Seafood Thai (Closed)

之前同事帶過我去三聖村食海鮮，難得同老公响黃金海岸Staycation，就同佢去食海鮮，睇見呢間响Openrice 評語唔錯 (好過我上次去嗰間)，於是去試試唔同嘅口味。我地先去海鮮檔買海鮮，買咗四樣野，共$960。花甲唔錯，大大隻，無沙，個味呢？幾特別，好香酒味，但又唔係好食到追住食蒸海鮮最穩陣，鮮甜！薑蔥蟹都無問題，但好似爭少少，唔夠野味...最貴嘅賴尿蝦！味道上唔到賴尿蝦度，做出嚟嘅肉質有欠鮮嫩，香茅味只係响腰果度食到，好失望~除咗四個海鮮，再加咗一樽啤酒同通菜。通菜炒過龍，偏黃同林，啤酒無得錯啦? 都唔係架，埋單計咗兩樽！全單$56x ，因為碌咗咭先見到，佢地退返$2x 現金俾我地 (1樽啤酒嘅錯，無退加一)。簡單d講，貪得意試下~可以！但一定無下次！…Read More

對上一次入屯門三聖食海鮮已經係4、5年前既事。記得果次去街市買完海鮮，再拎去附近酒家煮，價錢一d都唔平，兩個人食左千幾蚊，唔平得過市區好多。今次跟係屯門長大既好朋友黎食，竟然有意外驚喜。係街市買左元貝、桶蠔同花甲，跟住去左屯門友介紹既泰海鮮煮。買左10隻元貝，用蒜蓉粉絲蒸，大大隻，好鮮味彈牙，粉絲索左汁好惹味。買左兩細桶蠔，平時牙媽係屋企煮多數都係整薑蔥煲，簡單d。出街食，無理由又食返薑蔥煲蠔架，就試下砵酒焗。蠔邊好脆，隻蠔肥嘟嘟，咬落中間多汁肉嫰，濃濃砵酒味，超好食。不過一定要趁熱食，有隻擺耐左先食，蠔邊已經淋哂，嘥左。買左兩斤花甲，好似食西餐甘，揀用白酒忌廉煮，再加烏冬。花甲好鮮甜，啖啖都有白酒味，好正。平時食西餐，通常都係比麵包你索埋個汁食。原來配烏冬重好味，又飽肚d 。再叫左個芝心蝦丸，一向好少食熱氣野，但朋友話好正，即管一試。果然係好好味。蝦丸大大粒，表面包住平時食凱撒沙律上面既麵包粒，咬落脆卜卜，咬到中間，蝦丸彈牙爽滑，再爆出流心芝士，三重口感。熱氣都唔理得甘多，食左先算。今次買材料再加埋煮，每人都係$200左右，價錢平過係市區，食物新鮮美味，真係唔錯。…Read More

「Yeah, she's a real fine babeYo, wish me luck to all your ownCan you hear me out there?」在深入大西北三聖既長征路途上，播到手機歌單上呢首十五年前既老歌。食罷這餐。共鳴感爆燈。每一遍來泰海鮮。一味總不能少。一定係海鮮湯！呢個番茄薯仔底，配上雜魚、沙白、蝦、尿蝦去煲。根本冇得輸。「Charm me charm me you make me crazyHow can I say I love you want youHow can I say you're beautiful beautiful'Cause when I see you you make me melt」Encore得最多既一定係白酒忌廉煮花甲。基本上配乜粉面底都好食。烏冬底清啲。煎米粉底香口啲。面底就脆啲。但係比著係我就會就咁叫個白飯。白酒既香，忌廉汁既滑，花甲既鮮。撈飯係最直白既共鳴箱。汁搶曬，飯仲有淨。食海鮮從來唔洗擔心。因為簡簡單單蒸個蒜蓉粉絲元貝。啲蒜蓉豉油已經足夠去清埋佢。元貝越食越大隻。又夠厚肉又鮮甜。當然啲粉絲都係吸曬啲精華。泰海鮮啲粉絲唔小器。唔洗打交爭「愛上殺手超過限期後除非今天你手槍生銹我怎得救何時下手請決定時候如子彈足夠攤位裡的木偶　多準確無敵手」食海鮮唔洗擇日既，有子彈就去食。享受下啦！…Read More

第一次黎三聖食海鮮～ 之前朋友話泰海鮮好食，仲有黃秋生推介添，趁母親節就一於黎試下喇！去到三聖首先要自己買海鮮，我地揀左關財記，買左花甲、龍蝦、扇貝同鮑魚，買完就出發去泰海鮮。因為人比較多，我地要坐戶外，感覺好似大排檔。交左啲海鮮比侍應，坐低一陣就會過黎問我地想點煮，揀好左就等食喇～花甲揀左白酒忌廉，再加烏冬底。無想像中咁好食，白酒味太重，同埋期望個汁會杰身啲。龍蝦揀左芝士脆焗，感覺焗得有啲過火，厚粉左少少，但隻龍蝦幾多肉，又鮮甜，我諗清蒸或者蒜蒸會更鮮甜！扇貝當然要揀蒜蓉粉絲蒸喇～ 扇貝好大隻，都幾新鮮，不過無咩驚喜。鮑魚揀左果皮蒸，普普通通，無咩味。另外再叫左個必食豬排，肉幾鬆軟，不過無推介講到咁好食。我地4個人煮左5個餸，都食到幾飽下。整體黎講，無想像中咁好食，只係普普通通，我地估可能因為臨近母親節太多人，佢地忙起上黎質素就無咁好🤔 但比係出面酒樓食海鮮會新鮮啲，不過價錢有啲貴，加工費同買海鮮既價錢差不多。間中食一次都可接受既～…Read More

入西貢食海鮮就試得多，朋友約去屯門食海鮮，於是就入左三聖食下海鮮。去左泰海鮮食左好多野呀，選海鮮係在那間關財記揀靚海鮮。坐落叫左白酒忌廉煮花甲加烏冬底，個汁正到可以送幾碗白飯呀、另外個砵酒焗蠔都係超正，冇諗過會咁好食！一個人可以食幾隻！不過要留肚食蒜容粉絲蒸扇貝，粒扇貝大過隻碗，飽到差唔多冇空位食其他菜啦。點知個蝦刺生上菜時就又忍唔住食食食啦，朋友仲叫左飽魚呀超正！到長長的蟹腳了，估唔到咁多肉都幾鮮甜。忍唔住食返幾條油麥菜中和返再飲啖賴尿蝦蕃茄薯仔湯，啖湯鮮甜到不得了，仲有個鼔油王蝦頭同大蟹蓋蒸蛋，正到暈，d蛋仲有d紹興酒味，極度推介呀！總括黎講好有驚喜，下次要一家大細入黎食飯會好掋食好開心，多人食可以叫多d餸，好耐冇試過咁食法啦…Read More

好耐都冇去過屯門三聖食海鮮啦!!今次就一家人黎到食個海鮮大餐先~~係食之前就梗係要過隔離既海鮮檔揀靚海鮮啦;朋友推介左 "關財記" 比我地, 見到佢地既游水海鮮都幾多款!!咁就係咁依揀左幾款拎去 "泰海鮮" 加工~佢地既加工製作費唔算貴, 收費合理;各種加工煮法都齊備, 明碼實價寫到明, 唔會呃人~我地就揀左隻象拔蚌整刺身~呢度總共一斤三両, 整左出黎都幾多;仲可以加錢要埋湯底堂灼~新鮮既象拔蚌刺身 一片片咁有返咁上下厚度;食落有口感仲好爽口鮮甜!!蒜蓉粉絲蒸扇貝, 隻隻扇貝都大過隻手掌架!!!扇貝上面鋪上蒜蓉粉絲黎蒸~~一上台已經好想食啦!!唔會以為隻扇貝淨係個殼大, 入面舊肉都有隻手掌咁大;而且非常厚身, 真係超級肥美~~最鐘意既係佢地放面既蒜蓉超多, 真係特別滋味!!除左食海鮮, 當然要飽肚既野食啦~我地就買左花甲黎整 "白酒忌廉煮花甲配烏冬"超大碟既烏冬配上差不多一斤既花甲;白酒忌廉汁食落唔會過膩, 而且烏冬彈牙, 配上花甲做配料可以話係中西日 CROSSOVER~~呢味青山灣焗芝士龍蝦係朋友推介的, 所以就買左 4隻龍蝦黎試試~~鋪滿芝士既開邊既龍蝦, 金黃色又漲卜卜的;芝士味好濃郁, 食落都唔會有膩既感覺, 一人半隻既份量真係剛剛好!!龍蝦肉唔會過老, 嫩滑彈牙~~最後仲有媽媽最鐘意食既奄仔蟹!!一買就買左4隻, size 都幾大隻下, 仲用最好食既方法: 油鹽焗黎整!!店家仲細心地幫我地剪開一半添~隻奄仔蟹爆哂膏丫喂!!!佢係軟身既蟹膏黎, 超香又夠多膏, 食得好滋味~食半隻真係唔夠, 一人一隻就差唔多!!呢度圍返每個人都係 3百蚊左右, 真係可以話超抵~~下次再朋友黎呢度先!!…Read More

過往3年，我哋嘅死佬飯局都有入到嚟三聖食海鮮，一於三戰三「聖」，全取九分。最初兩年去咗冬菇亭嘅「興記」，對上一年就過咗嚟山腳位嘅「容龍」，今年班死佬就話唔再搞住，不過，有友人見我哋晌三聖食海鮮食得咁過癮，又搞局拉埋我入嚟食番餐，選址同屬冬菇亭嘅「泰海鮮」，今次友人搞，唔使小弟煩，真好。三聖始終都幾遠，所以，友人想喺食完海鮮順道遊屯門，故今回嘅海鮮餐揀食晏，相對，客人無咁多，感覺會舒服啲。其實，咪睇喺冬菇亭，內裡裝修如中菜館，環境一啲都唔失禮。其實，上次去興記都已經知喺咁。香港人嘅智慧一向靈活，我哋食完離開時，見到就算依家大熱天時，餐廳一樣可以晌室外照擺枱，你會問有無客願意咁嘅炎夏仲坐出去，答你喺絕對有嘅，點解？睇相你就個香港人有幾醒！晌餐廳兜咗個圈都唔見佢哋有魚缸養海鮮，原來聽佢哋講養海鮮成本都高，加上絕大部份客都喺自攜海鮮嚟加工，但友人補充話依度嘅海鮮喺晌三聖海鮮街嘅「關財記」攞貨，根本同自己買過嚟分別唔大，差在未有自己落手落腳去揀同埋無跟幾家海鮮檔格價，但唔上心呢啲事又信得過餐廳，真喺煩少好多嘢。順手就上載埋佢哋啲收費俾大家參考，因為烹調法式繁多，喺就喺有啲複雜，但睇落跟同區比都算相宜:)。友人講，依度除多款大路嘅海鮮煮法，仲有唔少創意嘅做法，不時有意外驚喜咁話！今回主打嚟食海鮮，其實，店家都有好多小炒供應，就算餐牌上無寫出嚟，唔太刁鑽嘅菜式都會盡量提供。而店名嘅「泰」字，亦代表咗佢有多款泰式美食供應。而飲品方面，啤酒、汽水就基本架啦，但溫馨提示一下，自攜食品、飲品喺需要收費，此外，亦如一般中菜館，收茶芥（$8/位）、酸菜（$15/碟）及加一。白灼鮮蝦 食海鮮最緊要喺乜？咪就喺新鮮囉，唔新鮮就乜都喺假，出嚟效果一定大打折扣。而蝦夠鮮，白灼就最好，既食到蝦嘅原味，又嚐到鮮味，沾點豉油提提鮮就夠喇。難得啲蝦唔止大隻鮮甜，夠新鮮緣故，口感彈牙。海鮮湯鮮料海鮮湯嘅加工費喺斷位收，每位收$18，兩位起計，你拎啲咩海鮮嚟就成為咩海鮮湯，不過，正如店員話齋，唔使用貴價料，啲海鮮夠新鮮就已經夠晒鮮甜。眼前依鍋海鮮湯以蕃茄薯仔湯底加入雜魚、沙白嚟增添鮮味，由於料多，鮮甜度無庸置疑，難得一大鍋，當然唔客氣搶住添飲啦。加拿大象拔蚌刺身之前晌容龍或興記都有食象拔蚌，今次都唔例外，不過，今次友人就大膽啲，個象拔蚌膽唔做椒鹽，索性刺身食。整條象拔蚌刺身都處理得好，切得厚薄均一又夠大塊，入口極爽脆，沾少少芥末豉油，鮮味盡出。友人就大讚啲蚌膽新鮮，有啲似食豬潤嘅感覺，但口感滑潺潺。砵酒焗桶蠔同樣之前晌容龍及興記都有試桶蠔，砵酒焗試過，薑蔥煀又試過，但以砵酒焗好啲，無咁太冚咗啲蠔味。美國桶蠔煮完都無乜點縮水，大隻厚肉，撲咗少少粉，咬落表面有點脆，細嚼蠔味濃郁，又有酒香。薑蔥鮑魚煲之前幾次都喺果皮蒸，有建議不如薑蔥煀，咦！效果掂喎，啲澳洲鮑魚大隻有睇頭，入口軟腍而有咬口，又極有薑蔥香氣，仲頗入味添，非常惹味嘅一道菜式。白酒忌廉煮花甲上述多道海鮮嘅中式做法都有水準，估唔到西式做法亦難唔到師傅，依道花甲用白酒忌廉煮，個汁底十分滑溜，食落都感受到下咗唔少忌廉，此外，白酒亦應該落唔少，因為個酒味都幾出，配上埋鮮甜有肉地嘅花甲，實在不俗。個人而言，認為配伊麵底或烏冬底都理想。日頭嚟、夜晚嚟都喺咁嘅價錢，不過，小弟就覺得晚上人氣旺啲，變得較有氣氛啲，尤其冬菇亭依類街坊食店。但日頭嚟有個好處，就喺客無咁多，人手足就招呼熨貼啲！同埋，食完可以晌屯門周圍行吓，去黃金海岸又得，行麥理浩徑第一段又得。…Read More

屯門元朗的朋友大夥兒聚會，一行多人，當然選擇到近水樓台的三聖海鮮街，於眾多海鮮酒家、冬菇亭中，又再次選擇到訪泰海鮮，無論加工費跟烹調味道都是挺滿意的一家。 慣常先走到關財記挑選購買新鮮生猛的海鮮，然後交給餐廳那邊加工，加工費約為$45-$65，也算是合理。除了海鮮菜式外，還點上些小炒項目。 白灼九節蝦 $72/斤 每次到來都會點上'地道特產' - 九節蝦。用最基本的烹調方法: 白灼，最為徹底嚐到九節蝦的鮮味。 可能是未到盛產期，九節蝦較上次到來時體型較細小，不過白灼後色澤艷麗，爽脆彈牙的口感，味道鮮甜美味，輕輕蘸上豉油更能發揮效果，自然是一隻緊接一隻，吃過不停。 白酒忌廉煮花甲 $172 沒有用上豉椒炒的花甲，換上較為西式的處理手法，也能提升花甲的鮮甜。忌廉汁十分濃稠，味道甜甜的散發濃濃白酒香，墊底的非伊麵米粉，而是具粗度嚼口的烏冬，掛汁能力十分強勁，每條都沾有忌廉汁，惹味十分。花甲每隻都肉厚味鮮，跟白酒忌廉汁十分搭配，這個變湊版的'白汁蜆肉意粉'十分受歡迎。 青山灣焗芝士龍蝦 $108/2隻開邊 這碟一端到來，焗過的芝士已散發著濃郁香氣，霸氣十足的令在座均嘩聲四起，食指大動。芝士一片金黃的覆蓋在龍蝦身上，濃厚香口，更帶有點香脆的效果。 一斤有多的龍蝦，每口都是啖啖肉，肉質鮮甜彈牙，跟芝士的鹹香作個平衡，不會互相蓋過其美味，這個組合簡直是完美的配搭，沒有半絲的膩感，超好吃啊! 油鹽水瀨尿蝦 $72/2隻 雖然沒有像用椒鹽烹調般香氣四溢，用油鹽水這簡單的方法，卻是比椒鹽更鮮甜的精妙吃法。大蒜、蔥段、果皮跟胡椒煮成，淡淡的已帶出瀨尿蝦的鮮和甜，煮出來的鮮湯趁熱喝一口更是滋味。 大大隻的瀨尿蝦原隻呈上，頗為驚人，蝦肉容易又方便的就起了出來，厚身鮮甜，啖啖肉的吃過不亦樂乎，比起椒鹽，是少了份熱氣的另一番滋味。 馬拉盞通菜 $76 海鮮之外也來點蔬菜，點上馬拉盞通菜更貼合海鮮的主題。通菜炒得剛好又不會過腍，馬拉盞味香，又不會過鹹過火，令炒菜味道更是豐富，平時不好蔬菜的也多吃幾條。 必食豬扒 $93 想不到專門吃海鮮的地方，小炒也具一定的水準，豬扒熱辣辣的呈上，香氣四溢非常有鑊氣，令人垂涎欲滴。豬扒經醃製過十分入味，肉質鬆化腍軟又多汁，加上醬油的調味，鹹鹹甜甜的惹味下飯一流。伴碟還加有小魚乾，鹹脆可口，增加香口的程度，當小食吃著也是不錯喔。 每道菜式都甚有水準，烹調得宜保留了海鮮的鮮甜，確實令人回味，加工油料費明碼實價而且合理，連同買海鮮，結帳每人三百多的消費，令這頓海鮮聚會十分滿足。…Read More

趁著五一勞動節假期，我和三位中學舊同學一起在我們讀書的地方 (屯門) 聚聚舊，其中有同學話想食海鮮，於是我們便來了三聖邨的「泰海鮮」。原來「泰海鮮」的來頭不小，他們主打新派海鮮菜式，並且由專廚處理，並且曾獲選 2012-13 年名人食府星級推薦食肆。每斤海鮮來料加工是 $48 起。同學好貼心地預先 book 了位，我們四個女人一到左就入得去坐，不用等。呢度的海鮮餐都幾特別喎，我們都叫了一些在其他海鮮酒樓吃不到的菜式。首先來個象拔蚌刺身，象拔蚌切成薄片，並且有冰塊鎮住，保持冰凍新鮮。刺身切成薄片，口感彈牙爽口，而象拔蚌的膽，味覺鮮甜而滑潺潺，和象拔蚌相映成趣。備有 wasabi 和豉油，就像平時食魚生一樣，wasabi 微微攻鼻，食落口感到多點刺激。侍應建議我們吃前先放入湯底堂灼一下，然後才把象拔蚌刺身放入口，而灼過的刺身會更加爽口呢。白酒忌廉煮花甲 (配烏冬)，一呎闊的大碟，舖滿了大大隻花甲，還有澎湃滿瀉的 creamy 白汁，已經先讓人垂涎三尺。花甲肉質鮮嫩彈牙不在話下，就連配角烏冬都夠爽口彈牙，掛上鮮甜的白酒忌廉汁，食完一碗之後又想再夾多些。青山灣焗芝士龍蝦 (2隻開邊)，這是邪惡至極的一道海鮮菜，身為芝士控的我簡直係賣飛佛 ！我們就聽從侍應的建議，兩人各 share 半隻。成隻手咁大的龍蝦切開兩邊，炸粉及芝士焗到酥脆香口，先嚐到芝士的濃稠的鹹香，再來新鮮游水龍蝦的鮮甜多汁， 三種截然不同的味道，食到我停唔到口，把蝦肉刮到最後一塊才依依不捨地停下。食完會有少許飽滯，建議兩人一齊 share 半邊，飽得滯就食唔落其他菜式啦～砵酒焗美國桶蠔，桶蠔如手掌般大，略為炸過後，再以砵酒和洋蔥等焗過。大到一隻湯匙都唔夠裝。外皮焗到很香甜，而裡面的桶蠔都相當真材實料，肉質新鮮又鮮甜。最後還有我拳頭咁大嘅泰皇芝心蝦丸，又炸又芝士，我真係好鍾意！蝦丸金黃炸脆，難得又唔會好油膩，粒粒厚厚彈牙又甜美的蝦丸裡面，仲有熱辣辣、鹹鹹地又 creamy 的芝士流心，真係誘惑的美味！我們在食完主菜之後再加點這款，所以食少少，感覺便更加滿足。呢餐平均每人都係 $200 左右，呢間海鮮酒家的好處係，這裡有許多精心設計新派  fusion 海鮮菜，價錢會比原隻新鮮海鮮便宜一點，而且每款海鮮菜都是段斤計，價錢和份量可視乎人數和食量而定，非常有彈性，很合乎新界西人精打細算的特質，難怪同學話呢度一年四季都咁多人幫襯。…Read More

海鮮係要自己買去嘅，我哋睇咗其他食評之後，決定幫襯附近嘅關財記，嗰度服務態度唔差，都唔算會呃秤，價錢算合理，海鮮生猛新鮮，自己可以慢慢揀，一眼望見有好多海鮮檔，但係大部份人都選擇呢一間我們買了海鮮之後，把海鮮交給了夥計，等了半小時左右，他們就會過來問我們怎樣煮，好熟悉我們買了什麼海鮮，也會提供意見，告訴我們多數客人會選擇什麼白酒忌廉煮花甲酒味香濃，忌廉味好重，超級香超好食，如果多啲人分享就好，因為食得多都會幾膩下食晒啲花甲之後好想打包個汁啊！其實個汁有一種好熟悉嘅味道，不過諗左好耐都唔記得係咩馬拉盞炒通菜馬拉盞好香，通菜莖的部份爽，葉的部份嫩，分量十足花竹身（刺身）這個不推介，因為比平日食的蝦刺身比較厚身之外，沒有什麼特別，加工費亦比較貴，浪費了幾隻蝦，下次會試其他方法煮花竹蝦（蝦頭）除了刺身部份，蝦頭亦都有少少肉可以食，選擇了椒鹽的方法。但係肉真係得非常之少，真係冇乜肉好食，啲椒鹽仲多過可以食嘅肉白灼花螺（海鮮醬/辣醬）味道比較淡，海鮮醬似平日吃腸粉的甜醬，辣醬沒有什麼特別，不推介薑蔥鮑魚鮑魚爽口，幾大隻，薑蔥的方法亦煮得入味，能夠索晒啲汁，正蒜蓉包食第一啖係幾脆嘅，但係過多一陣麵包就會變淋，建議快啲食晒佢，唔好擺太耐奄仔蟹（表面）奄仔蟹 （鹽油焗）蟹好細隻，膏唔算少，但是比較實，這裏不會主動提供剪刀，要問先有我們三人，吃了五款海鮮，另加兩款小菜，沒有叫飯和伊麵等等，已經夠飽，滿足但價錢真係好貴，好彩食物有返咁上下質素，但係要補充一點蝦的清湯鍋底我哋是沒有叫的，一開始以為是免費提供，點知原來要計錢我哋本身係關財記嗰邊買了五款海鮮已經600多元，再加埋這裏的加工費，這一餐已經吃了1300多元了…Read More

老婆屋企人生日，決定一家四口去屯門三聖食海鮮，九龍人的我地都係第一次黎呢度，見佢地先親自去旁邊挑選海鮮，原來係有名的<關財記>，之後再俾廚房加工，海鮮質素高。先黎個泰皇芝心蝦丸，光賣相已經非常吸引，蝦丸熱哄哄、大大一粒，蝦肉新鮮彈牙，中間的芝士香濃，外層仲用左麵包粒去炸，口感更加脆卜卜!!白酒忌廉煮花甲，平時食炒或清酒煮多，估唔到白酒忌廉煮都好味、好稠密、酒味重，花甲又大大隻，鮮甜， d汁用黎撈飯一流。鹽水浸瀨尿蝦，超大一隻，見到真係誇張，有整隻手掌禁大隻，雖說只係用鹽水浸，但簡單的烹調方法更帶出賴尿蝦的鮮、甜，而且肉質仲肥美彈牙!!…Read More

舅父專誠由美國飛來香港，再入到屯門揾我地食飯我地都盡地主之誼, 帶佢遊覽屯門, 同介紹屯門道地既海鮮勝地~三聖 ~佢識白酒忌廉煮花甲 花甲好大隻，冇沙，肉質鮮甜叫Ｅ味菜～最緊要最緊要～記得叫多碗飯白酒忌廉好好味Ｃreamy 既口感帶少許酒味薑蔥鮑魚煲平時食開鮑魚會選擇清蒸但今日待應推介用薑蔥煮就真係少食 原來係可以咁夾師傅煮得剛剛好, 鮑魚完全唔韌，又夠厚身,啖啖肉又彈牙清蒸蝴蝶蚌推介...我第一次食蝴蝶蚌真係非常好味, 鮮甜多汁, 大隻冇沙,原來蝴蝶蚌平時好少有聽待應話12月-3月比較多D, 味道亦較鮮甜蝴蝶蚌煮後, 蚌殼大開似蝴蝶得以命名 清蒸星班 細細條, 但火喉控制得好好,蒸到剛剛熟, 肉質嫩滑,仔仔至愛, 泰海鮮個廚真係唔錯黎過3,4次, 每次食物都保存到水準, 費用又唔算貴蝴蝶蚌真係好好味, 飯後自己再去海鮮檔買左一斤番屋企煮…Read More

冬至飯聚，親友們嚷着要吃海鮮，大家不期然想起了三聖海鮮街。自從發現了三聖這海鮮寶地，便成了這海鮮街的常客，無論是貴價的大酒樓，或是親民的冬菇亭，都各有特色，當中會令我回頭的其中一家是泰海鮮。先在關財記買過海鮮，然後便拿到泰海鮮作加工，這家的油料費會比酒家相宜，一般海鮮加工費平日在$46-$64之間，假期會貴上一點點。除了海鮮菜式也有家常小菜可選，較適合有老有少的家庭飯聚。要照顧同行幼小的口味，先為親友的「化骨龍」們點了必食豬扒($93)，熱辣辣的很有鑊氣，灑上脆身的銀魚乾，豬扒軟稔鬆化，加上汁醬甜甜的很好下飯，瞬間便被孩子們清碟。接着的泰式芝心丸($28/粒)也很受「化骨龍」的歡迎，芝士蝦丸沾滿了麵包粒，以滾油炸香後隨即上桌，熱辣辣的小心燙嘴！鬆脆金黃的麵包粒下是打得結實彈牙的蝦丸，一口咬下，稠身的芝士汁濺出，又一次要冒燙嘴的危險。雖帶微微酒香，仍是令小孩吃得開懷。椒鹽鮮魷($96)同樣是鑊氣十足，粉漿上得透薄，鮮魷厚身鮮甜，灑上椒鹽、蒜粒更加惹味。再來就是今天的主角芝士焗龍蝦伊麵底 ($64/斤，芝士、伊麵收費另計) ，這芝士焗龍蝦用上不同芝士香焗，令芝士汁更濃厚香口。選的是斤量十足的波士頓龍蝦，足有二斤上下，吃起來啖啖肉的。豐厚的龍蝦彈牙鮮美，熟度是剛好不會焗得老身。同行的小孩眾多，「化骨龍」倒是吃伊麵居多，事實上掛滿芝士的伊麵確是誘人，不過我還是更欣賞龍蝦的鮮甜呢！白酒忌廉煮花甲($56/斤)，肥大肉厚的花甲以白酒忌廉同煮，再加上紫蘇提味，汁醬甜甜的帶濃濃酒香，小孩對這重口味海鮮興趣缺缺，大人卻是甘之如飴，喜歡海貝類的我更是吃了不少。奄仔蟹($58/斤)並非最當造的關係，未致爆膏的程度，蟹膏仍是漲滿得很，蟹肉亦算鮮甜，以油鹽水焗最能吃到原汁原味。個人最欣賞的是這家的海鮮湯($19/位)，那來自海的味道令人相當難忘。曾在三聖某家有名酒家有過海鮮湯料被掉包的經驗，當然始作俑者不是海鮮檔而是海鮮餐廳吧！這次不忘叮囑親友要多加注意，可幸的是這海鮮湯絕對是足料炮製，值得加分。此海鮮湯做得很有水準，用上斑紋賴尿蝦、海蜆、鮮蚶、海魚，以蕃茄薯仔來熬湯，如此陣容這海鮮湯不鮮甜才怪呢！已是二訪，泰海鮮是三聖表現穩定的一家，賣點是加工費比兩大海鮮酒樓相宜，是較為親民的選擇。…Read More

能夠稱呼為一頓美味的食物，烹調方法固之然是重要，但選料食材也不可忽視，由其是海鮮類，稍有不慎食材不夠新鮮，就算有多高烹調技巧，都難以令食物美味。籍著冬至飯局齊人開飯，決定食得豐富一點…食海鮮大餐。屯門三聖區是最多海鮮賣的地點，這次經哥哥朋友大大力推介來到關財記海鮮檔選擇最新鮮最超值的海鮮，再經老闆極力推介這餐館數款煮海鮮法，店員便幫忙將海鮮送到餐館，待海鮮隨時候命加工變成美味可口的食物。先來吃第一道這店必吃食物，"必食豬扒"稱為來這店的必食之一，名稱夠直接易記。看似跟平常的京都肉排沒分別，但酸酸甜甜的汁液，還有豬扒厚厚肉的，很鬆軟，啖啖滋味，完全與別不同，絕不能雙提並論。再來一道這裡的廚師推介，泰皇芝心蝦丸，外皮被麵包方塊包圍著，炸至金金黃黃色，熱騰騰的，只看外形已夠吸引，很特別，味道未嚐視覺已十分滿足。放在碗上一會，還熱烘烘的，輕輕咬一下，外皮的麵包方塊香香脆脆的落下，中間的芝士餡料一湧而出，蝦丸肉夠彈牙，芝士汁夠重味，沒想到竟如此配合。日本的麒麟啤酒，還有紐西蘭手工啤酒，前者是飯局桌上常點啤酒之一就不多說，後者之手工啤酒，味道甘帶點麥味，不錯是也。與家人冬至飯局，當然也要喝一口啤酒，將開心推至高點。鹽水浸瀨尿蝦，可惜沒有做對比，真的超大隻的，體形還比手掌大隻的，鹽水浸煮卻沒有很重的鹹味，湯水看似清淡，味道卻因瀨尿蝦而變得鮮甜，完全沒有味精的感覺，是真正的海鮮味。哥哥把蝦身的外殼剪開，不剪開都不知，原來瀨尿蝦肉內有著滿滿紅紅的蝦膏，很耐沒有吃過了，蝦肉還很鮮甜，很肥美新鮮。來個真正的海鮮湯，湯料有雜魚，沙白蜆，瀨尿蝦，蕃茄及著仔，湯味鮮味十足，雜魚什麼魚也有，還以為會很重魚腥味，出乎意料之外竟然有很重的魚香味。最意外的是湯料雖已煮至爛爛的，但細看一下每樣淺嚐一下，瀨尿蝦肉及雜魚肉完全吸收了湯的味道，太讚了，吃下吃下真的連湯料都吃下一大半了。開始來個味道重一點的，芝士焗龍蝦伊麵底，哥哥一開始就說笑，往往這餸菜最後只剩下龍蝦在碟上，伊麵最先全部消失。果然沒錯，伊麵多多都不夠，5個人每人兩碗滿滿的，加上重重的很香的芝士汁及龍蝦肉的鮮味，配搭肥肥的龍蝦肉，實在是太美滿了。最後再來重味一點，而又是最香的一道餸菜，最想再吃再吃的一道。白酒忌廉煮花甲，酒味雖重但有很香的白酒味道，花甲也很肥美大隻，不只是蜆殼大隻，連蜆肉也很大隻，很Juicy。不得不提，我們還再另外點了三大碗白飯，因為白酒忌廉實在太讚了，就算只配上白飯，也難以忍口不狂吃，因為這樣，我們肚皮足足再漲了，很滿足唷。…Read More

爸爸生日話想食海鮮， 於是決定一家人去屯門三聖食海鮮， 我地都係第一次黎食， 客人可以親自去旁邊有名的“關財記”挑選海鮮~ 黎之前做左搜查，睇下有咩推介美食， 希望爸爸食得開心~ <泰皇芝心蝦丸>  超乎想像的好味! 蝦丸用的蝦肉好新鮮、好彈牙~ 中間的芝士又多又香濃， 熱哄哄的，一咬落去d芝士流出黎~ 最特別的是外層沾上麵包粒去炸，口感更加香口脆卜卜!! <白酒忌廉煮花甲>  花甲大大隻，好鮮甜~白酒忌廉好稠密，而且酒味重，好似我地一家愛酒的人一定好鍾意~爸爸仲攞d汁黎撈飯添~ <砵酒焗桶蠔>蠔隻隻都好大， 而且好肥美味！ <鹽水浸瀨尿蝦>  我地要左3隻賴尿蝦， 因為超大一隻!!  用左鹽水浸 簡單的烹調方法更帶出賴尿蝦的鮮、甜肉質肥美彈牙!! <鹽油焗奄仔蟹 >  我地一家人最愛食蟹，兩斤多共有5隻，連埋加工$200有找，每隻蟹膏都爆多 蟹膏甘香，停留係口腔久久未散， 蟹肉清甜鮮嫩， 而且呢度仲好細心係上枱前先把蟹切開，方便客人進食~ 爸爸非常滿意呢餐生日飯， 海鮮無論質素、味道都好有水準， 店員又好親切，價錢亦好合理，下次食海鮮一定要再黎!!…Read More