今晚去左元朗一間日式餐廳野川拉麵之深宵食堂食晚餐，餐廳從招牌至店內都係繽紛嘅霓虹燈裝飾，營造出一種現代與傳統交融嘅氛圍。坐低時發現張櫈係用七彩顏色嘅鐵桶製成，獨特設計甚有玩味感｡ 食物種類除左拉麵、烏冬外，仲有刺身、壽司、小食、串燒、甜品，飲品有更多選擇，啤酒、特飲、普通飲品等等，同朋友一邊食一邊飲，非常愜意｡ 我地點左兩個主食，一d小食，一個壽喜燒同飲品。牛肉壽喜燒：先上檯嘅係一個gas爐，然後到未煮熟嘅牛肉鍋，一邊滾嘅時候，傳黎陣陣壽喜燒特有嘅醬汁香味，牛肉鮮嫩多汁，唔會太肥，甜甜嘅醬汁，搭配生雞蛋，美味無比。軟殼蟹天婦羅：炸粉薄而且香脆鬆化，做到天婦羅外酥內嫩，而且每一啖都咬到有蟹肉，蟹肉散發出海鮮嘅鮮甜味道，真正感覺到自己係食緊蟹。吉列炸蝦配綠茶冷麵：金黃色嘅脆脆炸蝦，搭配清爽嘅綠茶冷麪，帶有淡淡茶香，再加埋特製調較嘅芥茉鵪鶉蛋冷麵汁，味道香濃。吉列豚肉讚岐手打烏冬：讚岐手打烏冬Q彈有嚼勁，搭配上濃郁嘅豬骨湯底，非常美味。而吉列豚肉炸得外脆肉嫩，外層酥脆、鬆化、乾身，豚肉juicy夠厚身。椒鹽雞軟骨同炸魷魚鬚都係送啤酒之選，兩款都炸得酥脆美味。雞軟骨脆口入味，椒鹽味香濃，一口一粒，非常好食。魷魚鬚雖然比較細小，但外層非常脆口，食落香甜又鮮美。魷魚牙有嚼勁，但又唔會煙韌。小食拼盤：包括脆米流心芝士波、榴槤炸彈、芝麻雞翼、吉列魚柳手指、即炸蝦片，呢個好抵食，份量足夠。芝士波係年糕，外面脆脆，入面軟糯，芝士香濃仲流心添。而榴槤炸彈外脆內軟，榴槤香濃，讓人回味無窮。青檸柚子梳打：結合左青檸同柚子蜜嘅酸甜味道，再加上氣泡水冰涼口感，令人倍感清涼舒爽，亦有助減膩｡ 整體而言，餐廳食物豐富多樣，味道好。服務員亦好勤快又有禮貌，令人食得開心又滿足，下次會再黎｡ …Read More
