昨晚師傅離開監房時已經不太早, 但少少野都未放過落肚, 真係餓到有少少頭暈加腳軟, 所以在車上不斷地諗有咩野好食同有咩野想食, 腦海裡確實浮現很多美食, 但喺嗰一刻竟然冇一間想去, 咁點算好呢? 於是落左車唯有沿住條街上四圍蕩, 睇下有咩新發現! 終於經過呢間食店, 師傅見都新開左一段日子, 加上食家們都對有幾好評價, 原先師傅想搵多幾個人先一齊試, 但最後還是選擇單刀赴會! 入到去食店一眼見晒, 地方唔算大, 而食客甚少, 可能都幾晏, 所以比較少人; 一坐底師傅都未來得切睇下有咩食, 個伙計就行左埋黎問師傅“飲咩茶?” 師傅當場唔識反應, 於是亦回應一句有咩茶? 幸好伙計唔係答師傅奶茶, 檸檬茶之類, 而係話平時酒樓嗰d, 於是乎師傅就柯打左香片!開完茶當然第一時間睇下有咩想食啦, 點知樣樣都好似幾吸引喎, 但一個入又食得唔多, 點算好呢? 最後都係唔理咁多, 叫左先算! 於是師傅一口氣就柯打左酸辣湯, 小籠包, 紅油抄手同埋五香牛肉麵四款食物! 呢d咁嘅份量同兩個人都差無幾, 食落完單, 當然要品一品茶啦, 話晒師傅去左咁多年上海小店都未試過要開茶(大酒樓唔計), 講真茶真係唔多識品, 你叫師傅品酒好過; 但點都仲識得講好唔好飲, 呢壺茶呢真係一般, 茶葉淡淡冇味的, 香片香都唔香下, 咁點叫香片呢? 同辣椒辣都唔辣下有咩分別呢? 飲完杯淡口嘅茶, 其實反而飽左, 死未? 好快酸辣湯率先登場, 一放低師傅覺得賣相一般, 湯面浮出厚厚嘅油, 未見其利先見其弊, 扣分; 於是攞隻匙攪下, 撈勻之後方開始進食, 酸辣湯入口唔酸, 辣味就有少少, 味道不算太濃, 而料亦頗足, 有豆腐乾, 肉絲,木耳等, 都算幾爽口, 口感不錯, 如果可以再酸少少同辣少少就會更為惹味, 作為打頭陣嘅第一選擇亦算合格, 飲完碗酸辣湯後亦再次撩起師傅嘅食慾, 不錯!接住落黎係小籠包, 小籠包一客有兩隻, 而且係幾大隻, 咁大隻嘅小籠包其實已經談不上小籠包, 應該名為小籠大包, 咁大隻差少少師傅都唔可以成隻放晒入口, 小籠包皮亦算薄, 但要讚下讚咁大隻咁重身夾起都唔穿喎, 而且包裡有著濃濃嘅熱湯, 味道鮮甜, 絕對係必食推介!紅油抄手賣相一般, 一客六隻, 皮夠薄而餡料爽口, 皆因除左豬肉外, 餡裡還放左少少芹菜, 而且份量不多, 洽到好處, 連師傅一向唔鍾意芹菜嗰種味道亦深深被吸引, 究竟係師傅口味變了還是真的洽到好處呢? 但抄手個汁底少少香但唔辣, 如果可以再辣少少就更吸引, 整體而言還算不錯!最後係五香牛肉麵, 五香牛肉麵一放低師傅第一時間試下個湯底, 湯底係濃濃的雞湯, 味道略嫌過濃, 所以咸少少, 加上亦幾多油, 所以飲左幾啖後師傅亦要停一停諗一諗, 究竟應否再繼續飲呢個湯; 再講五香牛肉冇咩特別, 就是薄薄的牛(月展), 牛肉鬆軟, 都可以; 麵身入口唔似上海麵亦唔似拉麵, 師傅第一個感覺係公仔麵, 一般!總括黎講食物質素尚可, 環境舒服, 服務態度尚算友善, 價錢合理, 一個人四款食物, 埋單加一連貼士啱啱一舊, 最唔抵應該係要比五蚊茗茶; 最後師傅一個打四件, 一件不留, 雖未能似葉問一打十, 但對師傅黎講亦係一個創舉; 是次笑臉亦可以一比, 鼓勵大於一切, 有機會都可以再黎試多次!…Read More
