YoLi (Closed)

真係好耐無係香港食過一間咁有韓國FEEL 既韓國餐廳，所以真係要寫一寫。話說上兩個星期同班friend gathering, 有朋友想食韓國野，於是就搵左梨滿園，近近地又唔太貴。一坐底已經上左六碟伴菜，同韓國果度D餐廳一樣，可以任添!對中意食泡菜既我來講真心幸福! 好入主題...(下文以SS級, S級 同 A級 標示推薦LEVEL)一班餓鬼一開斎緊係要叫肉!牛肋骨叫左醃既，醃得好入味﹐但又唔會太咸搶左牛肉既鮮味。(S級)特級紐西蘭羊架,無醃。侍應姐姐教我地要沾韓國麻油來食~ 果然，沾左麻油之後好食好多，本身唔中意食羊既我都食晒成件羊架(S級)韓式秘制豬手，熟食。侍應姐姐教要用生菜包住來食,好正!(S級)食韓國野一定要叫啤酒炸雞，但我地無叫啤酒, 叫左農酒同燒酒。炸雞比較普通,但果隻甜酸醬真心正，仲有原來食完要再食件泡蘿白,咁先解膩!!!(A級)之後8隻大胃王追加:人參雞湯，水準以上，未至於好有特色，但侍應姐姐幫手剪埋,加分!(A級)帶子非常新鮮，有D似火炙帶子加上韓式醬料，味道更有層次，食到帶子既鮮味同醬料既香味!(SS級)韓式牛肉八爪魚鍋味道雖然無一種食完嘩出來既感動﹐但勝在足料，牛肉同巨型八爪魚帶比我一份滿足感，食完加個辛拉面落去，個面吸左湯汁之後特別美味(S級)最後最後, 一定要講依個蛋包蝦，依個平凡既名字之下原來暗藏驚喜!!! 明明同炸蝦天婦羅一樣都係蛋同蝦但味道同口感都好唔同。依個一定要襯熱食，外皮蛋味很香,裡面既蝦好彈牙!蛋同蝦中間唔似天婦羅咁有空氣﹐所以咬落有種啖啖肉既感覺。(SS級)同埋我之所以覺得好有韓國FEEL 係因為D侍應會來問要唔要添伴菜，又會教我地D野點食最正! 其實咁先係一間對食物負責既餐廳。因為無論材料幾新鮮，廚師煮得幾好，但食客唔知點食法先係最好，就真係浪費食材又浪費廚師心機了!(SORRY, 有感而發)哈哈...8個大胃王食既野當然唔止咁少啦~ 寫寫下食評又肚餓添! 其他食物大家自己睇相啦!…查看更多

平時整日同朋友去食自助韓燒, 月尾大家出左糧, 決定去食好d,聽朋友介紹旺角梨滿園有韓燒之外, 仲有道地的韓國料理,一於同朋友們去食! 好才有訂位, 估五到平日夜都幾多人黎食!呢度環境都好乾淨整齊前菜仲有6款唔同的小食雖然我地今次主要食燒肉, 但見到隔離台果碟豬手好吸引,忍唔住點左!<秘制豬手跟生菜>份量十足, 大大一盤廚師好細心先將豬手起肉拆骨, 再切成一片片的,再灑上香香的芝麻, 望落賣相已經非常吸引豬皮口感juicy, 肉質幼嫩, 再沾上秘制, 令人回味! 5個女仔點左好多肉!!<特選牛肋骨(無醃)>兩大條無醃過的牛肋骨, 更保留左牛肉的鮮味，將原條放上爐煎好一面再反轉煎另一邊,肉質鮮嫩, 散發出濃濃的牛肉香味!<紅酒醃五花腩片>五花腩用紅酒醃過, 燒的時候散發出紅酒的香味,食果時反而味道冇禁濃烈,口感幾特別!<燒牛脷>廚師刀功唔錯, 牛脷切得薄身,燒大約30秒左右, 唔洗全熟透口感彈牙有韌,因為冇經過醃製, 更保留它的原汁原味!<帶子 /7粒>每一粒都大大粒, 脹卜卜新鮮彈牙, 五洗點任何醬汁都非常鮮味我最愛的海鮮之一!<鮮大蝦 / 四隻>一客有四隻, 整隻手掌禁大隻肉質彈牙, 啖啖肉! 最後朋友話一定要食呢度的<水冷麵>,我都係第一次食炸, 用料十足蕎麥麵配上醃白蘿蔔、青瓜、蛋等冰冰涼涼, 蕎麥麵口感彈牙,非常推介的美食!!如果唔係因為太飽, 仲想食埋炸雞同石頭鍋飯,我地決定下個月再黎食過!!!…查看更多

又來朝聖！大概梨滿園呢一間韓國餐廳我已經嚟過超過十次，最吸引我嘅地方係泥過咁多次水準依然，而且推出左好多唔同嘅菜式，唔單止有韓燒，仲有炸雞等等嘅嘢食！大家可以各有所好食多啲唔同品種嘅美食！開業一年幾嘅梨滿園由剛剛開業開始我已經來捧場啊，最欣賞嘅就係佢到現在燒肉燒烤同海鮮嘅水準依然係咁出色，唔會因為將貨就價！而每一次嚟食我都一定會點嘅就係無醃特選牛肋骨，帶子同埋牛脷！特選牛肋骨(無醃)＄168兩大條嘅價錢其實真係好抵，無業嘅牛肋骨更能夠突出牛肉的鮮味，只需要完條放響樓上邊煎好一面再反轉多一陣，好快呢個牛肋骨就已經燒好啦！肉質十分鮮嫩而且完全唔會銀鉤落去嘅時候感覺到牛肉嘅香味，其實乜嘢都唔加或者加一塊生菜一齊嚟食，已經食得出佢同其他韓國燒餐廳比較嘅優勝之處！厚薄剛好，而且口感軟身，正！燒牛脷係我另外一個食韓燒或者日燒必點嘅食物，梨滿園嘅燒牛脷呢切得薄身，而且冇醃製過嘅，只係需要喺路上面燒大概40秒左右其實已經熟透啦有落去唔會有韌嘅感覺而且富彈性口感好好！紅酒醃五花腩片今次總是咗個紅酒五花腩，其實呢我自己就對紅酒嘅感覺麻麻嘅，因為個味道有啲怪但係跟朋友話試吓新野，所以我就今次試吓啦！用過紅酒醃過之後呢燒出嚟嘅五花籃冇咗紅酒嗰種味道，返而帶點嘅特別香味，聞落去嘅紅酒未仲會有，但食落去呢就同普通五花籃分別幾大，味道更加有層次，而且口感都好好架！再來必點鮮帶子一客七粒，帶子超大隻，很豐滿啊！燒完都唔會縮水，依然都係咁豐滿，脹卜卜，食落去鮮味十足，而且十分之彈牙！頂級水準必點美食啊！還有鮮大蝦一客四隻，四隻大蝦已經佔咗成個爐，你就知道佢幾咁大隻，先燒好兩邊然之後再將佢企好微燒多一陣，全隻就會剛剛好地熟啊！香味十足，惹味非常！而且肉質彈牙，啖啖肉！水冷麵 每次來都會強烈推介呢個水冷麵冰涼舒適，口感彈牙，而且用料十足，配上酸蘿蔔李子等等更加清新！很高質素嘅水冷麵！份量亦都唔少四五個人分都絕對冇問題！今次因為係減肥狀態冇食到佢哋嘅炸雞同埋海鮮煎餅，呢度嘅炸雞同海鮮煎餅嘅水準都好高架！而且價格十分之抵，相比喺韓國街嗰邊食嘅話呢會平左一大截啊！梨滿園韓國料理 (旺角)旺角通菜街1A-1L號威達商業大廈Deli2 1樓…查看更多

新年前都各有各忙，卒之，趁新一年伊始，同幾位老友聚一聚，談談近況之餘，更暢談美食之事，是夜聚脚地就晌女人街內嘅梨滿園，少蒲旺角嘅友人覺得餐廳有少少難搵。店內以沉實嘅啡色為主系，配上石磚牆，再加上仿木窗嘅配襯，讓環境帶出點點傳統韓國色彩，平實簡約；然而，梳化椅選用紅色、黃色，令人覺得唔會過於死板，有種跳脫嘅活力。小弟是晚遲到，所以，一切食物都由友人們發辦，嚟到就有得食，唔使操心。然而，餐牌內除咗分門別類，更圖文並茂，非常清晰。類別方面，有烤肉（共6大版34樣選擇）、廚師精選、煎類、魚類、鍋類、湯類、麵類、飯類、配菜、飲品和酒類，單講食物，大大話話近百款，認真選擇多多。此外，午市特價餐、下午茶特價餐、以及二、四、六人嘅超值晚市套餐，都喺慳錢之選，就好似超值晚市套餐，為起嚟都喺百鬆啲蚊一個人，經濟實惠，好附合蒲開旺角嘅年青人清消費水平。晚上嚟到，如果本身唔好烤肉，但又想食韓國嘢，大可考慮佢哋嘅特價晚餐，配埋白飯、兩款配菜、例湯，最平$42就都有交易，抵到爛呀。前菜韓式嘅前菜小碟已經喺一餐韓菜不可或缺嘅部分。薯仔絲、豆角、白蘿蔔絲、大豆芽、南瓜同泡菜，各有特色，各領風騷，個人較喜歡粉綿嘅南瓜，以及爽脆嘅薯仔絲。濟洲島黑毛豬五花腩 $138 / 150g食友嘅極力推介，話佢油香十足，加上無醃過，所以有肉味。睇睇賣相，比想像中少脂肪，不過，烤熟後果真甘香油潤，但又唔覺話好肥膩，肉味濃之餘，口感充滿嚼勁 。想食得清新少少，可以夾生菜食，想惹味少少，又可以夾辣菜絲，悉隨後尊便。鮮帶子 $128是晚喺燒烤之夜，所以，再嚟喺燒吓鮮帶子，帶子既大粒，睇落都好新鮮，一客有8大隻。簡單鹽同黑椒調味，烤好即食，份外鮮甜，口感彈牙，以咁嘅質素，賣咁嘅價錢，實在抵食。順帶一提，店內嘅烤爐採用下抽風式，所以，煙霧唔大。鮮大蝦 $128 / 4隻越南虎蝦成隻手掌咁大，夠晒有睇頭，全部半開邊，方便易啲烤熟。啖啖蝦肉放入口，雖然唔喺話爽到彈起，但質感不俗，烤完之後唔會死死實實，又無話霉霉爛爛，蝦味都唔差；此外，蝦頭亦唔好嘥，店員話再燒耐少少，有唔少甘腴嘅蝦膏。百零蚊有成4大隻，另一抵食之選。水冷麵 $70食咁多烤肉，嚟一客凍涼嘅水冷麵會唔會覺得好爽呢？水冷麵嘅賣相頗精緻，麵條本身已經夠晒爽口，加埋酸酸爽爽嘅白蘿蔔片，「韓」氣透心，真喺涼快醒神。海藻湯 $68加多一客海藻湯，緩和一下太冷涼嘅感覺，諗落又喺咪好有趣呢！海藻湯以韓式瓦缽盛載，非常滾熱辣，而且份量不少，撈一撈，發覺湯料十足，有海藻、大蔥、細蜆及牛肉，湯頭挺清香而帶鮮味，比預期嘅好！雖然有好多真露、燒酌、啤酒……等等，不過，同枱老友對酒都無興趣，而其他啱心水嘅嘢飲都喺啲汽水，所以，就唔多講。梨滿園食物嘅質素比預期中好，但收費卻幾大眾化，真喺幾啱一大班後生仔嚟韓燒吓。…查看更多

一排無去食韓燒，所以上星期約食飯時就提議去梨滿園食晚飯.店內的裝修以簡約為主.坐下便奉上六款前菜，當中包括泡菜，四季豆，蘿蔔絲，芽菜，我最愛食的魚仔和菠菜.我地先點兩款牛，包括烤牛肉和特選牛肋骨(醃) .我自己鍾意燒醃左的材料，這樣燒完後，不用點任何醬汁已經夠味道.牛肋骨的肉夠腍身，牛味也算濃郁.烤牛肉同樣也醃好左，有點似一條條牛柳，可以以炒的方式整熟，好快就食得.牛肉同樣夠腍身，醃的咸度適中.食左兩款牛肉，我地另點了海鮮，包括鮮帶子和鮮大蝦.鮮帶子好雪白又夠大隻.入口夠鮮甜，燒完完全不覺得乾身，仲幾彈口.鮮大蝦, 一碟有四隻.一早已切成雙飛，不但較易燒和熟，食的時候也好方便, 一切就成條肉起.蝦肉爽口，又夠鮮味.最後，點了一個細的紅燜牛肋骨.這是用石鍋上檯.我自己鍾意食腍身的肉，而這個牛肋骨對於我來講有些咬口, 但味道不錯.鍋內的配料也不要錯過, 當中最鍾意食紅蘿白, 因為吸收晒牛肋骨和材料的精華, 非常甜口.…查看更多

已隔了乀段時間沒有食韓國菜, 近排連韓燒都少吃了, 難得友人相約, 一於應邀出席, 順便聚下舊。由於之前已來過同一大廈用膳, 所以不用又開着GPS找路, 輕鬆得多。一出升降機門已看到色彩繽紛的招牌, 還有多塊大型餐牌。甫進店內, 全店以啡色為主, 裝潢富傳統的韓國色彩, 簡樸平實, 並不花巧。餐店分了兩邊用餐區, 地方寬敞, 設有多數四人卡座, 亦有大型長枱, 大部分都是軟墊梳化椅, 坐得挺舒適。安坐後, 馬上商討點那些菜式, 其實套餐非常抵食, 但大家都對散點菜式各有心頭好, 那一於散點吧! 餐簿圖文並茂, 分門別類, 既清晰亦吸引, 分別有烤肉類、廚師精選、煎類、鍋類、魚類、湯類、麵類、飯類、配菜和飲品, 選擇眾多, 幸好大家各有喜好, 不用太傷腦筋。******************************點好菜後便馬上動筷品嚐六小碟前菜, 包括有醃白蘿蔔絲、南瓜、土豆絲、大豆芽、四季豆 和泡菜。款款各有特色, 味道不錯, 個人較喜愛帶微爽的土豆絲, 還有粉綿入味的南瓜, 而酸咪咪的醃白蘿蔔絲 亦很吸引, 絶對有助打開胃子迎接陸續而來的菜式。******************************各菜式陸續出場, 先是燒烤環節, 點了兩款海鮮。一碟四隻鮮大蝦 ($128/4隻), 隻隻巨大, 差不多有我手掌般長, 已預先在蝦背開雙飛, 易於燒烤及進食, 挺細心１ 肉質色澤亮麗, 蝦身比蝦頭易熟, 先品嚐, 雖鮮味一般, 但啖啖爽彈的蝦肉亦令人吃得滋味，而蝦頭亦藏有不少鮮香的蝦膏, 以$E6��定價來說挺不錯！******************************接着就是鮮帶子 ($128)一碟共有七粒, 粒粒潔白亮澤, 只灑上黑胡椒 作簡單的調味。待燒烤至兩面金黃便可品嚐, 肉質雖不夠爽彈, 但粒粒肉厚肥美, 而且挺鮮甜, 不用蘸上任何醬料更能吃出鮮味, 以此定價有如此質性, 的確抵食之選。******************************燒烤過後, 是時候一嚐店子的韓式料理。友人推介紅燜牛肋骨 ($ 98/細), 一於點客細試試。熱辣辣上枱, 一鍋共有兩大件牛肋骨, 還有數件紅蘿蔔 和白蘿蔔, 亦加入鮮香的蔥段 和爽甜的洋蔥 一同烹調。品嚐前, 店員會為客人把牛肋骨剪分小件, 方便進食, 服務不錯。牛肋骨 雖燜得不夠腍嫩, 但相當入味, 味道亦不錯, 而肉質夾雜不少煙煙韌韌的筋膜, 最討我歡喜, 還有燜得入味的蘿蔔, 嫩口多汁, 非常美味, 最好再來一碗白飯撈汁, 正! ******************************本打算叫一客鮮雜菜拼盤, 但擔心被我們烤至“乾憎憎”, 還是來一碟炒鮮菌雜菜($68)穩陣得多。嘩! 估不到如此大碟, 份量十足, 絕不欺場, 又一抵食之選。數數看, 所選用的款式亦不少, 瓜菜類有青瓜、翠玉瓜、黃芽白、紅蘿蔔、洋蔥, 而菇菌則有金菇 和雞脾菇, 烹調時間合宜, 全部皆保持爽嫩, 新鮮帶清甜, 而且並沒有泛油光, 只稍稍調味, 不油膩亦不重味, 挺清新健康, 很合我口味, 結果差不多由我一人包辦大半碟, 哈!******************************愛喝湯的我, 本打算點一客燴黑鱈魚辣湯, 可惜是日沒有鱈魚, 嗚嗚嗚……只好改要一客海藻湯 ($68)。熱辣辣上枱, 一鍋份量不少, 湯料亦十足, 再一抵食之選。先呷一口熱湯, 湯身清澈, 並沒有泛油光, 味道清新鮮味, 很順喉。舀起湯料, 內有不少爽口兼富獨有草青味的海藻、清新的大蔥、鮮嫩的小蜆, 還有多不勝數的牛肉, 部份連帶牛筋, 挺有咬口。整體而言, 也算不錯。------------------------------數數看, 用了不少 “抵食之選” 的字句, 事實並沒有用多, 再細閱各餐牌, 發現二至六人套餐($248-$688)亦相當抵食, 還有多款特價晚餐介乎$42-$88, 已包白飯、特式配菜兩款和例湯, 的確是抵食之選, 下次有機會再相約朋友來餐聚。…查看更多

又黎食韓燒啦~~~最近跟三五知己都好喜歡食韓燒!!!今次就揀左係旺角 Deli 2 既【梨滿園韓國料理】這裡裝潢係傳統韓式設計~~~入坐後侍應便端上韓式八小碟：白菜仔‧芽菜‧醃泡菜‧醃魚仔‧甜薯仔‧豆角‧南瓜‧醃白蘿蔔絲作為前菜款式及數量都蠻多呢!!!如果想 REFILL 的話就要加錢, 每款價錢不同呢''*首先點了蛋拌生牛肉絲 (HK$128)很多人都不夠膽吃生牛肉的, 當拌上生蛋, 梨絲, 芝麻及麻油；能帶出生牛肉的鮮甜味, 個人覺得還未及得上韓國正宗的好吃, 但也不錯了!!現在食韓菜必點既一定是韓式生醃醬油蟹 (HK$138)這裡的醬油蟹是用上大閘蟹再配上韓式醬汁來醃製~~肉質同樣是黏黏滑滑的, 但蟹膏不夠多, 味道少鹹且帶少少甜味!!!將蟹膏拌白飯一齊食真係好好味架''*女生對肉類不太好, 所以只揀選了兩款：特選醃製牛肋骨 (HK$168/350g) 及 濟州島黑毛豬五花腩 (HK$138/150g)醃製好的牛肋骨味道夠濃, 肉質嫩滑, 充分牛味；而黑毛豬五花腩肥瘦分明又不油膩, 係每次韓燒必點之選!!!海鮮也是不能錯過的選擇, 鮮帶子 (HK$128) 粒粒都好大粒~~加上黑胡椒作調味, 鮮嫩又肥美, 一啖放入口真係正!!鮮大蝦 (HK$128 / 4隻) 也很抵食, 每隻都有成隻手掌咁長架!!!肉質爽彈, 不用調味也吃得出其鮮味喔~~而這個秘製豬手 (HK$238) 是店員推薦的菜式''*一碟的份量非常多, 豬手切成細細件咁方便進食；豬手皮, 脂肪跟肉的分佈很平衡, 食落肉質軟腍, 豬皮很爽彈!!!同時會配有生菜及醬料~~用生菜包起豬手一啖食落去, 多了一份咀嚼感!!!而且沒有油膩的感覺, 果然是好的推介''*最後就來個海鮮牛肉八爪魚鍋 (HK$268) 作結~~紅紅的湯底不算太辣, 入面有豆腐, 泡菜, 牛肉, 八爪魚, 蔬菜等材料, 非常豐富!!!飲返個湯暖一暖胃, 即刻飽哂''*…查看更多

話說我年尾應該會去韓國但我都仲未食過醬油蟹咁我去到韓國點對比呢?所以我的朋友就帶我去嘗試一下佢覺得好味的店【梨滿園韓國料理】先來6小碟, 南瓜同泡菜個款我最喜歡其他都只係一般般啦～首先我一定要介紹我最期待的醬油蟹第1啖入口～～甜甜地既、唔腥架！！生蟹既肉原來係唔算好癡殼食食下就會有點辣味，不過是普通食到微辣的人可以接受到的所以對我來說是有點辣味，但我完全可以當無辣來食～朋友亦教授蟹蓋撈飯真係不得了的好味，飯好似將蟹既鮮甜、蟹膏的味道提升了！！大家order醬油蟹一定要叫個飯真的令蟹蓋更加好味！！！生牛肉：軟稔的牛柳條用上秘制醬油醃上拌以配料，有雪梨、青瓜、紅椒及生蛋攪拌後一啖放入口，清爽既配料消去了牛肉多餘的油膩感亦提升左牛肉既鮮味！！原來生牛肉係解甜既味道架～呢間店更有好多韓燒食品大部分肉類都唔錯架，尤其係醃左既牛肋骨而韓燒唔少得既就係緊用生菜及配菜包著肉類食啦～可以減輕油膩感，而且總係覺得食點菜之後，就個肚就可以繼續食燒肉！！！鮮大蝦：上台時只用簡單既調味，足以證明新鮮啦～職員教授燒蝦技巧：燒好一邊先好反轉另一邊燒燒至外殼有少少焦香，真係陣陣大蝦既味道！！咬落去啖啖肉，好滿足～蝦肉爽口彈牙，好新鮮既感覺。鮮帶子：原隻帶子只用海鹽和黑胡椒調味，帶出海水味。而最重要係當天有位好友燒烤得很好令咬下去時仍然JUICY美味！！…查看更多

幾個月前在尖沙咀去了一間叫梨x園的餐廳，價錢貴都沒所謂，但food court都不如的水準，叫人難以接受。與媽媽朋友聚會，有人說去旺角吃韓燒，餐廳環境好，有足夠的空間放BB車，叫梨滿園⋯我心裡涼了一截，還要在女人街⋯我只記得這裡的廉價放題⋯我與蝦米腸坐巴士來到旺角，在女人街中找尋Deli2…忽然看到一個很光鮮的門面，入邊是升降機，最裡面還有一間甜品店。原來Deli2才開了幾個月，這裡一共有7間食店！梨滿園是在一樓，卡位很闊落，坐得很舒服呢。看餐牌才知道不是任食那種…梨滿園是正式的韓國餐廳，韓式燒肉、醬油蟹、人參雞湯、水冷麵等等都有，我心裡暗自興奮（笑）。店員立即送上六小碟。先來的是韓式生醃醬油蟹（$138），我極為喜歡的生醃蟹。醬油蟹的蟹膏澎湃，味道也好。美中不足的是毛蟹比較細隻。蛋拌生牛肉絲（$128）是我的必點item，想不到梨滿園的生牛肉比佐敦、尖沙咀的老牌韓國餐廳的還要出色。牛肉絲上檯時的凍的，但絕不是冰的，再加上蛋黃、梨絲和生蒜，順滑微甜的生牛肉超好吃啊！燒肉出場了！打頭陣的是烤牛脷（$88）、特選牛肋骨（無醃，$168）和濟洲島黑毛豬五花腩（無醃，$138）。光看樣子就知道是無得輸的，高級的肉類，就算不調味都非常可口。用了紙墊著來燒，可以吸油，而且感覺沒有那麼熱氣。友人的燒烤技術更是錦上添花。鄰座的朋友把鮮大蝦（4隻，$128）燒到體無完膚，原來吃韓燒也是技術活（笑）。香煎辣泡菜餅（$78）的厚薄適中，香脆煙韌，帶泡菜的酸辣，我很喜歡，我吃了超過半個…可能大家都沒有我大食…（汗）之前去尖沙咀的梨x園，人參雞比Food Count的還要差，就算當普通雞湯喝我也嫌味道太淡…梨滿園的高麗人參雞湯（大，$160）卻很足料，湯內的人參鬚還有甘味。雞肚內當然還有糯米和紅棗等。繼續燒肉，無骨背肩肉（$168）的紋理很漂亮，辣汁五花腩肉（$78）很惹味，不過只是微辣。最特別的是烤豬皮（$68），朋友說要用生菜蓋著來烤，否則會彈油。烤豬皮非常chewy，應該充滿骨膠原。順帶一提，梨滿園的飲品才$10至$14，以餐廳來說非常便宜。梨滿園的水準之高，令我對女人街的食肆改觀。…查看更多