶食。唔係好食到誇啦啦，不過都是回憶嘅味道。但係呢到魚蛋真係大粒彈牙，辣汁又好食，都值得食嘅。

雖然係幾個老人家做 但系態度太差啦 如果唔系咁高地段 唔會有人再去買第二架掛 又唔系差佢哋錢 黑口黑面 …………………係附近返工 唔會再去第二次 ：）。。。。。。。。。。。。。。

因為等人既關係，所以口痕就買左D小食來吃今次嗌左有煎釀三寶($12/4件)同炸大腸($13/串)價錢來說算係唔便宜，不過味道都算OK煎釀三寶(茄子,豆腐)食評：SIZE唔算大，不過味道係可以既，肉同茄子都唔會甩下甩下咁，口感唔錯炸大腸食評：呀姐將個大腸會重新炸多次，抵讚，都係熱辣辣食最好味，口感都唔錯，不過唔會係我錯覺定乜，食既時候好似有食臭豆腐既味道既感覺，不過佢D大腸又炸得幾香口既！總評：有時口淡淡想搵野食下落肚既，都係唔錯之選

只在"麥奀"吃了碗細蓉，作為午餐，正式是"涉牙縫也不夠"。走到寶靈街一帶，經過這間開了一段歷史的港式小食店，買了幾大洋腸粉，再另加一串牛丸，那就剛好可以填飽肚....腸粉雖不算特別滑，跟深水埗"合益泰"還差很遠，而且又沒用豬油塗在墊紙的底部，但勝在夠熱辣辣，再加上阿姐毫不吝嗇的將大pat甜醬及麻醬堆在腸粉上，難吃極當然有個譜....牛丸帶點黑椒的辣度，肉有些筋，應該算是黑椒牛筋丸來吧。咬入口充滿彈性，應沒有溝入太多粉進去的，很有肉味。吃得過癮....付出不到十多塊的價錢，便宜又好吃，而且還重拾久違的"立食"經驗，實在讓人樂透...

這裏有很多嘢食,如炸大腸,魚肉,魚翅,燒賣,魷魚鬚,蘿白糕等,但這次所講的是它的煎釀多寶----有好多種類:如,茄子,青椒,豆腐,魚旦,尖咀椒,紅腸,雲吞皮...配搭不同; 雖然10元只有5件,但件件份量十足,釀的魚肉一點不小,很抵吃也很美味,雖然不是太健康;個人最欣賞是煎釀豆腐、茄子、和尖咀椒, 豆腐外脆內滑的且甜,很新鮮; 茄子也是很鮮甜, 至於尖咀椒,愛吃辣但不是吃很辣的,一定要吃,叫一件,慢慢從頭小小的吃,它會慢慢帶給你辣的刺激,吃完一隻,剛剛好接受到; 這裏的尖椒其實不是太辣如果和其他店比較,我估它們已被水洗過了才能這樣,試試吧！