Dragon Inn Seafood Restaurant

到三聖村欣賞黃昏夕陽的景色，吹吹海風，再到海鮮檔即場揀選海鮮，練習議價能力，然後5分鐘車程再到附近有免費車位的容龍海鮮酒家來個海鮮餐，過一個滿足寫意的晚上。海鮮做法很多，視乎個人口味，建議考慮菜式有辣酒煮花螺、蒜蓉粉絲蒸扇貝、黑胡椒蟹、豉椒炒蜆、豉椒蟶子煎米粉底，如果海鮮檔有送湯料可以來個豆腐海鮮湯，而芝士焗龍蝦、煙鯧魚、燒鴨和砵酒焗牛柳等經典菜也是必叫之選，如果不怕肚太撐，不妨試試這裡的椰皇燉奶，作為飯後甜品來個大滿足！…Read More

三聖食海鮮首選容龍，試過幾間海鮮加工餐廳，都是容龍質素最為穩定，座位較為闊落寬敞，不過價錢相對就較貴一點點，建議可以午市去吃，加工費比晚市稍便宜。由於常光顧，容龍在屯門區來說，飲茶的點心屬於較高質素。例如腸粉、燒賣、蝦餃、叉燒餐包、鮑汁鳳爪等等，的確做得不錯！皮薄、料足！推薦👍🏻至於海鮮加工方面，推薦豉椒炒蟶子王，豉椒味道香濃，惹味，蟶子皇不會炒得過熟，爽口。第二是辣酒煮花螺，建議不能吃辣的，可以點小辣，因為會越煮越辣，酒香撲鼻，而且花螺很入味，建議可以買海鮮時買較大的東風螺，味道更佳！之後還可以點麵一起煮，麵條吸收了湯底的精華，更加好吃！第三是豉油王大蝦。緊記買蝦嘅時候要買大隻一點，大蝦走過油，外皮香脆可口，沾上豉油汁，連蝦肉都能吸收到豉油汁，非常惹味！第四是芝士焗龍蝦。這可算是他們家的招牌菜，芝士焗得相當香脆，龍蝦仍能保持鮮味，不過如果不喜歡吃太濃的芝士味，可能這道菜就不太適合了～不過都值得一試！第五是清蒸魚。通常買東星班，徵宇不會過火，而且豉油汁條配搭不會過鹹，非常鮮甜，魚上鋪上滿滿的蔥花，很好吃👍🏻還有砵酒焗蠔、奄仔蟹蒸糯米飯、海龍王湯等等，都可以一試。最後少不免吃他們家的椰皇燉蛋白，畫上完滿的句號。…Read More

繼2014、2015連續兩年一班死佬入到屯門三聖村「興記」大擦海鮮，接續依個傳統，2016再豪多一餐 。本來想試吓其他區域嘅海鮮酒家，但大佬話要三戰三「勝」全取九分，所以就三戰三「聖」。不過，嚴格嚟講，今次唔算完全喺「三聖」之戰，因為，改改策略，先去有香港築地之稱嘅荃灣楊屋道街市買海鮮 ，再入三聖村斜對面山丘之上嘅「容龍海鮮酒家」，依間嘢都喺有死佬試過嘅推介。未講酒家，就直擊吓晌楊屋道街市嘅實況，街市樓高四層，地下全層主打賣海鮮，所以幾十檔，人頭湧湧 。而且，叫得香港築地，檔口多之餘，價錢比晌三聖真喺平平平一大截。好似啲美國桶蠔，對比舊年食評嘅資料，三聖賣$160（大桶），楊屋道賣$85（大桶），質素一啲都唔差；東星斑晌楊屋道斷條賣，條條兩斤幾，一條先$350，但三聖要$380一斤喎 。不過，瀨尿蝦最後都返去三聖買，因為行勻個街市都喺細隻咗啲，唔夠睇頭，但三聖買真喺好貴。順便介紹吓楊屋道街市嘅「陳女東記」海鮮（兜到我都唔記得佢個位置，大概正中間），睇勻咁多間，依間海鮮鋪真喺選擇多多，平價 、貴價都有，覺得取價公道，而且，啲店員好好相與，又唔介意我哋影吓相，最鍾意喺佢哋明碼實價標晒價錢嘛 ；有位疑似店主，唔知會唔會就喺「陳女」，好識做生意，樣樣平多十蚊八蚊，所以，原先只賣三幾樣嘢，依家就執咗7樣海鮮 。結果，走訪兩地，一共買咗11款海鮮，夾埋$3,310，價目大概如下：加拿大象拔蚌（$480條）$460 - 楊屋道陳女東記大花蟹（$220斤）一隻$470 - 楊屋道陳女東記肉蟹（$140斤）兩隻$270 - 楊屋道陳女東記大蝦（$56斤）兩斤$110 - 楊屋道陳女東記蟶子（$56斤）22隻$170 - 楊屋道陳女東記花螺（$64斤）兩斤$120 - 楊屋道陳女東記桶蠔（$85大桶）兩桶$160 - 楊屋道陳女東記東星斑（$350條）$350 - 楊屋道其他街市檔帶子（$30份）$90 - 楊屋道其他街市檔瀨尿蝦（$280斤）11隻$840 - 三聖關財記南非6頭鮑魚（？斤）11隻$450 - 三聖關財記比起上次單晌三聖買海鮮料（9款海鮮，共23斤，$5,180），今次款、量都多過上次，但足足平咗一大截 。「容龍」有啲60、70年代嘅風貌，門口位整個噴泉，最搞嘢地下入口仲有個牌匾叫「容龍別墅」，至於大堂環境，就肯定好過三聖村冬菇亭嗰堆酒家啦，更曾獲米芝蓮推介食府銜頭，羊毛出自羊身上，自不然樣樣收費都貴人一截啦。晌興記代煮海鮮，唔鬼理你點煮法，總之油料費斷斤計，舊年5月嚟嘅油料費喺$58斤；但晌容龍就複雜咯 ，有斷斤計（$96斤），有斷隻計（如貴妃蚌、鮮帶子，$18隻，隨時油料費貴過啲食材），亦有斷桶計（如美國桶蠔，大嘅$130，細嘅$70），仲有其他計法，總之，埋單時你都未必睇得佢明 :( 。當然，唔賣海鮮嚟代煮，佢哋一樣有好多海鮮菜式，不過，收費就唔便宜啦，但食海鮮就預咗喺高消費。除海鮮外，我哋亦額外再點半隻燒鵝過過口癮，再加3碟時蔬均衡吓餐飯。 加拿大象拔蚌刺身+堂灼 其實，條象拔蚌本身晌陳女東記買嗰時，已幫我哋起埋肉做刺身，不過，嚟到容龍佢都講到明都照收油料費，至多再洗乾淨啲，加啲芫茜、椒絲擺靚啲，加個上湯做堂灼。咪睇陳女東記喺街市檔，人哋日日切嘢無數，功多藝熟，佢哋切嘅象拔蚌刺身比舊年晌興記做得仲好，厚薄平均，而已，大細均一，入口爽脆，沾少少豉油，鮮味盡出。亦試過灼一灼嘅效果，灼過嘅象拔蚌，口感會變得軟腍啲。 自家製掛爐燒鵝 $230 / 半隻 依度食燒鵝唔使預訂，想食就點，較方便。雖然唔覺聽聞佢啲燒鵝特別出名，但高質素，皮脆肉香，富鵝油嘅脂香，卻喺無羶味。 白灼大蝦 灼蝦就喺為食其鮮味，容龍就當佢喺中蝦，但我就覺得喺大蝦嘅尺寸，入口夠肉地，鮮甜爽口，沾丁點豉油提鮮，一流。兩斤大蝦兩食，一斤白灼，一斤豉油皇炒，兩碟都好夠份量，陳女真記真喺好足秤。 豉油皇原隻乾煎大蝦 食個白灼大蝦已品嚐到蝦嘅質素有幾鮮，再嚟豉油皇煎，鹹鮮惹味，蝦肉保持彈牙，實在好食。只喺食咗幾道菜，就發覺越食越熱，跟住就越嚟越焗，原來全個大堂壞冷氣（得番啲VIP房有冷氣），真喺大鑊。結果食完餐飯都解決唔到，亦從無人嚟解釋個情況，更無人嚟講講補救方案 ，得啲侍應不時拎啲冰俾我哋，我哋亦只有灌多兩啖汽水解「暑」。尤其依家咁嘅天氣，搞到各大佬食到標汗，唔喺講笑，食到衫都濕晒，對面枱位哥仔除剩件底衫，認真街坊 。所以，服務一環唔合格，唔喺因為你哋壞冷氣，我都知事出突然，而喺處理手法，完全無理會食客嘅實況，就連任何補償方案都無提出過，搏啲食客唔出聲當無回事，所以，見有好幾枱食客都「嗱嗱臨」打包埋少少餸尾走。 蛋白花彫蒸大花蟹 因為都喺啱啱開始無冷氣，所以，都唔影響食呢個蒸大花蟹嘅食味。以上幾道菜都做得出色，而依道蛋白花彫蒸一樣精彩，蛋白滑溜無比，淡淡花彫酒香，香得嚟唔會太嗆，至於隻花蟹，多謝各位大佬讓隻鉗俾小弟食，鮮甜多肉，正到爆。 豉椒炒蟶子、蒜蓉粉絲蒸蟶子 晌陳女真記見到啲「肥仔」蟶子好抵買，以前又未試過，人頭數執夠22隻，諗住兩食：豉椒炒及蒜蓉粉絲蒸，點知店家搞錯晒，全部拎去豉椒炒，加個米粉底，唔怪之得炒到咁大碟。味道唔錯，好惹味，配米粉都好正，不過，蟶子口感有少少韌。 薑蔥煀桶蠔 桶蠔嘅水準唔錯，夠大隻，再者，煮熟後亦唔喺點縮水，仲喺大大件。以薑蔥煀，香氣十足，蔥香配蠔，真喺不俗。 清蒸東星斑條星斑夠晒份量，大家都覺得好抵食，不過，咁大條的確好蝦人煮，結果，條魚蒸過籠，近骨位啲魚肉好實好嚡，其他位都幾好，魚鮮味十足。 果皮蒸南非鮑魚 碟鮑魚蒸得有啲迤，鮑魚本身喺有質素，大隻有睇頭，既有鮑味，又煙韌啜刀，可惜果皮味淡薄無痕，似有還無，比興記煮得無咁好。 星洲黑胡椒炒肉蟹 室溫越嚟越高，再嚟一道黑胡椒蟹，真喺氣熱逼人。兩大隻肉蟹炒出一大碟，啲黑胡椒極為入味，但又嚐到肉蟹嘅鮮，隻蟹又好好肉，好味指數喺啜晒手指。 椒鹽瀨尿蝦 瀨尿蝦指定椒鹽油泡，喺我哋一班死佬嘅指定菜式，不過，計埋油料費，依碟嘢要過千，但至緊要喺做得好食，咁先值番晒。細心拆殼後至慢慢嘆，蝦肉鮮甜，椒鹽味足，無令大家失望。 XO醬西芹炒帶子 唯一一碟有得睇，無得食嘅菜式，皆因晌街市檔買一份份嘅帶子，煮出嚟好腥，果然貪平瀨嘢，故此成碟無要，不過嘥晒啲油料錢。由於油料錢斷隻計，實情貴過啲鮮帶子。 椒鹽象拔蚌膽 雖然我哋一班死佬年紀有番咁上下，稱得上百病叢生啦，但無懼膽固醇依家嘢，象拔蚌個膽梗喺食得唔好嘥啦，揀椒鹽一於唔健康到底。惹味就惹味，挑剔少少就喺粉漿整得有少少厚。 椒絲腐乳炒通菜 $78 話唔健康到底，都要食番多少少菜，喺度食海鮮固然之貴，但啲炒菜又唔算貴喎，碟頭亦夠大，個通菜炒得頗香。 北菇扒芥菜膽 $98 大花菇用上大隻靚貨，菇香厚肉，但一碟得5隻，手快有手慢無，我就梗喺唔執輸啦！ 大澳唐生菜煲 $88 幾碟炒菜都炒得上乘，但個人偏愛少少個唐生菜煲，因為以大澳蝦糕炒，鹹香突出，生菜仲帶少少脆身。 辣酒煮花螺都唔知喺咪廚房大佬玩嘢，已經無冷氣成個幾鐘㗎啦，個大堂夠焗夠晒高溫，臨尾先出依道辣酒煮花螺，驚辣你唔死。小弟就無心情食喇，嗜辣嘅老友反而食得津津有味，又話啲螺肉夠厚身，不得不佩服佢咁嘅環境都仲到咁辣，睇見窩嘢我都已經標汗咯！ 生果碟臨尾送碟西瓜都無補於事，除咗打邊爐會邊食邊灌汽水外，今餐飯都可以講絕無僅有一晚灌幾罐汽水。講笑咁講，有少少回復惜日大熱天時坐大牌檔嘅感覺 ！以前讀中學後生嘅年代，炎夏中午踢波都無問題，今時就梗喺唔同往日，熱死辣辣兩個幾鐘食餐飯真喺有啲受罪。買咁多靚海鮮嚟，點知食得咁無癮 ，上次年初嘅死佬蛇宴酒樓發生好多「蝦碌」嘢，個經理醒目識補鑊先令各大佬無咁多怨氣，今勻容龍咁大鑊幾個經理都可以當無事發生咁，危機處理喺零 。…Read More

想吃海鮮，諗起佢哋。先去三聖街，習慣行埋去關財記，二個人吃，揀咗四樣嘢，一共520蚊。上到去，將海鮮交俾Waiter，開咗位，Waiter問點整，又係例牌食法，有三樣係必吃嘅︰1) 辣酒煮花螺︰用爐滾住，一滾起，啲酒嘅香氣已經撲埋嚟，辣味啱啱好，我唔吃得辣嘅，都唔會食唔到，啲螺係自己揀嘅，梗係新鮮、鮮味喇﹗2) 開邊芝士焗龍蝦︰同濕煮撈伊麵食果種唔同，我反而鍾意呢個食法，芝士鋪响龍蝦上面，焗到香噴噴，兩種味道出奇咁夾，Good﹗3) 砵酒焗桶蠔︰呢個又係經典，次次食都覺得冇得彈，一切開塊錫紙，淨係聞就已經流哂口水，隻蠔肥嘟嘟，外脆內軟，又Juicy，响其他地方吃唔番呢種感覺﹗最後條魚，唔駛問都係清蒸︰條魚叫花英，係魚檔伙記介紹嘅，十零兩重，火路蒸得啱啱好，好滑，冇介紹錯﹗吃飽，有紅荳沙、生果送，找數300蚊，食得開心滿足，覺得合理。(註︰招呼一般，可能唔係常客)…Read More

一星期前已預訂枱了，13 位成人吃了捧腹的一頓生日飯自購海鮮 x 7 辣酒煮花螺 :( 不夠辣但滾住食好好 豉椒炒聖子皇 個個話正 大海斑兩食 :) 炒球清唔太油膩 炆頭腩又香又好脆 椒鹽賴尿蝦 材料問題，太厚肉 海龍皇湯 甜但唔夠奶白色 鹽焗蠏 :) ok，可以再香啲就好 灼墨魚 :( 老咗少少 上湯龍蝦伊麵 正 清菜 X 2 啤酒最貴 細樽裝 Bluexxxx 要 $24，但都飲咗兩打汽水 x 2送果盆糖水埋單 $3000 未計海鮮…Read More