超美隱世泰國菜: 聖誕除夕限定地道和牛腸必食

原來中環PMQ入面有間高質泰國菜「BKK」，環境仲要好靚!! 一入門口就有個泰國大鐘，泰式木系加埋昏黃燈光好有Vibe，聖誕除夕想食泰國菜都可以有儀式感呀🥰。

「BKK」主打曼谷、泰國東北部料理，菜式大部分都好鹹香惹味，想約飯局嚟飲酒食飯就啱晒啦，一齊嚟Enjoy泰國嘅熱鬧氣氛🥳。

今個聖誕除夕「BKK」推出限定料理，用超值價錢就食到和牛香腸配羅望子醬、泰式炒貴刁、軟殼蟹青木瓜沙律之餘，凍冰冰不如食埋黑芝麻湯丸配自家製薑湯，團團圓圓歡度節日啦。

和牛香腸配羅望子醬$138

呢道菜係傳統泰國東北伊桑地區(Isaan) 街頭酒攤嘅經典香腸。廚師團隊將普通牛肉轉成和牛，直接從路邊攤升級奢華版😆。

佢哋會將頂級和牛肉加入新鮮香茅、南姜、魚露、青檸葉等多達十幾種香料，反覆試味調配後手工灌製而成。香腸表面燒到好焦香酥脆，咬開瞬間爆汁，肉味濃郁又帶香茅同辣椒香味，微辣開胃。而且重點係酸甜濃稠嘅羅望子醬，新鮮羅望子果肉熬煮，再加入棕糖、魚露同乾辣椒等，酸度啱啱好中和和牛嘅油香，酸辣甜三重奏喺舌尖炸開，私心覺得飲埋啤酒一流呀。