Shun Kee Typhoon Shelter

好想搵點風味、特式餐廳，今次搵到黎避風塘。初到貴境，由怡東酒店走過秘道，上地面再一直前行，望到行人天橋，終於到達登船地點喇 ﹗第一次黎，真係唔多識路，一路行就一路心存疑惑，有無行錯路架？幸好路程不是太遠，十分鐘都唔洗搞掂。遊艇會就係附近，所以有大量遊艇停泊，碼頭能遠望對岸尖沙咀燈飾及兩岸夜景，發現又到聖誕喇 ﹗其實因為早前電視有為避風塘艇上餐廳做過訪問，得知其歷史、背境及辛酸，即時心思思想一探究竟。剛才等錯地方，依家朝著正確上船地點再前進，行人天橋下面才是呢。各朋友係碼頭等上船，遠望可見艇上廚房閃閃發亮喎，火光紅紅，炒得非常有氣勢呢 ﹗接待阿姐有衝勁有活力，擺個靚 post 示意六位貴賓可以登船喇 ﹗唓，原來只係駁艇，不到廿十秒就泊係主船側喇，所有艇仔泊埋一齊，緊接著水上廚房，火燒連環船？另一位侍應阿姐稱因為政府基建工程進行中，所以禁止出海，暫時只可以停在避風塘內進餐，我地當然有點失望啦。阿姐還叮囑為安全起建，食客不可以在船上走動，不可以坐埋一邊，不,可以周身郁，艇仔好細架乍，會容易翻艇架 ﹗艇仔設備較為簡陋，洗手間只得一個坐廁係船尾用布圍住，跟飯檯只係兩個身位，非常接近喎。大家緊記上船前要先去乾淨，係道方便難免有點尷尬。十幾年老友聚餐，個個都變晒 uncle 同 auntie 喇，時間過得真快。食左先講，開飯 ﹗細閱 menu，電視話有鮮魚濃湯象拔蚌，用大量各類斑仔餚製架。打算叫點特式海鮮試試，不過阿姐話只提供套餐，其他全部要預訂。既然黎到就入鄉隨俗，有咩好野就拿出來 ﹗灼韮菜花，我的第一次韮菜花，一向以為韮菜、韮黃係同樣味道，原來錯晒 ﹗超級清甜爽嫩多汁可口，簡單白灼加豉油調味，一試愛上，好好好食呀 ﹗白灼東風螺，海鮮只要夠新鮮加上簡單整作，無需特別烹調或調味。原汁原味新鮮非凡，頭爽脆、身嫩滑、尾軟棉，鮮甜甘香無比。烚得剛剛好無過火，活東風螺配甜辣醬襯到絕 ﹗白灼豬雜，豬粉腸外層爽彈、裡面軟棉、甜而不澀，極級美食 ﹗白灼豬肚、豬脷同樣無腥無嗅，非常爽彈，無得彈 ﹗豉汁炒蜆，最差都係依碟喇 ﹗BB 蜆奀滋滋勁細隻，味道還可以，不過食唔到鮮味呢。無尖椒無辣椒無薑蔥無洋蔥，似麵醬炒一樣，齋蠔油豉汁十分單調，怪怪的。白灼基圍蝦，生猛游水活蝦超甜無得輸，火喉剛剛好 ﹗蝦肉爽嫩甜美，肉汁水潤。蝦頭充滿甘香宜人既蝦膏，給我啜得乾乾淨淨。蒜蓉粉絲蒸聖子皇，經常係飯店或酒樓食，多年印象都係又乾鞋又膠韌，甚至有嗅味添 ﹗不過信記師傅有料到，處理手腕高超，沒半點異味亦無砂石。蒸既時間恰到好處，肉質非常嫩滑爽口。大量肉汁跟蒜蓉、香蔥、豉油、粉絲捲埋一齊，鮮甜無比又配合得天依無縫，意料之外的高質好味道，要大力推介。避風塘炒蟹，必食招牌菜，咪走雞 ﹗好明顯師傅等埋幾個 order 一次過炒囉，慳燈油火蠟又慳時間麻 ﹗四人餐有泥蟹兩小隻，雖然無膏但非常新鮮，蟹肉依然跟殼黐得緊緊的，肉質結實勁彈，味道甜美散發著陣陣海水咸香。新鮮炸蒜好香口啊，好好食 ﹗食到停唔到手，幾口已經得喉嚨有點疼，過份左添。燒鴨湯河，呼聲比炒蟹更高的招牌菜，當然非食不可。套餐可揀艇仔粥或燒鴨湯河，仲洗問咩。河粉來貨係成塊過，之後師傅自行決定每條河粉既粗幼，所以可以切得特別幼細。河粉質感好滑好滑，幼滑細緻，帶湯力比寬河粉強百倍。索埋香濃鴨湯，好好味呀 ﹗撈埋剛強燒蒜就好好好好好味呀，香口到不懂形容 ﹗燒鴨皮香肉嫩又不肥不膩，香料味道濃郁甜美 ﹗我成碗湯飲晒，完全無剩。…Read More

打正避風塘旗號既食店係香港唔少，不過係一隻食艇上面，仲要真係係避風塘度食海鮮，我係第一次! 個experience 好得意好特別...當日放工後約左朋友8:30pm係灣仔等，朋友一早講定帶我食好野，叫我留定肚...差不多9:00pm我地黎到銅鑼灣避風塘，呢度係我第一次黎，周圍泊滿大小船隻既，天黑黑的，只有街燈微弱既光線...我地搵左一陣都搵唔到，最後朋友要打電話求救，我地跟住指示搵搵下既時候就見到一隻坐滿人既艇仔過緊黎...兩個姐姐慢慢地撥著船槳，等船上既人落曬，個姐姐就問我地係咪去信記食野，於是我地就上左船...如果在附近有一些指示，如manner or一個牌仔話呢度係上落船位置，客人搵既時候就容易好多啦!我地坐左大約兩分鐘度已經黎到信記，其實係由四五隻細細既食艇綁在一齊，每隻艇有一張檯。聽朋友講原來要提早打電話book 定同埋講定要食d 咩。朋友叫左個二人套餐，另外加多條蒸魚。首先黎既係娃娃菜，菜上鋪了大堆炒得好香既蒜粒，為清淡既菜湯加上一點濃香味。可惜，蒜粒炒得太燶，有點苦味...再黎係青口，個汁好好味，夠香濃又有d辣辣地。青口有咬口，但又唔會太chewy。d 蝦都幾大隻，肉質彈牙，灼的剛好。聖子皇果然好大隻，比我既手掌更大，加上走過油既大量蒜蓉，蔥，金菇菜，粉絲，好野味; 聖子肉質彈牙。一隻真係唔係幾夠喉!呢條魚蒸得太熟啦，浪費左，搞到魚肉一d都唔滑，hi sharp sharp 咁...全晚最好味既係呢個避風塘風味既炒肉蟹! 一上檯，香味撲鼻! 炒得奇香既蒜粒，豆豉同辣椒粒鋪滿成隻碟。蟹炒得好乾身，蟹殼都脆脆地，蟹肉則結實鮮甜...一個字 -- !艇仔粥/鴨瀨我地要粥，因為蟹太好味，都唔記得影個艇仔粥...呢度既艇仔粥材料同我係其他地方食既有d 唔同: 有粉腸，叉燒，魷魚...粥好綿，算係幾好既ending!呢一餐價錢偏貴，不過環境有特色，第一次係船上食野。搖下搖下，有海風吹下，一d都唔熱，感覺好舒服...我地食緊時候，仲有少少雨粉，都幾浪漫，又涼快 !美中不足既係周圍都比船隻包圍住，無咩海景，只睇到樓景...不過如果係聖誕節過黎食，就可以睇到燈飾，可能係另類浪漫喔!因為要上落船，所以最好著得輕便一d...高跟鞋就唔好著住啦 !…Read More

第一次去避風塘🌊，完來只係一個好細泊船嘅地方。黎呢度食野係食風味，因為係要上一架船仔上面食飯，好彩夜晚有海風，唔係太熱。船上環境一般，唔會有靚風景，而且整感覺衛生情況一般。洗手間係半開放式，如果有朋友要去洗手間，其實就係你隔離去，去落個海度，而且無得洗手...感覺唔係幾好...我地叫左一個六人全包套餐C($2080)：白灼基圍蝦古法避風塘炒肉蟹避風塘豉椒炒青口白灼東風螺蒜蓉蒸聖子王香蒜娃娃菜豉油皇蟹油炒麵艇仔粥/ 燒鴨瀨飲品其中比較欣賞係聖子王同避風塘炒蟹。 聖子王唔算好大隻，但尚算鮮甜。炒蟹上面嘅炸蒜炸得好惹味可口 ，肉蟹泡至殼都係脆脆地，啲肉算係足，幾鮮甜, 有蟹膏。其他食物都好一般。價錢方面一啲都唔便💸💸，相比之前係屯門三聖食海鮮，我覺得三聖食好多又抵好多，包房唱k玩成晚，食埋每人都只係二百零蚊，呢度就真係食風味，但係我未心必會黎第二次。…Read More

為左揾返兒時的味道，訂左尋日6點半5位在信記地鋪食晚餐。早幾日，姐姐what apps 我訂餐時宜，我叫左個4人餐 $1480，加多1隻鮑魚$50，共食了 $1530白灼基圍蝦，好大隻，肉質彈牙。蒜蓉娃娃菜，略為細碟，菜輕輕灼過，冇乜特別。蒸鮑魚，原本訂左蟶子皇，但佢地5點幾打電話比我話蟶子皇冇貨，所以改左鮑魚，個鮑魚都幾大隻仲好淋，吾錯。原本系炒青口，可以改炒蜆，炒得好有獲氣，個汁不太多，好好味。避風塘炒蟹，吾夠乾身，炒得麻麻地，個人覺得不大出色，有d名過其實。豉油皇炒面，好有獲氣又夠味，但面條好碎，好似頭頭尾尾餘下的。艇仔粥，有一般料之外，仲有义燒，燒鴨，粉腸，豬肚，粥底好綿，但略為清淡。鴨瀨，鴨河，鴨肉略為太少，有點小家，河粉店家話手切，好滑，好味。瀨粉就好一般。汽水4罐。整體來說，只可說ok,但味道比起以前，好似樣樣都爭的。另外，得一位姐姐付責樓面，仲要見佢不停咁安排美食及客人出去避風塘。冇茶叫左姐姐加茶，佢又忙記添加。所以，若然在這裏進餐，一定要有心理準備，是樣樣都慢，甚至忘記提供！…Read More

跟隨家人移民海外多年，對避風塘的印象非常模糊，一切也只是道聽塗說，又或者從網上舊照點滴中記錄下來，熱切希望可以親自體驗這個 「傳說中的避風塘」。早前從飲食網絡的文章中，得知避風塘海鮮美食又再重現眼簾，今次返港雖然行程表已經編排得滴水不溜，但仍然堅持誓要一嘗避風塘的風味 。中午先去九龍區（濕平）再乘坐過海隧道巴士，剛好在 「信記避風塘海鮮美食」 上艇地點下車，咁方便！ 妹妹之前的資料搜集應記一功！傍晚六點半、鹹蛋黃咁大粒嘅太陽徐徐落下斜掛於半空中，幾乎伸手可以捉摸到它，正在拍攝美景之際船家嚷著： （落船喇）， 身軀在搖曳的小艇內遙望過去 ⋯⋯ 傳說中的 粥粉艇、海鮮艇、曲藝艇 不見蹤影，換來一只 廚坊艇 雄赳赳的樹立在前方。小艇停泊後，接著下來當然是一早預定好的四人套餐出場喇 。。。蒜茸蒸蟶子王 $250（時價、預訂）又名「西施舌」的蟶子，有誰不愛與「她」來一個法式熱吻，質感並沒有因為龐大的嬌軀而變得堅韌，相反（妃子的舌頭）填滿了整個嘴巴， 鮮甜嫩滑、軟玉溫馨抱滿懷的感覺，令人想入非非！果皮蒸九孔鮮鮑魚 $200（時價、預訂）上桌時那股逗人的果皮香氣實在叫人難以抵擋，爽嫩鮮甜的鮑魚，沾點醬油蔥花，未及細細欣賞各人已經將它鯨吞下肚了。白灼基圍蝦蝦殼緊緊抱住粉嫩的身軀難捨難離的感覺、爽口甜美、新鮮二字就已經贏盡所有人的掌聲。避風塘炒肉蟹沒有沿用「興記」古法避風塘炒蟹方法（蒜蓉豆豉配辣椒濕炒），今天的改良版以炸至乾身的肉蟹配合油淋淋山仔咁高嘅金蒜堆和蔥花，蟹肉尚算扎實鮮甜，可惜蔥蒜味道未及進佔蟹身，故此二者味道顯得有點格格不入。上湯灼韮菜花脆嫩甜美的韮菜花沒有半點渣滓，雖然一早已經從其他食文中略聞一二，但到真正邂逅之時，當真有驚為天人的感覺！避風塘燒鴨腿河手切超幼河粉細潤滑溜，只可惜用瑶柱、鴨殼和大地魚熬製成的湯頭未夠濃郁，欠缺鴨脂香氣、當然是大剎風景了。避風塘艇仔粥遠近馳名的「避風塘艇仔粥」用鴛鴦米加入腐竹瑶柱明火煲成的粥底果然綿密細膩，用料雖多（如火鴨、叉燒、豬脷、豬肚、魚片等等）像是要將所有廚餘放進去似的，感覺有點堆砌，卻獨欠艇仔粥點睛之物（豬皮）少了一份爽脆口感、感覺像是缺少了什麼似的？最後兩碟小食，全以白灼（真面目）示人，魷魚鬚、豬肚、豬脷、粉腸 在沒有豪裝底下更見可愛，尋回那些年風味。牽動心弦的美食、微風輕撫臉龐、此時此刻無聲勝有聲！  …Read More

吃避風塘炒蟹的機會倒不少，但真真正正在避風塘吃炒蟹嚐海鮮，倒又未試過。信記開業於銅鑼灣避風塘，「餐廳」由數艘舢舨組成，每艘舢舨設置餐枱一張，每一時段只服務一組顧客。廚房設於一艘較大的船上，並作小舢舨停泊倚靠之用。邊吃邊看廚師準備食物，亦有一番風味。每用餐時段一小時四＋五分鐘，設最底消費。四人套餐一千四百餘元，海鮮美食如下：白灼水魷魚：水魷魚幾有口感，不過味道較淡薄，要倚賴醬料作調味。白灼豬脷粉腸：兩款食物皆不是小弟所好，所以無試過。白灼基圍蝦：蝦肉鮮味爽口，好味！白灼東風螺：螺肉結實鮮甜，搭上甜醬來吃，更有一份懷舊味道。避風塘炒蜆：炒蜆炒得乾身入味，醬汁微辣濃郁。避風塘炒蟹：一份四人餐也有兩隻肉蟹，份量十足。蟹肉豐盈結實，味道甜美。避風塘葱蒜不會過鹹過油膩，雖蟹羔不多，但已夠香口調味。白灼韮菜花：比較少用上韮菜花作油菜，入口無渣，並帶點清甜味道。叉燒/燒鴨河：叉燒過薄過瘦，燒鴨亦無甚特別。河粉有點似金邊粉，幼身滑溜，唔錯噃！艇仔粥：粥底較稠身，但尚算清香白滑。在寒冷的環境下吃一碗熱粥最好不過。白灼芥蘭(另加菜式)：OK。豉油皇炒麵(另加菜式)：個人覺得既鹹又單調，不是我杯茶。因食物款式不算太多，三百餘元一位不算很抵食。不過，計及特別用餐環境，可以一試。…Read More