Medium Rare Steak (Pok Man Street)

大角咀就黎得多，不過特登搵野食就好少，今日就黎到博文街見到呢間鐵板牛扒，逐個gram去秤既牛扒，點餐就係講你想揀牛既邊個部位，之後磅下幾重，再揀配餐。今日有啲肚餓，所以叫左個400g既後腰三角肉試下，因為之前聽人講呢個位置牛肉味會更濃，所以就叫左一試。店員會係你面前切好舊牛肉再問你配咩油同餐，我就揀左蒜油，配餐揀左飯、麵豉湯同可樂。牛扒即柯打即煎保證新鮮。牛扒上枱，好大陣蒜味傳入鼻，牛味亦都好香，400g黎講絕對夠食，牛後腰呢個位口感結實，而且牛味真係比其西冷牛柳既地方濃味，好啱我呢啲鍾意食牛既人。蒜油既香放埋落白飯配埋牛扒食就最啱，而且餐廳亦都準備左柚子汁伴碟，怕肥膩既朋友仔點一點就會多一種清新既感覺。…Read More

死黨夏總晌大角咀返工，佢又喺咀尖嘅人，嗰區有咩好食問佢就最啱喇。約咗佢出嚟傾啲私人嘢，順便兩支公「撐枱腳」，食肉啱晒我哋，就建議去賣日本牛扒嘅「牛扒ミディアムレアステーキ」，佢話啲扒唔錯，但定價卻非常親民。無嚟博文街一段時間，已經變為成條酒吧街，撞正今日喺星期五晚，人氣更旺。扒爐、廚房就設晌近門口位，香氣漂出室外，行過都聞到嗰陣陣肉香。室內唔算大，亦唔算細，一室紅磚牆，配木枱，暖黃嘅燈光，又幾有種扒房情懷。而外面仲有個立食區，可能最原先喺立食，不過，見依家都有擺放啲櫈俾客人坐。餐廳採自助形式，到門外嘅點餐區落單，揀扒類、要求嘅重量、選配料（蔥油、洋蔥油、蒜油，要齊3樣都得，唔知喺咪日文寫法，其實唔喺油嚟，喺實實際際嘅蔥粒、洋蔥粒、炸蒜片）、轉唔轉為套餐（+$25 / $45），無加一服務費，俾個傳呼器你，等叫就有得攞。都介紹吓扒類嘅選擇，餐廳只賣3個部位：肉眼、牛柳、西冷，就晌收銀處旁嘅凍櫃展示晒出嚟。溫提，起錶價喺300g，即大概10.5安士，一般人而言喺好夠食。而我哋就同樣揀+$25嘅套餐，可以晌沙律、麵豉湯、汽水、白飯中4揀3。師傅都好熟手，切出嚟嘅重量跟我哋嘅要求都差唔多，誤差都喺晌10g以內。基本上，正如餐廳嘅名字「Medium Rare Steak」，牛扒都喺燒到Medium Rare嘅生熟度，而透過鐵板再控制到Medium到Well Done。食牛扒就梗喺生啲好啦，小弟就一向喜歡Medium Rare。基本上啲扒都有少少俾鹽醃過，不過，枱上都放有即磨嘅海鹽同黑胡椒，等客人按個人喜好再調節。傳呼器響喇，出得去廚房拎扒，唔講得笑，啲扒晌塊鐵板度滋滋聲猛響，堅喺熨熱。所以，店員都溫提要小心，塊鐵板有二、三百度，仲話有需要幫手拎可以出聲。肉眼（341g）$112.5幾個部位中，肉眼較喺小弟心水，因為少脂肪，肉味特別濃，而蔥油、洋蔥油、蒜油3樣都要晒，揀沙律配白飯，再要咗罐熱情果汽水。沙律喺簡簡單單嘅椰菜絲、甘筍絲，再淋上胡麻汁嘅日本風沙律，味道清爽，配牛扒都幾唔錯。唔講得笑，件扒真喺好大塊，冚過晒成塊鑼板，而啲蔥粒、洋蔥粒、炸蒜片落得一啲都無手熨，仲伴埋燒汁，個汁亦非常好食。講到件扒，真喺好得，好有肉香，燒得又啱啱好，裡面仲帶點嫩紅，卻半點血水都無，咬落富肉汁。牛柳（304g）$112.4夏總就揀牛柳，佢話喜歡牛柳嗰份軟腍，都喺配晒蔥油、洋蔥油、蒜油，不過，佢就揀麵豉湯配白飯，汽水就再咗罐維他檸檬茶。夏總話佢嘅麵豉湯都無欺場喎，唔會得朕鹹味，麵豉味都幾香濃，湯中又放有少少昆布。件牛柳非常厚身，小弟都切咗一小件嚟試試，啲肉真喺有一定質素，口感確喺頗軟腍，卻又不失肉味，就算唔再調味，都已經夠晒。順帶一提，小弟罐熱情果汽水又幾好飲喎，酸酸爽爽，襯牛扒亦有幾好效果！最後，記得幫幫店員手，幫忙拎番成份托盤去「返却口」，一人拎自己份，可以減輕到店員嘅操勞。越晏越多客人，有一家幾口，有情侶，亦有啲單身寡佬，只要食物好，定價合理，真喺唔憂無客路。喜歡食扒嘅人，嚟到呢度就可以一解牛扒癮。…Read More

愈黎愈多鐵板牛扒既餐廳，尼間分店開業冇耐，lunch time好多人黎食。主打肉眼、牛柳，及西冷，仲可以加$25有set，4選3個配搭。先落order俾錢，拎‘嘟嘟機’，後入座。叫左牛柳300g配洋蔥油(價錢$0.33/g)，重量會有少少出入，睇師傅手勢切多/少左俾你。亦會放個磅出黎，俾你睇到幾重。師傅將牛柳煎成3成熟就上鐵板。一大件肉送上，外層帶d焦脆，內層仲係紅色，冇過熟呀good。肉汁勁多，一切流哂出黎。而且非常厚身，如果唔鍾意太生，可以趁鐵板仲熱，就切開煎下。另外，有柚子醬可以醮，令肉更清新。肉唔‘鞋’，而且因爲係牛柳部位，所以瘦肉比例佔多，一d都唔膩。但如果鍾意半肥瘦，揀西冷就岩。重點係，冇用好多油去煎，所以鐵板見唔到出油情況，good。跟set配左沙律，麵豉湯，汽水。沙律配有芝麻醬，開胃。而麵豉湯用昆布煮，有幾塊係湯入面，食完咁大塊牛，飲啖中和一下。整體，牛柳生熟程度拿捏得好好，肉汁多而且味濃，大食既人又可以叫大份d。最重要冇加一，食到好牛肉，抵食。不過，係自助形式，食完記住自己放番好個托盤。…Read More