The Graces Restaurant (Lee Theatre Plaza)

環境4分：中式酒樓格局但裝修有婚宴feel，好光猛，樓底夠高，人多都唔太嘈，可以畀四分。衛生4分：見到啲碗碗碟碟都幾乾淨，有獨立透明包裝牙籤更為衛生，四分。服務4分：侍應落單快，上菜仲快，清理啲污漕碗碟都唔慢，又幾好禮貌，都係四分。 味道4分：1)      湯河同湯瀨最快到，湯底一樣清清地，兩隻粉都好滑吓。2)      跟湯河另上碟叉燒好鬆又軟，好食過跑馬地間名店多多聲。3)      跟湯瀨另上碟燒鵝皮夠脆同薄，Ｄ胸肉又唔un，正過中環名牌Ｘ記Ｎ倍。4)      雞絲粉卷唔油又夠味。5)      節瓜餃入面有粉絲，節瓜，木耳，等等，脆脆地。6)      四色點心拼盤呢就最抵，兩個人食有齊最大路Ｄ蝦餃同燒賣，好睇又好味，份量剛剛好。抵食4分：飲茶嚟講環境同衛生都算好，中午放食飯時段竟然有多款20蚊選擇嘅點心，確係超值。…Read More

店鋪位於利舞臺廣場20樓，利舞臺廣場入口喺正時代廣場對面，十分就腳。從地下扶手電梯上一層，經過商店便見到電梯大堂，有電梯直達20樓。上到嚟全層都係呢間酒樓，裝潢十分華麗。嚟到一點半，午飯時間，都比較多人，好彩店員都好迅速咁幫我哋搵到張二至四人枱俾我哋兩個人坐，座位很舒適。兩點前落單可以點優惠點心。落單後，食物很快便送到。潮蓮燒鵝瀨一碗 $48燒鵝皮好脆，絕對係皮脆肉香，估唔到酒樓都可以做到呢個水準。瀨粉還附有兩條新鮮菜心。黃金炸饅頭 $18呢個係優惠點心之一，熱辣辣，外皮脆卜卜，應該係即炸先有呢個效果，高水準，好抵食。雞絲滑粉卷 $18粉卷熱得燙口，好新鮮，粉皮好滑，肉涵香甜。海味扒瓜甫 $18都係優點心之一，清清地，健康之選。鮮人蔘淮杞燉雞湯 $48呢個廚師推介嘅燉湯，人蔘味濃，好夠熱，感覺好下火，仲附有好多湯料。喺銅鑼灣呢個地段，可以舒適咁坐咗一個下午邊食邊傾談，由好多人坐到啲人散晒都冇俾人趕，哈哈，價錢又唔算貴，可以再來！…Read More