七喜粥麵小廚

Open Now

Now Closed

因工作的關係,調離這區已經兩年了,十分懷念這裡的美食.約了老朋友來這裡叙舊.下午兩點,店內半滿,侍應都在吃午飯,仍然認得我們,立即彈起招呼.叫了魚旦河,淨豬手拼牛筋腩,淨豬皮拼魚旦,汔水兩支.魚旦河: 魚旦片彈牙,有鮮味,河粉爽滑,湯底也有鮮味:8分.豬手:很入味,有咬口;牛筋腩腍滑入味,是我們以前常來的理由:9分.豬皮:炆得入味,再腍些更佳:七分.服務是無得彈,不是因為我們是熟客,而是一向也如是,否則何以中午和晚晚小菜時段都爆棚.座位擺到出街?人客的眼睛是雪亮的,此話永遠錯不了.友人請客,在此多謝.

又係一餐宵夜,落左新蒲崗食呢度個蠔油蚊冬菇絕對係吸引我同朋友嚟食既主要原因,嚟一碗冬菇and蘿蔔之外,仲叫左廖孖記金針雲耳蒸雞(其實唔知點解叫廖孖記...),鵝腸米,九肚魚金針雲耳蒸雞比較多油,成個碟底都係,但其實味道唔錯,針菜係我既favourite!冬菇and蘿蔔蚊得好入味,好好食,蘿蔔無咩渣添,正,點埋超好食既辣椒油更加刺激!九肚魚只係一般,因為炸粉落得太多,加上喼汁味道太甜,怪怪地..鵝腸米味道ok,鵝腸點辣椒油食都好好味架!

嗰日叫了碗綾魚球粥，粥底好正好綿，綾魚球都好大粒，可是有太多味精。

睇黎間野幾好食評，而我又試過，所以就黎食下啦..........叫左個鮮蝦撈麵，大大碟，賣相唔錯.........d蝦幾鮮甜，而且仲有挑埋d腸走，幾細心呀.............見有評語話d麵有鹼水味，但係我食唔到有鹼水味喎..........總括黎講，個撈麵好好味...............見d粥好似幾吸引，下次黎試下先........

三號風球的夜晚,吃在七喜!人少少,我意思係舖入面,場面比較冷清,天氣的錯!一餐宵夜,要求不高,大家要了一碗蘿蔔雞紅,椒鹽九肚魚,金針雲耳蒸雞,腩汁菜心,再要了一些白飯填肚,就這樣便一餐!蘿蔔雞紅做得很出色,特別係雞紅,煮得入味,而且唔會有腥味,蘿蔔煮得很淋;椒鹽九肚魚比較乾身,唔會太油膩,點的醬汁是喼汁,味道一般啦;金針雲耳蒸雞味道比較濃,不過唔係咸嗰種,可是比較多油,如果送飯都可以接受;腩汁菜心腩汁幾杰,味道唔錯吃完冒大風回家去

鮑片花膠粥認真不錯！炸雲吞相當滿意，略嫌太少！九肚魚也不錯！不過牛腩的份量越來越少！

在下在此吃飯,叫左個金針雲耳蒸雞,一碟灼柏葉鵝腸,一碟椒鹽九肚魚再加一碟油菜!金針雲耳蒸雞,好油,雞係雪雞件,味道一般,個碟底全都係油!灼柏葉鵝腸,彈口,黑柏葉點個辣椒豉油正,呢味我最欣賞!椒鹽九肚魚,粉太多,炸得太燶,而且個喼汁唔好食,油菜普通!一般味道!

今晚三個人落七喜宵夜..我地叫左一碟白灼豬腰,雞紅蘿蔔,冬菇牛肉河,一碗艇仔粥,一碟菜心!白灼豬腰有點壓!是尿味,但係食豬腰好難避免,除非勁用生粉la過,所以我地預左,個辣椒豉油好味!雞紅蘿蔔好入味,好好食!冬菇牛肉河d冬菇又係好正!加埋辣椒油同辣椒豉油,好辣,不過咁至過癮!艇仔粥d粥煮得爛,易入口,料好足!宵夜好去處,介紹俾大家!

嚟呢度食,會係因為個冬菇,因為真係好好味!我叫左碗冬菇鵝腸河食,冬菇俾d蠔油汁醃到入哂味,食落好甜,good!鵝腸唔會靭,點辣椒油食又係好好味!再叫多碗雞紅蘿蔔,蘿蔔好林,雞紅滑,俾個蠔油汁浸住,食到停唔到口!天氣如果唔好咁凍,仲可以坐門口,食在吸煙區!

甫入坐,店員遞上的兩隻碗仔有克色東西黏著,唔敢用,未食已經唔開胃酥炸鯪魚球$16: 好抵鮮腰牛肉粥$19: 粥底靚,好綿,但多味精,豬腰沒有什麼味道牛腩撈粗麵$23: 又貴又難吃,麵好重梘水味,牛痕幾腍,牛腩非常差,不但又實又硬,嚼不爛,有些還未熟透! 非常失望

今天特然間想食粥, 便叫了這裡的外賣, 我叫了一客皮蛋魚腩粥, 魚腩尖很足料, 今次味精好像沒上次那麼重了,可能多人投訢吧, 同事叫了豬潤粥, 另外一個同事叫了雲吞米線, 雲吞很大粒, 但個人認為新蒲崗輝記較好食, 錦鹵雲吞…正好香脆點埋汁好正, 蜆介鯪魚球一客有6粒, 不錯, 九菜豬紅, 豬紅很滑…都會再食的.

聽完seminar返到附近已近11時, 不想吃得太撐肚, 就到七喜食粥.叫了豬潤肉丸粥.粥是米碎, 不過夠綿, 亦幾香.豬潤略厚, 對正脾胃, 咬落外脆內少粉, 一如既往, 依然受過化學物招呼, 但沒有同店牛肉嚴重.肉丸是個人一向的喜好, 味微甘香, 口感並非如一般豬肉丸彈牙, 又不致全無.七喜有一強項, 就是配料煮的時候拿捏得準, 剛熟不生, 鮮有失手.今次這方面還是做得不錯.結帳19元正, 只看價目是較同區其他了粥店貴, 不過粥的份量超然, 也值得.不過返到家傾電話, 喉嚨有些乾, 聲也轉了, 似乎味精還是有放.

要形容呢間野,只可以講不知所謂1,野食入面(墨丸河)有蟲,同個男人講(應該係老闆),佢\能夠話出街食野預左有呢d野架啦,咁乾淨不如番屋企自己煮,咁都講得出2,職員態度惡劣,叫三次都冇次應人,但入面唔係多人既繁忙時間喎,真係唔憂做咁希望大家為著肚子著想,少去為妙

食過幾間七喜,始終以新蒲崗呢間水準最好!我如果要來這店食,通常是宵夜,因為都是晚上收工後,家人沒煮飯,便落七喜吃!我最喜歡食佢既冬菇牛肉河,炆冬菇十分入味,咬落就知道用蚝油煮了很久..個湯用蝦子上湯底做法,甜!仲要推介係炒蜆,好野味,送啤酒一流!

相比較德發,今次的七喜便比了下去,但只係對手太強吧!值得推介炆冬菇,另外九肚魚,鵝腸,栢葉都好味!如果多啲今日推介的舖,大家有口福了!七喜六十三秒被叮,得到六千三!