以前唔食得辣，行經「嫲嫲辣辣」都只會掂行掂過。不過自從我同同事一齊修煉成功後，就對食辣產生興趣，呢日仲相約咗去餐廳挑戰一下😜。雖然我講到咁，但其實餐廳都有提供唔辣嘅食物🤣，就連干鍋都係。呢度有做午市套餐，分兩個類別：干鍋客飯同小菜客飯，後者會相對平啲，不過無論邊款客飯都會送指定飲品，並免收加一服務費。我哋分別嗌咗干鍋同小菜，再Share食，咁就可以一次過食哂兩款口味✌🏻。午餐份量都多㗎，又有成碗飯🍚，一定食得飽。干鍋客飯($69)，🍲干鍋口味任你選，包一款鍋底同三款配菜，另再追加一款配菜就要多$20，都幾貴。先講鍋底，有四款可選，包括香辣、麻辣、孜然同蔥爆(免辣)。我毫無疑問地揀咗麻辣，因為麻味令人著迷。🌶辣度亦有得揀，由微辣到火爆辣，而我哋就當然由BB級食起。上碟後第一下感覺有啲不安，我明明嗌微辣咋喎，點解會嚟咗個辣椒山嘅😳。不過食落發現佢係合乎商品說明條例，辣度係有嘅，但輕鬆食到，而且麻味同鹹香亦都好足。⚠️留意返，食到尾要有心理準備個底有少少油，但實屬平常事。配料方面，款式激多，有成28款葷菜(肉類及海鮮)同30款素菜(蔬菜及菇類)，實在令人眼花撩亂。我哋要咗豬頸肉、雞腎同埋茶樹菇，三樣份量都多，夠餸食晒成碗飯🥢。豬頸肉有好多片，雖然佢無好似泰式咁將佢煎香，但都幾好食、好索味🐷。長長嘅茶樹菇口感爽爽的，佢比其他菇多一份香氣🍄。而雞腎就麻麻哋，因為太碎濕濕喇，喺一堆辣椒入面，好難搵到佢哋出嚟🐔。蓮藕仔炒牛肉($56)，云云菜式之中揀佢係因為見到有蓮藕仔，莫非佢就係我早排食過嘅「藕藤」，而家先知佢都幾常見🙈。蓮藕仔超爽脆，無渣，入面嘅細孔將餸汁鎖住，每啖咬落都爆哂汁。🐮牛肉係用上鮮牛片，份量唔少，兼且幾大片；其他配料仲有芹菜、紅椒同木耳等。呢碟炒牛肉嘅辣同干鍋有所不同，依款辣帶少少酸，幾開胃🤤，而且芡汁亦比較多，適合撈飯。跟餐送嘅豆漿屬正常水平🥛，估計係餐廳自家製，味道幾清，有豆香，亦唔會太甜。我哋嗌咗凍飲，因為驚要用嚟滅火，但最終唔使，下次可以嗌熱嘅。環境方面，餐廳面積唔大，座位格局有啲迫，不過幸好每枱都有放上隔板，令到客人之間嘅接觸減少。再者，整體衛生亦幾好👍，餐枱乾淨無污垢。冷氣夠凍，同樣係呢度嘅一大優點。總括嚟講，食得辣之後真係發掘多咗好多美食😋，原來嫲嫲辣辣好好味味，哈哈。價錢方面，就咁睇會覺得唔算好平，但其實食物份量多，菜式又夠特別；其他地方食干鍋，隨時索價兩倍添，所以值得推介。我會再嚟幫襯，下次要挑戰高一級辣度先😛。…Read More
