Café Malacca

朋友提議吃星馬菜，地點是位於西環今旅酒店的馬來一菜館；緣何要去到石塘咀吃星馬菜？原來餐廳主理人會不時到當地購入新鮮和難得一見的食材，盡量保持「當地的味道」，既是如此，當然是立刻應約。友人曾經在馬來西亞小住了一段時間，點菜方面自不然是由他發辦。由香港大學站B2出口，酒店就在出口左前方，用不到兩分鐘的腳程便可抵達。餐廳採簡潔開揚的設計，空間感十足。Malaysian Rose Syrup Drink玫瑰青檸～先來一杯怡神解渴的特飲撲一撲身上的暑氣Satay Chicken (6pcs)沙嗲雞肉串燒～燒得也頗香口，卻稍嫌不夠乾身；蘸上香味十足但不會過甜的沙嗲醬，倒也熱辣惹味。 Rojak囉惹醬蔬果沙律～這個賣相欠奉的沙律，吃下去卻別有一番驚喜，濃稠的沾醬甜酸中帶鹹香，配上清甜的水果，吃出了五味紛陳的滋味！ Chwee Kueh水粿～這道源自潮州的星馬小吃，在港也真的難求，經白米磨成漿蒸煮後的水粿綿綿滑滑，面頭撒上由菜脯、蔥、蝦米及辣椒煮成的餡料，果然是一道簡單而美味的庶民小點。Penang Chee Cheong Fun檳城豬腸粉～驟看跟我們的豬腸粉分別不大，口感卻更煙韌滑溜；只是除了甜醬跟辣醬外，還多了一味蝦醬；成了馬來口味。Hainanese Chicken Rice海南雞飯～雞皮爽彈而肉也嫩滑，蘸上三色醬 (薑茸、辣椒醬、黑醬油)同吃也令人滿意，反而油飯的香氣和油潤度卻略嫌不足。Klang Bakut The巴生肉骨茶～一向也不是特別喜歡肉骨茶，過往吃過的也不怎樣出色，但這裡的令我有所改觀，豬肉煮得淋而入味，而且份量也不少，醇香的藥材湯底更令㗋頭一片清涼，喝了一口便立刻想喝第二囗。 Ikan Pari Bakar (Grilled Stingray)醬燒魔鬼魚～ 以蕉葉包裹著的魔鬼魚經燒烤過後，除可以防水份流失外，更增添了陣陣蕉葉香氣；將外層輕輕一拆，便是鮮嫩多汁的魚肉，灑點檸檬汁在面頭就更能增進食欲！Penang Assam Laksa檳城亞參叻沙～只試了少許，味道酸酸辣辣，加入鮫魚肉及爽滑的米缐，見朋友吃得不亦樂乎，相信味道應該幾正宗吧。Penang Char Koay Teow  (with Duck Egg)檳城炒貴刁(配鴨蛋)～朋友說，正宗的炒貴刁應該還有豬油渣及螄蚶，貴刁一到，已聞到陣陣香味，味道非常出色，誠意推介。記得一定要另加「豬油渣」，如沒有要求，餐廳是不會提供的。 Bee Thai Bak老鼠粉～老鼠粉的外表與銀針有點相似，但口感較黏口，放湯同吃，煙煙韌韌，幾是有趣。 Fried Bean Sprouts with Salt Fish鹹魚炒芽菜～簡單原是最美味，肥壯短小的芽菜爽甜多汁，加上鹹魚的香味，想不到竟會如此出色，大家不停的下箸、不停的喊好吃，結果要再來一碟滿足大家意尤末盡的心！Kuih Dadar (2 pcs)香蘭椰絲卷～狀似春卷，但不是脆脆的口感；外層帶有微微的班蘭葉清香，內層的椰絲非常香口，甜度又不會太高，不錯吃。Kaya Toast咖央多士～很久沒有吃過這樣優質的咖央，再加入小許牛油，就已是一絕，不容錯過！ 一路吃一路聽朋友講解有關的知識，真是獲益良多，開開心心又度過一個愉快的晚上。馬來一菜館 (港鐵香港大學站B2出口)地址: 西環皇后大道西508號香港今旅酒店2樓電話: 2213 6613…Read More

有朋友睇過小弟食評介紹賣星馬菜嘅馬來一，心郁郁有興趣一試，而小弟亦都好鍾意馬來西亞依個地方，尤其檳城及浮羅交怡。人少食唔到幾多嘢，所以，就不如多約幾個老友記，一齊過嚟馬來一品嚐其地道星馬美食。今日週中閒日，我哋又嚟得早，所以人客唔多，不過坐落就越嚟越多人。雖然裝修唔豪華，但喺勝在簡約舒適，地方闊落，我哋揀咗中間靠牆圓枱，貪其騷擾少啲，而背後幾張星馬街頭小攤檔黑白相，甚有味道。由於小弟嚟個幾趟，而朋友就首次到，自不然乘機將點菜重任交晌我手中，其實，未嚟之前已心裡有數，有幾款地道又富特色嘅菜式都好想俾佢哋試，所以，今次點菜無乜難度 。晌星馬，最抵就喺飲嘢，尤其一啲大牌檔、熟食市場，啲果汁抵飲到暈，一杯1L鮮菠蘿汁，都喺馬幣6蚊左右（~HKD15），而一杯近1L嘅榴槤牛奶，只賣坡紙2.5（~HKD16） 。當然，晌香港就無可能咁平啦，不過，嚟食星馬菜，點杯飲品多少都喺慣常。 涼粉冰 $23屬新加坡特色飲品，梳打水加涼粉條，算唔上好特別，只喺帶嚟涼快清爽嘅感覺。 香茅特飲 $23 :) 之前飲過，覺得特別所以介紹朋友一試，以香茅煲水，香茅味非常突出，飲一啖香茅味已衝緊入喉嚨，而青青哋嘅斑蘭果凍條，更為個特飲多添幾分趣味。 柑桔特飲 $23 :) 晌大馬旅行時，佢哋好興飲桔仔酸梅汁，大大細細食肆都見。今次，小弟就揀柑桔特飲試試，為求忠於地道，都喺用馬來西亞桔仔調製。入口柑桔味濃，味道酸咪咪，酸爽開胃，如果嫌太酸，附送嘅糖漿就大派用場。食物方面，由於今次嘅朋友都算大食，所以，較平時多點一啲菜，免得大家唔夠盡興。6道菜，加4個甜品，相信絕對可以滿足到佢哋！ 囉惹醬蔬果沙律 $53 :) :) :) 要數最有風味及地道特色，依個大馬沙律點可以唔嗌嚟俾老友試試。以菠蘿、蕃石榴、青瓜、楊桃、蓮霧、土魷跟檳城蝦醬及馬六甲棕櫚糖撈勻，再加埋油炸鬼，酸酸鹹鹹，鹹香中又帶清甜，再食都依然驚喜 :) 。 鹹魚炒芽菜 $53 :) 鹹魚炒芽菜聽起嚟無乜特別，亮點在於啲怡保芽菜，之前試過一次，覺得相當有趣，所以，再點喺俾老友見識一下。芽菜粗大而短，爽口而飽滿多汁，加蝦乾及鹹魚蓉香炒，鹹香惹味中，添幾分清爽。 馬來巴東牛肉 $88 :) 上次嚟食就配飯，今次改配印度薄餅。雖然啲巴東牛肉賣相唔討好，不過，味道一流。以椰汁及多種香料燜煮嘅巴東牛肉，肉質柔滑，味道香濃，搵印度薄餅包住一件巴東牛肉，仲好食 ！ 海南雞飯 $108 :) :) :) 賣相精緻，同埋配搭對辦，一小碟海南鮮雞，加油飯，雞清雞湯及三色醬料（薑蓉、特製辣椒醬、黑醬油）。海南雞皮爽肉滑，蘸點三色醬都只不過喺錦上添花嘅動作；雞油飯亦油香而滿，飯粒分明，反而用黑醬油加埋啲飯度，又有另一番滋味 ； 檳城福建蝦麵 $88 :) 依個蝦麵，最有趣噝用上油麵拼米粉，所以，朋友見咁樣都覺得好奇。湯底濃郁鮮香，仲滲出陣陣香辣，配料仲有鮮蝦、豬肉，味道不俗。 檳城炒貴刁 $85 :) :) 嚟馬來一好幾次，都喺第一次食佢嘅檳城炒貴刁。貴刁炒得乾身均勻，加入怡保芽菜及鮮蝦，用料不賴，尤其蝦隻，新鮮爽口，不過，份量有點細！稍後喺甜品時間，但去到依度，朋友都覺得馬來一嘅星馬菜都好好食，所以，就連甜品都投其信心一票。 椰汁黑糯米 $28 :) 黑糯米煮得煙煙韌韌，口感十足，新鮮椰漿，椰子味香濃，而個黑糯米又唔太甜，水準穩定。 香蘭椰絲卷（3件） $28 :) :) :) 抵食嘅香蘭椰絲卷又喺另一真心推介，班蘭班戟皮捲上棕櫚糖炒過嘅新鮮椰絲，唔單翠綠嘅外觀搶眼，無論口感、味道都富南洋色彩，口感軟軟糯糯，班戟皮散發微微班蘭幽香，椰絲蜜香清甜。 檳城紅豆冰 $45 :) 刨冰加上玫瑰及沙士糖漿，再墊有紅豆、涼粉、椰果、粟米粒、亞答子，最後淋上花奶而成，幾得意嘅配搭，如果加多球雪糕，就要多俾$15喇。天熱食，特別爽快透心涼，沙士味喺細個嘅A貨可樂，有啲懷念；底下混雜嘅材料，口感紛陳，未必人人覺得好食，但試過你先有多份異國見識。 榴槤布甸 $38 :) :) :) 哈哈，唔好意思，又喺佢「榴槤布甸」，因為朋友中有人鍾意食榴槤，所以，私人推介俾佢。試過之後，老友話布甸質感滑溜，口感一流，榴槤味香濃突出，啖啖飄香，果然無介紹錯。最緊要喺老友食得開心，我就放心！唔覺唔覺，邊食邊傾幾粒鐘，實在美食容易讓時光渡過。雖然西環對幾位朋友確實有點遠，不過，佢哋異口同聲都話值得老遠過嚟一試。小弟都喺，馬來一，值得一試再試！…Read More

依晚半公半私嚟到馬來一食晚飯，其實身體有少少把恙，但自覺問題不太，況且一切已經約定晒，就無謂爽約，因為時下都市人個個都忙到不可開交，小弟份工算叫做hea，但都唔想再約嚟約去咁麻煩。之前已經嚟過兩次，所以收工由中環過嚟已經頗熟路，多條巴士路線駛到石塘咀街市落車再行前少少就到盛貿酒店。搭一程扶手電梯先上到酒店大堂，而再搭升降機上一樓就喺馬來一，不過小弟就鐘意晌大堂尾行樓梯上去，自覺太少做運動嘞，行吓樓梯幫補吓囉！今晚都幾早嚟，所以初初睇落唔多客，但越坐越多人，似乎馬來一越做越旺，不過由於地方闊落，裝潢走簡單閒適路線，枱與枱之間保持一定距離，所以，感覺份外悠閒，一啲都唔局促:)。加上斯文客多，唔會覺得太嘈雜，實在友聚、見客皆可。見到有幾款新菜同推介，當然要試吓啦，又加幾款之前食過嘅心水菜，咁就夠平穩嘞！沙嗲羊肉串燒（6串） $72:):)馬來一一向都有賣沙嗲串燒，新推出嘅喺沙嗲羊肉串燒，可惜是晚羊肉串燒沽清:(，只好退二求其次，點番上之嘅雞肉同牛肉串燒。3串雞、3串牛，伴以飯糕、青瓜、生洋蔥，很地道，當然「靈魂」馬來沙嗲唔少得，串燒焦香惹味，見大廚出嚟枱枱問意見，小弟梗多口問兩句，原來串燒喺用日本玻璃發熱管烤爐，特點喺溫度比普通烤爐高，出嚟嘅效果喺肉嫩有焦香，真喺想入廚房見識吓依部幾萬銀嘅烤爐。此外，沙嗲濃郁香甜，花生香特別重，一啖肉一啖青瓜洋蔥中和吓，不過啲飯糕我就麻麻。咖哩香葉炒茄子 $45:):)第一次嚟試菜就遇上依碟炒茄子，印象深刻，所以都「專燈」翻兜介紹俾朋友。今次再食，水準依然，茄子入口如豆腐，口感非常嫩滑，外層脆漿做得夠晒薄，而以香蒜、蔥粒、咖喱葉爆炒，甘香惹味，最有心思灑上大量炸蝦乾，添多幾分卜卜脆口感。鹹魚炒芽菜 $56新菜式之一，爽脆嘅本地芽菜，入口真喺多汁清爽，而搵鹹魚炒理應做到鹹鮮咩更突出，不過，鹹魚可能重手咗，個人覺得過鹹少少。另外，大廚話可惜啲怡保芽菜未返:(，否則仲特別喎，希望有機會見識一下怡保芽菜喺點樣！椰漿飯拼盤 $82:):):)椰漿飯又喺小弟另一心水推介，一份椰漿飯拼盤其實好豐富，配菜有炸雞、花生粒、炸江魚仔、青瓜及流心荷包蛋，仲伴有一小碟既香且辣自家製嘅參巴醬，而飯中滲出嘅椰香極之濃郁，食落啖啖椰香，兼且飯粒軟熟，撈埋花生粒同埋江魚仔，溝少少蛋漿，下啲參巴醬，有口感，有層次。用番上次對依個「碟頭飯」嘅總結，就喺飯香、料足、味好，點會唔再推介先得吖，不過，至緊要朋友都讚好食，仲話超讚喎，哈哈，總算無推介錯:)。檳城亞參喇沙 $82:):)食完個濃香嘅椰漿飯，嚟個酸香嘅喇沙就最好不過，檳城亞參喇沙都算喺依度幾多招牌嘅麵食之一。其實單睇碗喇沙個賣相都幾馬拉特色，碗面放有一堆新鮮菠蘿肉、青瓜絲、洋蔥絲、薄菏葉，不過最大亮點喺個湯頭，以細鮫魚拆肉嚟熬製個湯底，再加入亞參（一種熱帶果實：羅望子）及多種香料，鮮得嚟有種清爽嘅酸香:)，又帶點點辣，頗醒胃，配以滑嘟嘟嘅米線，真喺唔錯，最後就梗喺一滴湯都唔放過啦！馬來巴東牛肉 $88:):)甚少食印尼菜，所以對嚟自印尼嘅巴東牛肉比較陌生，不過晌馬來西亞同新加坡都好盛行依道菜。眼前「烏瘁瘁」嘅牛肉，肉質好腍好鬆化，望真啲原來喺牛展肉，以多種香料混合燜煮，所以感受到好複雜多變嘅香料味，令個辣味唔單一，又滲有濃郁椰奶香，牛展肉十分入味，所以食得人好滋味。依家馬來一有提供印度薄餅，由於啲醬汁比較杰身，所以個人覺得用薄餅嚟蘸醬汁較用嚟撈飯效果好啲。接近尾聲，又喺輪到甜品時間，榴槤布丁不知不覺成為必然正選，此外多咗兩款新嘢「清湯」、「刨冰」，因為前者可以喺熱食，所以揀咗佢，而喉嚨仲有啲咳，刨冰就留番有機會先再試；再加埋一直都未有晌度試過嘅咖央多士，就成為最後嘅甜品三劍俠。清湯 $32:)名字好普通，但材料好豐富嘅大馬糖水，亦喺新推出嘅產品。糖水底以桂圓肉煮，質地有啲似食西米露有少少杰身，而糖水內有蓮子、銀杏、洋薏米、蕃薯、大菜、珍珠西米、糖冬瓜、柿餅、胖大海，可以寫到咁細緻咪當喺鱔稿，只喺人哋個介紹牌有寫晒。凍食、熱食都得，口感挺潤，唔太甜，幾適合秋冬天食，雖然材料上幾有特色，不過咁嘅組合個人覺唔算太啱自己口味啫。題外話，胖大海喺乜？我都第一次聽，晌維基摷摷，原來喺種生長於越南、印度、馬來西亞等地嘅植物，曬乾用，好處有清熱潤肺，利咽解毒，潤腸通便，有利於肺熱聲啞，乾咳無痰，咽喉乾痛，頭痛目赤，都幾犀利咁喎，所以個「清湯」唔睇得都打得。榴槤布丁 $38:):):)以前因為依個甜品唔喺馬來西亞嘢，所以一路無放入餐牌，依家，卒之晌餐牌出現喇。以貓山王榴槤果肉打造，所以榴槤味極之濃郁喺必然，啖啖榴槤飄香，加入忌廉同魚膠份量恰到好處，所以布丁質感挺身而軟滑，值得食完再食。咖央多士 $22:):)之前兩次嚟都未有機會試，今勻點都要叫番一客。麵包烘得香脆，內裡所夾嘅咖央好香椰子味，細心嗒落又慢慢滲出幽幽嘅班蘭香，而且落咖央亦都好闊佬，極體又真喺幾好食。飽餐一頓，喺咪再計劃吓再去一轉大馬呢？實在有點懷念當地露天「大排檔」嘅美食！…Read More

不久之前（八月初），曾經在一篇文章中提及到，在下經常往返西環，除了提及到文中的兩個地方外，石塘咀過往也是在下經常必到的地方。今晚有幸地承蒙得到酒店公關的邀請，以及食友 G 先生的安排，令在下再次踏上石塘咀之路，來到馬來一菜館品嚐星馬菜，在此，在下亦要「老套」兼不厭其煩地感謝酒店公關 L 小姐及食友 G 先生。石塘咀曾經是煙花走地的地方，如今已經成為住宅區，將來也會有地鐵通車，甚至有酒店在這裡進駐，在這數十年的變化中也覺得有點唏噓，不過無論怎樣都好，在石塘咀的酒店裡吃一頓地道馬拉菜，在下也許未曾想到的呢！盛貿酒店是香格里拉酒店集團的旗下品牌，而馬來一前身是一間西餐廳，提供西餐及自助餐，而現在卻是變身為主打地道星馬菜為主的餐廳。進入餐廳的時候，餐廳頗大及寬敞，餐枱之間相隔亦非常開，令人不會感到狹窄，而且可以保寺一定的私隱度。餐牌內印有馬來西亞的地圖，而且有一段介紹餐廳的文字，當中又以「馬六甲」成為餐廳的英文名字。餐牌全以A4呎吋為主，封面以硬皮來做，內頁亦有圖文並茂介紹菜式，感覺上已經很有誠意及精美。柑桔特飲（二十三個大洋）先來一杯飲品。柑桔等飲是由馬來西亞獨有的桔仔調製，味道西酸酸的亦很重柑桔味道。鹹魚炒芽菜 Bean Sprouts with Salted Fish（五十六個大洋）芽菜形狀呈粗而短，並非慣常見到的芽菜，據說是由馬拉空運到港。芽菜先把醬油和熟油攪拌，直到混和了便可以進食。芽芽清甜爽口，質感與平常吃到差不多。沙爹雞肉／牛肉串燒（七十二個大洋）沙爹是馬拉的著名特色小食，雞肉及牛肉是經過馬拉傳統醬料稍微醃過，再加上餐廳特製的香滑而濃郁的花生醬料，使口感充滿了花生醬的香味，而且串燒部份也有燒燶位置，吃起來也倍感香口及惹味。而伴碟則有飯糕，青瓜和洋葱，前者口感不錯，做到有點糕點的味道，而後兩者也不錯呢！囉惹醬蔬果沙律（五十三個大洋）這道沙律十分特別，是馬拉最為地道特色及風味的沙律，材料包括蓮慕，番石榴，菠蘿，楊桃，青瓜及柚條，再配上特色槟檳城蝦醬攪拌攪勻，油條並不想像中那麼脆而油膩，反而感覺上是硬崩崩的，而且其他材料是又鹹又酸又甜，味道確實是很有趣的，而且是都是幾醒胃的頭盤。海南雞飯（一百零八個大洋）海南雞飯是一份十分對辦的菜式，有雞肉，油飯，湯及三色醬。海南雞雞肉非常嫰滑，而且脂肪比例較少，雞油飯油香而溢滿，飯粒分明。在下與 G 先生同業地以黑醬油撈飯，美味程度爆燈，真的很久沒吃醬油撈飯呢！馬來巴東牛肉（八十八個大洋）牛肉是以馬拉的特色鮮嫰牛肉，配以椰汁及多種香料混合燜煮，因此牛肉醃得相當入味，而且非常軟腍及鬆化，而且辛辣度非常足夠。吃下時也感到辛辣。而醬汁也非常濃稠，配飯不錯，但是今晚卻選用了烤薄餅，用以蘸上醬汁，感覺有十分惹味。尚有其他的美食，請留意下一篇相關文章。…Read More