Sariel's Restaurant (Moved)

今晚朋友帶來我來到一間像家庭式的冰室。這間冰室座落在商場旁，是一些村屋的地下，有駕車的話，應該可以免費停在門外！餐廳帶有一點點的懷舊味道，最特別的是連餐牌也是手寫的！這裡有很多不同的晚餐選擇，所有的主菜也是套餐形式，包了餐湯、飲品和甜品。我選了德國咸豬手配黑椒汁鐵板餐（＄118）。先來了羅宋餐湯和餐包。餐湯熱而且酸味適中，偏向蕃茄味多一點，是我的喜好呢！很欣賞裡面既材料好足！有胡蘿蔔、蕃茄、 西芹、 椰菜、洋蔥、馬鈴薯，一應俱全！餐包也是微暖的，個底有少少脆，成個包好鬆軟好味。到了主角--鐵板豬手！估唔到佢個份量比我想像中多！侍應在面前替我們淋汁(我選了黑椒汁)，喳一聲，很有鑊氣呢！香味四溢，令人垂涎，我唔客氣啦！初初以為豬手會難切D，點知佢外脆內軟，好易切！肥瘦均勻，豬手亦很入味，非常好吃！眼見身旁既食客，都有叫鐵板餐，我估應該係呢度幾出名的！果然有質素！當然少不了要飲杯透心涼既野飲啦！我點了一杯雜果賓治 （跟餐加＄10，好抵）。你睇，D雜果都有返咁上下份量架！正！甜品方面，可在涼粉和啫喱選其一。我選了後者。侍應仲會問你加唔加花奶添！雖然是免費跟餐，但啫喱味道濃郁，彈下彈下，不會夾雜過多的水溝稀。支羹仲好得意，係心型黎架！好好味，食到好滿足！我返到屋企，念念不忘佢個豬手，世外桃源的美食，不用加一，有齊餐湯、餐包、主食、甜品、飲品！的確性價比超高！題外話，最近流行夾公仔機！餐廳外面竟然有得玩！技癢可以一展身手呢！…Read More

呢一間懷舊冰室位於一座村屋地鋪，環境暗淡，配上o個個年代d 格仔檯布同連燈吊扇，帶住舊式扒房醉人o既情調。聽d 侍應相互之間o既談話，我估可能呢間餐廳係家族式經營都唔出奇。main menu 有正式鐵板餐，o個d 有美國CAB 或者prime 認證當然高級d，但晚餐menu 一樣有較平而唔錯o既選擇，而且一樣有晒湯、包、甜品等等各樣o野。店員推介之下，我點o左一個安格斯板健牛扒晚餐($108)，羅宋湯用呢隻鮮明色彩o既瓦兜裝住，貫徹番餐廳懷舊o既氛圍，麵包籃上o既蒜蓉包亦比想像中大塊。主角板腱牛扒，店員介紹o既時候話係屬於背部o既位置。雖然以我叫三成熟o黎講佢算係熟o左少少，但味道依然十分好。上檯有兩塊扒，一塊連住筋腱一塊連住肥膏，可以試到兩個不同口感。我覺得佢調味o個度尤其出色，以鹽粒同黑椒簡單醃製，更能帶出肉味。切一舊連埋肥膏o既牛肉出o黎，擺入口，齒頰流香。留番少少肉，將個跟餐意粉撈埋d 蒜蓉汁，又是一個新o既菜式。一場o黎到間咁vintage o既冰室，點可以淨係叫咖啡奶茶咁普通？加$10 可以配雜果賓治或者紅豆冰呢d 特飲，但係呢d 都算常見，反而黑牛、紅牛呢d 就真係幾少機會試到，所以加o左$15 試o左一杯金牛。金牛即係芒果雪糕加忌廉汽水，之前只係o係其他地方試過黑牛，原來金牛係咁好飲，芒果雪糕同忌廉汽水兩樣o野超夾，一試難忘……！跟餐仲有一個甜品，可以揀雪米糍或者啫喱，咁頭先食o左雪糕，所以揀啫喱。啫喱仔淋上花奶，連同頭先杯金牛，都充滿舊日特色，為呢餐加o左好多分！…Read More

今晚去左屯門山景村揾個朋友傾計，她帶左我去一間隱世茶座食晚飯，原來在山景村附近的揚小坑村。茶座佔地只是村屋的地下，內裡約可以坐30人，地方雖然不算大，但座位空間不會太迫近，內裡裝潢帶些少歐陸feel，有種遠離繁囂感覺，予人放鬆和放慢腳步在此慢慢享受用餐。其實餐廳外面亦有雅座，但天氣太熱，店長也不建議我們坐外面。晚餐有三款，價錢由 $52 - $68 不等，還送餐湯，蒜蓉包，甜品和熱飲，凍飲加3元，非常抵食。我點了 (A) 夏威夷煙鴨胸大蝦意粉 $68 - 賣相都幾大碟，大蝦都大隻，還特意介開放在意粉上。大蝦肉質夠實，唔係又梅又腍，因為是雪藏蝦，所以欠缺鮮蝦味，意粉軟硬道適中和味道唔會偏鹹或偏淡，如果加牛油再炒一炒就更加滑和香口。至於煙鴨胸都有3-4片，邊位有煎過，唔油，鴨胸有薰煙過味道，肉質腍，味道略帶點鹹但也易入口。還有椰菜紅蘿蔔，菠蘿，車厘茄伴碟。唯車厘茄如果可以切半加熱和除蒂就更加方便食客慢用。朋友點了 (B) 燒汁雞肶飯 - 雞肶好大隻，雞皮炸得香脆，顏色均勻，不會太濃太深色，內裡雞肉夠滑，又有肉汁，味道適中。飯粒夠軟熟，不會太硬或太腍，撈埋燒汁惹味又入味，味道不會太鹹，還有椰菜伴碟，夠晒健康。餐湯有羅宋湯或忌廉湯可供選擇，我們揀了羅宋湯，湯內有蔬菜肉類，有肉香味，而且酸酸甜甜中帶點辣，夠晒惹味。餐包係蒜蓉包，原來係焗蒜蓉脆豬，雖然等左比較耐，但覺得值，因為係即叫即焗，好香蒜蓉味，又香脆，又夠熱，放耐左都仲好脆，正。是日甜品係涼粉，好耐冇食過。可惜唔夠凍，花奶少左啲，唔算太甜。原來甜品要通知店員才會上檯的。我們見隔離檯杯凍飲好大杯，覺得加$3都抵晒啦～我們要了少甜少冰，茶味夠，檸檬片都幾多，果然少甜少冰，唔會左耳入右耳出。…Read More

今日喺個住山景邨既老友介紹之下試吓呢間金莎冰室燒烤茶座，佢話食左大快活同老麥咁多年，喺屋企附近卒之有間以樣既餐廳，仲話呢度經已成為佢同屋企人既飯堂添！餐廳以茶座為名，當然有啲 so relaxing 既室外座位啦，如果唔係呢輪成三十五度，真係好想坐出面 relax 吓。好鍾意餐廳嘅餐牌，好有細個做 project 嘅感覺，好親切。餐湯揀咗羅宋湯，酸酸甜甜又有少少辣味，湯料方面夠哂足料，湯有淡淡嘅肉味，唔錯。跟餐嘅蒜蓉多士抵食夾大件之餘上面仲滿佈蒜蓉，勁香勁好味。澳洲西冷牛扒餐，塊牛扒一上枱一淋上醬汁嘅時候香味撲鼻，份量方面亦都夠曬大塊，特別鍾意佢嘅配菜，薯角炸得香脆唔在講，當中有塊厚切嘅蕃茄啱啱好能夠中和牛扒嘅肉感，而個蒜蓉汁同個牛扒亦都配合得非常之好，唔會話淨係食到個蒜蓉味，喺我哋食緊春雞嗰陣，只係晚上嘅七點十二分，已經聽到廚房大嗌西冷牛扒淨一，喺七點幾已經賣曬可想而知受歡迎嘅程度。燒春雞外皮燒得勁脆，春雞皮下脂肪唔算豐富，咁就啱曬怕肥嘅少女啦。脆脆嘅外皮加埋面頭嘅香草，食雞唔食皮係一種罪，春雞揀咗黑椒汁，個人覺得蒜蓉汁好食啲。我哋走嘅時候室內已經坐爆咗，有部分食客要坐喺室外嘅座位之餘仲有人等緊位添，想食好野既朋友記得早啲到啊。…Read More