Sushi Kin (Closed)

好朋友生日，禮物就免喇，一黎怕唔啱用，實質係懶得諗，所以同佢食餐好嘅代替。銅鑼灣Cubus出名多高級餐廳，其中鮨金和食料理係當中高質素之餘性價比亦較高嘅日本菜，佢除左有刺身壽司之外，亦有和牛Shabu Shabu。鮨金嘅店面比好多鮨店都要大，佢一邊係壽司吧檯，另一邊係普通餐枱，對於人多嘅食客傾偈會方便啲。朋友鍾意食魚生，而鮨金嘅刺身/壽司廚師發辦套餐就有三個唔同價位，由最平$1,098到最貴$1,798，我地揀左最貴嘅套餐彩雲($1,798)，佢包左24道菜，當中包括10款刺身同6款壽司/卷物，相比起好多高級鮨店都抵食。前菜 - 先黎三式前菜，最前面山芋蓉配水雲，山芋蓉本身冇乜味，不過配左下面嘅酸汁就好開胃，上面再放左三文魚籽點綴，下面嘅水雲有啲似髮菜。酸酸地好開胃。右上角係玉子豆腐，好滑溜，上面係黑魚子。左上角係黑梅背煮蘿蔔，黑梅貝有啲似東風螺，蘿蔔好腍冇渣。蟹肉蒸蛋 - 蒸蛋熱辣辣仲好滑，入面除左蟹肉仲有有冬菇、蝦同白果。師傅準備緊刺身時，可以先食啲醃菜，我最鍾意辣蒜頭，好惹味。室津蠔 - 生蠔超肥美，海水味適中，非常新鮮，食之前可以落少少青檸汁。左口魚 - 哩碟刺身分左兩個部份，前面厚身啲嘅係邊位，後面係薄切。左口魚魚味比較淡，薄切蘸酸汁食令魚鮮味更加突出，而邊位就可以蘸豉油食，口感爽口啲。平貝 - 同一款刺身，師傅用左三種唔同切法，味道雖然一樣，但食落就好唔同，我特別鍾意右邊嘅切法，因為特別厚身口感比較有口感。油甘魚 - 平時食油甘魚刺身都係食魚腩多，但今次就食倒兩個比較少食倒嘅部份。前面係油甘魚魚鮫，魚油非常豐富，後面係腦天，即係油甘魚頭頂嘅肉，魚味會濃啲，成條魚都係得嗰兩塊，非常矜貴。龍蝦 - 哩個set包左成隻龍蝦 ，師傅會將大部份龍蝦肉用黎做刺身，少部份用黎做其他菜式。龍蝦非常新鮮，放入口會感受倒龍蝦微微嘅震動，再配埋沖繩海鹽食，鮮味無窮。燒吞拿魚下巴 - 食完五款刺身之後就到熱食，吞拿魚下巴好大舊，魚皮燒到好香脆，下巴肉油脂滿滿，非常邪惡！深海池魚 - 哩個深海池魚同樣包括左兩個部位，前面係魚鮫，後面係魚腩，油脂甘香得黎唔會太膩，口感爽脆。海膽 - 杯入面有兩款唔同色嘅海膽，前面深色啲嘅係鹽水海膽，後面淺色啲係馬糞海膽，兩款海膽都非常鮮甜，不過前者味道就比較清甜。拖羅 - 一次過試勻大拖羅、中拖羅同中中拖羅，大拖羅超級肥美，入口即溶之外完全冇筋，油香味完全唔係中拖羅可以比。明太子龍蝦餃子 - 餃子非常熱辣辣，餃皮好薄好脆，中間釀左頭先用剩嘅龍蝦肉同明太子。龍蝦肉肉質結實彈口磯邊卷 - 第一次食磯邊卷，一般做法係用沙甸魚、芽蔥同醃蘿蔔卷成，但哩度嘅磯邊卷就用左池魚、鯖魚、紫酥葉同酸薑，紫酥葉同酸薑哩兩種食材本身味道就好大唔係人人能夠接受，但估唔到夾埋一齊酸酸甜甜咁又幾好食。赤身壽司 - 赤身雖然比拖羅平又冇乜脂肪，但食落比較有咬口，師傅喺上面已經加左醬油，就咁食都唔錯。梳子魚壽司 - 師傅用火槍輕燒過梳子魚，魚油都迫晒出黎，油香滿滿。牡丹蝦壽司 - 牡丹蝦本身已經非常鮮甜爽口，師傅再喺上面加埋蝦膏同自製嘅蝦油，蝦味特別濃郁。鮟鱇魚肝壽司 - 鮟鱇魚肝非常軟滑，所以佢亦好似豆腐咁好易爛，但壽司送上時魚肝仲可以保持原整，可見師傅嘅手技。魚肝半溶口感但食落又唔會太膩。粟米 & 玉子 - 粟米雪凍左，咬開好多汁又香甜。玉子燒好軟滑，口感似食緊布甸咁，仲好香蛋味。魚湯 - 魚湯落左好多魚骨去熬，煮到奶白色，非常鮮甜。水果 - 係蜜瓜同蘋果，蘋果好爽甜，不過蜜瓜未係最當造嘅時候，就唔算太甜。海鹽雪糕 - 最後食埋個雪糕，海鹽雪糕鹹味點到即止，食完大滿足。總結，哩類高級鮨店，食材新鮮度基本上無庸置疑，而鮨金相比其他鮨店差唔多價位嘅廚師發辦套餐菜式更豐富，食完真係會有好飽嘅感覺。今次喺鮨金食倒比較少見倒嘅油甘魚魚鮫、腦天，又見識到用唔同刀法處理平貝出黎感覺完全唔同，另外磯邊卷嘅創新配搭亦令人有驚喜。…Read More

相識紀念日，先生定好枱食Omakase，這晚來到銅鑼灣開平道食廈 Cubus的『鮨金』晚膳，餐廳的金漆招牌好金呀～～室內貫徹金碧輝煌的日式設計風格，座位簡約又舒適。經理介紹『鮨金』除主打Omakase 外，也引入日本不同產地的最優等和牛，所以我們決定點2 個套餐，分別是廚師發辦 < 彩霞 > 和 ＜茶梅＞， 一次滿足兩個願望。廚師發辦 - 彩霞 $1680/位 前菜：蝦夷螺 ＞粟米凍 ＞ 水雲 粟米凍最特別，入口即溶， 好似飲緊栗米湯。水雲都唔錯，有三文魚籽同山芋蓉， 酸酸甜甜好開胃。 刺身拼盤：伊勢海老 ＞ 石垣鯛 響螺 ＞ 油甘魚薄切石垣鯛，好爽口！響螺，口感爽脆又彈牙，超鮮甜 ！！龍蝦，肉質透亮有彈性，正正正！！！ 鹽水海膽，有金箔玫瑰好靚靚，超鮮甜。刺身拼盤：金目鯛 ＞ 池魚配三星漬 梳子魚 ＞ 左口魚海膽卷金目鯛， 色澤紅潤，香滑夠厚度。池魚，肉質細膩甘香，令人齒頰留香。 梳子魚，炙燒過，帶些微焦香脆口。海膽卷，左口魚薄切，透亮清鮮， 海膽份量多，唯開始溶化及微腥。極品拖羅，配金箔魚子醬， 油脂甘香，入口即溶。壽司＋卷物 6貫 ： 赤身 ＞ 喜之次 ＞ 赤貝 赤睦魚 ＞ 銀鱈魚 ＞ 黃瓜卷喜之次， 肉質晶瑩透亮， 嫩滑又爽甜， 油脂豐富，完全無腥味。 赤鯥魚，魚皮輕炙燒過，入口即溶。銀鱈魚，刺身級別，柚子胡椒帶微辣， 鮮甜且入口即溶。燒吞拿魚下巴， 香噴噴， 肉厚嫩滑， 骨位仲燒到脆卜卜添 ！和牛餐同樣吸引 ～～廚師發辦 - 茶梅 $1080/位整個套餐都是A4，A5 頂級日本和牛，仲有安格斯牛小排坐鎮，有圖有真相，和牛色澤粉紅，霜降飛花，油花細密，真係好想快d 再去一次 ！！！重點： 先食和牛，再食蔬菜 ！！！套餐有6 款唔同地方的和牛，每款都柔軟嫩滑，原本想試真d 邊款最美味, 但真係每款都好驚喜，油香四溢，個人認為A5 的飛驒牛是當中的表表者， 無論油花， 軟滑度，牛味方面都非常出眾，做到入口即溶既效果。和牛輕滾幾秒，沾上醬油同食，肉質好柔嫩，入口慢慢融化，煮完牛肉，成煲湯甜到不得了，再煮蔬菜和讚岐烏冬，很讚。在『鮨金』過了一個好開心放鬆的夜晚，整體在服務和食物方面都頗高質素，鹽水海膽和極品拖羅尤為出色，和牛壽喜燒也令人垂涎三尺， 總括來說，所有紀念日，我都想來鮨金慶祝。鮨金地址：香港銅鑼灣開平道1號 Cubus 12樓月光太太🌙…Read More

環境5分：銅鑼灣日本菜餐廳，樓上舖地方又大又見洗，啲散枱都隔得好開，不過Omakase一定要响壽司吧食先最享受同興奮，可以畀五分。衛生5分：地方好乾淨企理，光猛衛生，一樣畀五分。服務5分： 師傅非常專業，睇住佢續樣海鮮慢慢處理，解釋邊樣壽司需要點豉油同邊樣唔需要點豉油。樓面服務員都好好招呼，不斷加熱茶，效率高，服務滿分。5分：（綺羅星：HK$980/位）1)     前菜有池魚，海蜇，同東風螺，全部都好開胃。2)     蒸蛋好滑，一攞出嚟熱辣辣，入面有一絲一絲嘅蟹肉。3)     深海池魚壽司好鮮甜好新鮮。4)     間八魚腩上面有一粒粒脆脆，顏色非常鮮艷。5)     金目鯛壽司連埋魚皮一齊食，非常特別。6)     赤貝壽司非常爽甜。7)     赤鯥魚壽司新鮮好肥美。8)     大大隻蟶子有松露忌廉汁淋上面，食落非常鮮甜，好鮮爽。9)     吞拿魚醬油漬壽司顏色紅卜卜，非常好食。10)  銀雪魚壽司有非常濃烈嘅柚子同胡椒味，配非常肥美嘅銀雪魚，魚身用火槍輕輕燒過迫出好香嘅魚油。11)  蕃茄鮮甜。12)  牡丹蝦大大隻，非常非常新鮮爽口彈牙，上面配啲膏，唔使點豉油都非常鮮味。13)  拖羅上面已經有少少Wasabi，唔需要點豉油，直接食佢嘅鮮味。14)  同樣地海膽壽司上面已經都有wasabi，海膽份量非常充足，配著脆脆嘅紫菜，非常滿足。15)  個湯用左好多魚淆埋好濃嘅魚湯，超級好好飲。16)  生果清甜。17) 青森蘋果雪葩好清新。抵食5分：一千蚊左右食個壽司Omakase晚餐，有成十六道菜真係唔講得笑，樣樣新鮮時令，感覺非常抵食。…Read More

喜愛日本料理的朋友相信都會有一個念頭， 既然疫情關係未能返鄉下享受美味的土產， 但又不想繼續食迴轉壽司， 那不如豪一次 ～ 高質 omakase。晚餐餐牌上，有三款以海鮮為主的 omakase  :  分別設有16道菜、 20度道菜、 24道菜可供選擇，而我最終點了16道菜那款試試水温先。綺羅星( 16道菜 ) $9801前菜一碟三款； 有海蜇、芝麻豆腐、 梅貝 (即海螺)。 本身喜歡吃芝麻的我， 最欣賞那一粒有如吃芝麻醬感覺的豆腐。2 蟹肉蒸蛋茶碗蒸口感細滑， 清淡蛋香更顯蟹肉鮮甜 ( 壽司5件 )3 墨魚壽司厚肉飽滿，新鮮墨魚最吸引人的地方是那爽得來帶小小黏稠的口感。4 左口魚配紫蘇花甘香肥美 ， 油分豐富 ，以花入饌除了美觀， 原來配合得宜， 還會為食物帶出意想不到的味道。5 帶子壽司厚肉鮮甜， 非常彈牙， 廚師運用刀功在帶子上所𠝹出來的紋理，不但美觀，亦令口感更豐盈。6 牡丹蝦壽司 (石燒)牡丹蝦肉質鮮嫩， 味道清甜， 僅止於此 ？在廚師的創意烹調下 ，加上秘製蝦膏，真的可以令味道提升多好幾倍👍🏻， 充滿餘韻的濃郁蝦味，真的叫人食指大動，一試難忘。7 深海池魚腩顏色粉嫩， 表面看不是很肥美 ， 在口腔中卻是另一回事， 魚油超級豐富8 油甘魚鮫看著廚師由整件油甘魚鮫 ， 一刀一刀 𠝹出 適合作壽司刺身的部份 ， 感覺新奇。魚鮫位運動量比較大， 肉質較結實， 所以口感特別爽脆， 油脂膠質重， 味道甘香9 針魚壽司以針魚紫菜拼湊出美麗的形狀， 背後有賴廚師的力功、耐性、 心思 。 針魚本身味淡 ，洒上 柑柚皮 ，卻又清新味美， 紫菜的甘香，也起了提鮮作用。10 板海膽壽司廚師差不多用成行海膽塞入紫菜壽司中 ， 夾雜著海水味的海膽， 初段味道鮮甜，後續的鮮味才令人依依不捨。廚師會不時會為客人增添精緻的漬物，方便客人清清味蕾11 一品料理廚師話一條體積大的三文魚，下巴部份可供四位客人享用， 感覺特別 ，三文魚下巴燒至外皮 香脆金黃 ，內裏肉嫩肥美，肉汁豐盈， 魚脂四溢，口感絶對一流。12 拖羅看那些脂肪分佈， 肉與脂肪比例已反影拖羅的肥美程度 ，入口即溶，配少少咸味的魚子醬， 稍稍抵銷了油膩感，兩者味道得以平衡13 蝶魚魚邊略為火炙， 冒出閃閃生輝的油光 ，入口脂香四溢14 𩶘魚湯淆至奶白色， 熱騰騰的魚湯， 味道勁鮮甜， 魚味濃郁 ， 喝一碗仍有點意猶未盡的感覺15 旬菜  新鮮日本無花果， 顏色粉嫩， 味道清甜，口感綿密， 令人念念不忘16以味道清甜的日本密瓜與清爽多汁的梨子作為飯後果 ~ 大滿足。今晚任由具豐富知識及經驗的廚師發辦，挑選最優質、時令日本食材，以巧妙的烹調手法所製作出的料理，令人驚喜，彷如經歷了一次既愉快又新鮮的美食之旅。…Read More

因為今日好開心，所以約同好友一同吃大餐，經一番商量後就決定去這裡吃一個不一樣的日本料理。坐下後，經經理一番介紹下，我就選了一個又有刺身，又有壽司，又有熟食的彩霞套餐，一於今晚豪一晚啦！前菜有海蜇，東風螺和芝蔴豆腐，最出色是芝蔴豆腐，很香芝蔴味，豆腐又滑，東風螺用上醬汁煮成，很少這樣吃東風螺，海蜇都很爽口。蟹肉蒸蛋，用上上湯蟹肉來蒸蛋，很鮮味可口。刺身有十款，分兩個階段上，刺身很新鮮，長崎蠔很爽很鮮甜。左口魚薄切加上醋汁番紫蘇花，味道很夾。白象拔蚌很鮮甜，很爽口，賣相也很美！龍蝦刺身，肉質爽，清甜可口。深海池魚刺身，肉質實淨，很鮮美。師博很詳細的介紹每一個菜之餘，也會為每一項的菜而出一些醃菜令人客可以清一清口腔，他好多時都會把醃菜都整得很有心思。就算是醃蘿蔔都會切片捲入蕎頭，味道很豐富，一點都不會馬虎呢！第二part 的五款刺身，師傅用上活油甘魚鮫做刺身，真的未曾試過，又刁鑽，口感爽爽的，肉感紮實。很好吃！熒光墨魚很鮮美，加上醬油和薑蓉，有另一番風味！針魚刺身，師傅很有心機的用上紫菜，再放上針魚，再切一段段，再砌成樹葉形態的針魚刺身，很有心思，很驚喜，聽師傅說，因針魚吃上去易散，故他想到用紫菜放底，再加入針魚，令食客吃上去不會有散的感覺，師傅真的想得周到！鹽水海膽成杯上，份量很多，味道很鮮甜，味道比一般的濃郁，真的百吃不厭，師傅還加上金鉑裝飾，很精緻！拖羅刺身，拖羅上加上魚子醬，口感當然無得頂，油脂分怖均勻，魚子醬又減低了油脂的油膩感，非常好吃！燒魚一品料理，今日廚師為我們做了一個燒吞拿魚下巴，揀的部位很刁鑽，聽師傅說吞拿魚下巴都很大舊，可以供四人食用。魚肉很滑，我還吃到下巴裡的骨膠原，燒得也很香，下巴出奇的多肉很好吃！北寄貝熱食加蟹肉海藻汁，將北寄貝輕輕燒一燒，加入蟹肉海藻汁，很甜甜嫰滑，北寄貝還很多肉，真的吃得很滿足！壽司４款，金目魚加魚肝醬壽司，用上矜貴的金目再加上魚肝，鮮味得來帶點香濃，簡直是濃淡得宜，很出色！池魚壽司新鮮，肉質同深海池魚不同，沒有深海池魚的那麼結實，多一份軟腍，加上薑蓉，很可口！赤鯥魚壽司 ，我就從來沒有吃過，今次也是第一次吃到，赤鯥魚用上火炙做，香軟濃滑夾雜一起，真的很難形容，總之就很很很好吃！鰈魚邊壽司，鰈魚邊肥質很肥美，油份也是很高，一吃上去就已經深深愛上，甘香的魚油在口腔不停徘徊，非常好吃！今日的旬菜原來是無花果，這裡用上日本無花果，很香很清甜可口，熟度啱啱好，很少吃到這個質素的無花果，好味！自家制的立魚湯，不用多說，鮮甜無比，溫度又夠熱，喝上去令捨不同！吃到最後就是時令水果，今日有蜜瓜和香梨，為今日的晚餐劃上完美句號！…Read More

由於大肚嘅關係，向來鍾意食魚生壽司嘅我真係餓左好耐啦！為左滿足我呢個餓鬼，老公專登book左呢間有質素嘅和食料理俾我食個夠呀!呢間嘅食材好新鮮呀！先食一個前菜先!賣相好靚呀！好開胃呀！之後就食左刺身類啦！!名唔係好記得啦!好有印象嘅係飛魚呀!魚味好濃郁呀！一d煮唔腥呀！好想encore 呀！另外有個帶子+螢光魷魚，個帶子口感好實在呀！非常鮮甜!螢光魷魚食落有爆醬嘅感覺，完全唔腥呀！我之前喺其他地方食。。真係放唔到入口吖，呢到嘅海膽同拖羅就一定會有嘅，海膽加配左一d金薄，更顯得矜貴呀！味道鮮甜呀！拖羅就加左d魚子醬喺上面，睇佢好似好肥美咁，但加左魚子醬之後一d都無肥膩嘅感覺呀！另外仲有兩款魚生薄片，其中一款上面放左一支花，原來係紫蘇蘇嘅花，將d花同魚生一齊食，好好味呀！加埋個汁有少少酸，好醒胃架!刺身食完之後，就有一款熟食，好有驚喜呀！係爆馬頭魚!特別在無刨鱗呀！連埋一齊食，d鱗脆卜卜，好滋味呀！食完呢個熟食到壽司啦！壽司師傅好貼心咁問我d壽司要唔要少飯。。。梗係要啦！我唔想變大肥婆呀！之後係6款壽司，最有驚喜嘅係鯖魚。因為喺我心目中鯖魚係好腥架，無論熟定生我都唔會叫，由於今次係廚師發辦，所以無得揀，但呢次真係好好食，一改我對鯖魚嘅印象呀！仲有一款係銀雪魚，原來銀雪魚唔係淨係西京燒架，做魚生壽司都係一流呀！其他每一款都好正好好味!食到最後就有一碗魚湯，嘩，好鮮甜味美呀！雖然呢餐應該唔平!(唔洗我俾我唔知幾錢呀)但我覺得物有所值!會再去!(唔夠位放相，下次食再放壽司嘅相)…Read More

臨急抱佛腳嘅女朋友，係壽星生日嘅早上先嚟openrice搵下有邊間omakase好食，揸唔定主意嘅我又問下男朋友意見啦，點知原來我哋之前已經食過！真係比佢一言驚醒洛克人！最終睇左好多間之後，結論就係都係食返鮨金，原因係其實出嚟食omakase有時比呢啲價錢，係真係想食啲挑選過嘅好貨，而唔係坊間有好多比啲一定好食既食材你，即係係咪都帶子拖羅海膽，咁我去連鎖果d都識叫啦。而我哋食過鮨金嘅質素算幾高，所以最後決定就book返佢哋喇！今次我哋揀左full set, 但今次嘅食材偏油脂豐富，所以食完係超級無敵飽！師傅都係會按例問返有冇咩唔食同喜好啦，咁我哋乜都食既，真係比師傳決定啦😆成個餐廳環境都好舒服，坐吧檯可以睇住師傅處理食材啦，又可以期待下有咩食，同埋師傅每次serve 食物既時候男朋友次次都估錯係咩嚟，有互動又好笑😂😂咁full set既菜式太多放唔曬，只好揀d特別想講下既菜式啦！前菜係日本番茄啫喱凍、汁煮凍螺、海蜇，啫喱凍好好食呀！汁煮螺個汁呢..有少少似鮑魚汁，不過好入味都好食，海蜇就稍為平淡一啲。上刺身啦！呢個冇記錯應該係右口魚刺身，要特別講下刺身上面嘅紫蘇花，要用手滅出嚟連埋刺身一齊食，令到成塊刺身嘅油膩感減輕，成個鼻腔都充斥着紫蘇花嘅花香，真係好夾。呢個係由一大條八爪魚酥上面拔出來嘅兩個吸盤，加埋肉身嘅刺身，師傅本身磨左一層岩鹽係刺身上面加埋檸檬墊底唔使點豉油都已經好鮮味。吸盤食落去反而會比較有咬口所以可以點個醬汁食。睇佢一粒吸盤咁大個，成條觸鬚究竟有幾長，係一條幾大條嘅八爪魚先做得到呢😆跟住不得不提嘅就係呢一個日本北海道嘅厚岸真蠔，師傅喺蠔上邊加咗小小魚子醬，魚子醬嘅鹹香加埋真蠔creamy得嚟後尾越食越fresh,雖然同平時食法國蠔嘅感覺唔一樣，但都食到好新鮮同好豐富嘅味道，唔會過鹹亦唔會過分creamy，下次去日本都要再搵一啲蠔店去試吓之後要講嘅係呢一個秋刀魚刺身，呢個係我第一次以刺身嘅方式去食秋刀魚，因為平時秋刀魚都頗腥一定要煮熟，師傅用咗姜蓉豉油俾我哋點個魚，都係用以癖腥，再包住蔥茉去食，雖然平時我都算係咩都食，但下次我知道我師傅問有咩唔食嘅時候，我會講唔好要秋刀魚刺身😂😂 因為真係幾有銀皮魚既獨特味道，但又講真，我到而家都仲記得係咩味。其實講到而家都仲係講緊刺身咋，壽司都未講到，仲有好多菜式都好特別想講例如係埋尾嘅嗰個魚湯，超級鮮甜既魚味，飲完係勁滿足。 不過講晒嘅話就真係有少少長氣啦，而且食廚師發板都係希望師傅會比到一啲驚喜自己，所以都係唔係呢一度講咁多菜式上嘅嘢，留返大家去嘅時候再同師傅慢慢發掘!…Read More

果然冇令我失望，E一餐嘅廚師發板確實令我有驚喜，乜嘢都有得食，賣相同埋質量亦比普通的好很多，價錢亦不算太貴，廚師發板什麼也有。有唔同價錢嘅廚師發板，視乎你想食啲乜嘢，乜嘢都真係有得食。亦都可以揀普通嘅晚飯，例如定食首先係個前菜，然後就有不同的刺身，可以見到賣相10分特別要講下中間嗰個拖羅，10分肥美，旁邊亦有不同的刺身，侍應教我地跟着不同的程序食同埋有特定的醬汁點海膽真係好好味，成杯咁樣上，真係未見過，份量好充足。適合我依個海膽精！仲有金箔點綴，成件事都變得10分高貴。豪係嚟自廣島的，成隻手掌咁大隻，真係超級好食，食過返尋味，有一刻諗住叫多隻之後仲有八款壽司，侍應亦教我地要跟着次序食，才可以吃到壽司的鮮味當然仲有個海鮮湯作結尾， 10分鮮甜。…Read More

第一次嚟試Omakase，叫咗個翠竹set前菜胡麻豆腐︰豆腐、秋葵及麻醬混成混醬放喺蓮藕上，最頂仲有兩粒腰果，脆脆綿綿口感番茄白酒啫喱︰有上層白酒、下層番茄，味道偏酸，酒味唔太濃雜菜雞肉卷︰外層鬆脆，入面夾住紫菜蘿蔔及雞肉刺身北海道右口魚: 4片薄切上灑咗啲柚子乾，加上紫蘇花及四季紅，魚味淡淡但愈咬愈出味，加少少酸汁，魚味更濃郁活赤貝鮮甜又爽口，連裙邊都唔會浪費，包喺紫菜青瓜卷入面，原來裙邊比一塊塊仲爽口㗎！瑩光魷魚每年3至5月嘅瑩光魷魚都係最多膏，之前只係試過生食，但今次就玩二食！生嘅加咗薑茸及芝麻，啲膏多到不得了，好香好滑；熟嘅就係蒸嘅，仲加咗啲酸麵豉，再用竹籤插住，賣相口感都好唔同，熟嘅膏就好似蝦膏蟹膏咁嘅味道，兩種都好正！池魚池魚堆內加咗薑、蔥及芝麻，廚師再俾多兩塊紫菜我哋包住食，魚味超香濃，油脂甘香！！！海膽杯賣相震撼，最底層係青瓜片，中間係富山白蝦，最頂層係北海島根室海膽，鮮甜口感好幼滑，好香濃，連埋白蝦食口感一流！超級滿足！大拖羅第一次食方形大拖羅，一塊加咗鹽昆布及黃菊，另一塊就加咗wasabi及岩鹽。咁樣食令到件拖羅一啲都唔膩，同埋不論加幾多wasabi都唔覺攻鼻㗎喎！食完後滿口都係魚油但又唔會好膩嘅感覺真係正！豚肉泡菜卷豚肉肥瘦適中，加埋泡菜咬落好juicy帶微辣壽司小肌魚：肉薄而且好多細骨，所以不論點煮都唔係特別好味，但壽司師傅加咗鹽及醋後，就變成極品材料喇！加咗醋及柚子後，食落肥美肉質細嫩！賣相都好靚，好似織網咁嘅形狀！北海道活帶子：加咗岩鹽及青檸汁，咬開仲有一絲絲嘅肉油甘魚：肉厚肥嫩，口感細緻甘甜，油花均勻入口即融竹簽魚：又名梭子魚，春天至夏天先食，皮上有斑紋，魚肉油分少，不過魚皮就充滿油脂，輕輕燒過後啲魚油超級超級多！再加少少松露醬，肉質細膩，食到滿口油！喉黑：又名赤鯥，魚身光亮，魚皮滑溜，肉質鮮甜，被日本人視為刺身中嘅極品！燒過後脂肪豐滿，加少少芽蔥，食完冇咁膩！魚湯白色嘅魚湯一睇就知道非常足料，飲落非常有魚味甜品係雪糕，仲有多種味道可揀，好開心！坐得舒適而且服務員態度良好，廚師對每種食材都瞭如指掌，好似上咗一堂omakase咁！…Read More

今晚又想食壽司又想食魚生，所以選擇了翠竹，可以試到6款刺生、5款壽司，同埋一款和食先來前菜胡麻豆腐︰最上面有一粒腰果，之後有由豆腐、秋葵及麻醬混成的胡麻豆腐放在一片蓮藕上，好開胃番茄白酒啫喱︰有兩層，上層白酒、下層番茄，酸酸哋，不過不太覺有酒味雜菜雞肉卷︰外層脆脆哋，仲有紫菜同紅蘿蔔，不同的食材，大大增加口感同層次6款刺身開始北海島右口魚扇型嘅碟，分兩隔，上面放了4片薄切嘅右口魚，魚片上已灑了些柚子乾，配上紫蘇花和四季紅，下層是酸汁，仲有些辣椒蘿蔔茸，先吃了一片什麼也不加，清清的魚味，帶有些柚子香，之後把魚片卷上紫蘇花和四季紅，再點了些酸汁，魚味更濃，還有些紫蘇花香，四季紅本身有點辣，所以唔食得辣嘅就唔好放太多了活赤貝兩片活赤貝旁配有由赤貝裙邊做成的紫菜青瓜卷，先吃紫菜青瓜卷，清甜爽口，再吃活赤貝，點少少醬油，更鮮甜。瑩光魷魚每年嘅3至5月都係食瑩光魷魚嘅月份，最多膏，今次係二食，分別係生同熟，生的配上薑茸同芝麻，入口好滑，好多膏，熟嘅係蒸的，還加了酸麵豉，口感完全不同，而且比生的更甜。池魚一片片的池魚，還加了薑、蔥同芝麻，仲有兩片紫菜給你包往池魚食，原來紫菜都有分底面，魚唔好放响滑嗰邊，咁就唔會一邊食一邊掉下來，真係好多謝廚師嘅温馨提示，包好放入口，先來的是香脆的紫菜，接著是鮮甜的魚味，而且魚味越咬越濃海膽杯賣相好靚，最底層係青瓜片，然後放了富山白蝦，最上層係北海島根室海膽，一啖又有白蝦，又有海膽，味道濃厚又鮮甜，仲好CREAMY大拖羅兩件切成方形嘅大拖羅，一件上面放了鹽昆布同黃菊，另一件放了wasabi同岩鹽，先食放了鹽昆布同黃菊的那一件，鹽昆布中和了大拖羅的肥膩，再食放了wasabi同岩鹽的那件，呢件更鮮，原來wasabi同岩鹽係可以提升魚味。食完刺身到和食，係豚肉泡菜卷，好JUICY，少少辣，又甜甜五件壽司分別有小肌魚、北海島活帶子、油甘魚、竹簽魚同喉黑喉黑又叫赤鯥，炭燒後上面加上芽蔥，魚油豐富仲有些蔥香小肌魚係屬於江戶前壽司，仲加了醋同柚子，肥美又有清新嘅柚子香北海島活帶子加了岩鹽和青檸汁，肉厚鮮甜油甘魚油脂分佈平衡，肉質甘甜， 口感油滑幼細竹簽魚又叫梭子魚，係春天至夏天嘅，炭燒後再加上松露醬，鮮甜得來好野美味喉黑又叫赤鯥，炭燒後上面加上芽蔥，魚油豐富仲有些蔥香最後再來一個魚湯同甜品，滿足…Read More

今日跟老闆到銅鑼灣Cubus晚飯，在這間”鮨金和食料理”食Omakase，非常期待。看看餐廳，沒想到在這棟高級餐飲的Cubus，也有驚喜價錢。Omakase 粉櫻 $980Sushi Set壽司10件、和食1款、湯及甜品漬物：鰹魚花蒜粒、牛蒡、蕎頭、蘿蔔前菜：蕃茄啫喱、自家製泡菜、蟹肉蟹膏蕃茄啫喱有特色，帶微酸甜，好開胃，伴有食用花瓣。泡菜有點辣度，還有脆絲增強口感。蟹肉蟹膏魚子、青瓜。鰤魚壽司 - 魚味特濃，用醬油漬製法，質感柔嫩。真𩶘海膽卷 - 𩶘魚較有口感，海膽滑溜，配搭新鮮。右口魚壽司 - 師傅已調味，配上辣蘿蔔蓉，入口清淡，肉質帶點爽韌。深海池魚壽司 - 上面有竹炭鹽，帶出更鮮味，口感嫩腍。赤貝壽司 - 質感爽脆鮮味。螢光魷魚壽司 - 三大條螢光魷魚，鮮味十足，入口爆膏，配上酸麵豉醬、柚子。針魚壽司 - 質感爽嫩，鮮味。魚烏頭壽司 - 輕火炙過的，配柚子胡椒帶微辣，肉質腍軟。金目鯛壽司 - 沒有做火炙，魚皮亮身，配上風乾了的明太子碎，肉質柔軟而有口感。小肌壽司 - 入口帶點微酸，魚味特別，配上柚子和紫蘇葉的味道，十分豐富。赤鯥壽司 - 輕火炙過，油份豐富，魚味道夠香，肉質柔軟。火炙拖羅壽司 - 入口即化，油份豐富，回味無窮。海膽壽司 - 入口十分Creamy鮮甜。魚湯 - 魚味香濃豐富，而且膠質豐富粘嘴。最後來一杯咖啡啫喱雪糕，完滿。餐廳性價比高，下次再來。…Read More

同事話想帶我去試下公司附近廚師發辦的日本料理試下，於是相約了這個晚上來到這間餐廳試試。餐廳位於大廈的12樓，一出𨋢行入少少便是餐廳了，座位不算很多，還有一個包箱可供客人預約。我們安排坐在壽司bar枱，一方面可以看到廚師為我們準備食物，另一方面方便廚師跟客人交流互動！我們點了一個廚師發辦的套餐「金鮨」，包括有前菜、8款刺身、6款壽司、一款熟食、湯及甜品！對於女仔來說這個餐真的很飽呢！前菜：共有3款，包括酸汁車厘茄、麵豉豆腐配三文魚子及炸野菜薯餅！個擺位有種椰林樹影既感覺，好靚！車厘茄本身已經多汁，再配埋個酸汁特別開胃！豆腐跟平時食到既唔同，口感特別！炸野菜薯餅唔會炸得過火！8款刺身包括左口魚、北海道真蠔、海鰻bb、八爪魚吸盤、太刀魚、鮟康魚、海膽白蝦配黃金三文魚子、拖羅、鮫魚左口魚配有柚子胡椒汁，更能特出魚既鮮甜！北海道真蠔，海水味都幾多，而且蠔肉creamy!海鰻bb配冷麵汁、八爪魚吸盤及熟食八爪魚仔，第一次食海鰻bb，感覺很特別，好似食緊河粉但係又有眼睛的！八爪魚吸盤爽口，唔駛點醫汁都已經好鮮！海膽白蝦配黃金三文魚子，海膽好鮮甜新鮮，白蝦爽口，黃金三文魚子好QQ，有啲似食緊珍珠奶茶既珍珠！壽司方面有6款包括海膽三文魚子、針魚、帶子、燒拖羅、鹽昆布深海池魚、野生油甘魚！針魚配有薑蓉，能夠辟去腥味！帶子配韓式辣醬，帶子跟平時食到的不同，而且配有辣醬已不用點豉油食！燒拖羅配有脆魚仔，脆魚仔可以減去拖羅本身既油膩感，而拖羅亦入口即溶！唔太中意食拖羅既我都中意食！燒物為鮑魚天婦羅，呢款天婦羅真係第一次食，鮑魚爽口彈牙，而且配埋附有既筍一齊食口感又會不同還有一些蟹膏可以點黎食！而且呢坎菜式又像一藝術品一樣，擺位很美！係一個非常特別既體驗！𩶘魚湯，呢個湯係有好明顯既魚味，同平時飲既魚湯一樣都是奶白色的，清清地可中和油膩感！最後還有甜品士多啤梨奶凍，非常完滿！總括黎講，廚師上每道菜都會講解食法同介紹，而且如果你行開左會等你返黎先會再上俾你！廚師發辦黎講呢度價錢唔會話好貴！有機會一定會再黎！…Read More

今日係特別的日子！某人預備左特別的驚喜比我，就係帶左我去食「OMAKASE」即是廚師發辦。廚師發辦是由師傅為你挑選最優質、最時令的食材，也是日本料理的最高境界。某人聼左好多朋友的推薦先帶我過黎品嘗！我們點了兩個金鮨級別的OMAKASE。師傅是先會詢問我地有咩唔食/有無食物敏感，十分貼心 ！金鮨Omakase $1580/位。廚師發辦包括: 前菜，刺身（8款），壽司（6件），和食，湯和甜品。前菜包括：炸野菜薯餅，面豉豆腐配三文魚子以及酸汁車厘茄。前菜擺設美觀，都是較為開胃的小菜。三文魚子鮮甜與面豉豆腐互相配合。另外我很喜歡這個酸汁車厘茄！酸甜酸甜的，很開胃。八款刺身包括：左口魚、北海道真蠔、海鰻bb配章魚吸盤、太刀魚、鮟鱇魚、白蝦、黃金三文魚子配鹹水海膽、拖羅及鮫魚。左口魚：是日本經典的白身魚，肉質結實、爽口甘香。本身魚味道較為清，食用時蘸少少酸汁，令胃口大增 。北海道真蠔：雖然Size不大，但肉質肥美，口感較Creamy。配上青檸汁令鮮甜味更為突出。海鰻bb配章魚吸盤：海鰻BB口感爽滑！配上冷麵汁更能提升其鮮味。章魚吸盤撒上明太子粉，不用點醬油已經能將鮮味引出！太刀魚：鹽燒後的太刀魚肉質柔軟，配上薑蓉可辟腥。不得不提！師傅在燒太刀魚前加入了天然的岩鹽，令魚的鮮味提升不少。鮟鱇魚：一月至二月正是吃鮟鱇魚德最佳時節。鮟鱇魚肝軟綿香醇，入口沒有半點腥味，師傅配上酸甜的醬汁及海帶可減低肝臟的膩感。白蝦、黃金三文魚子配鹹水海膽：師傅先同白蝦鋪底，然後再加入黃金三文魚子，最後加入鹹水海膽。非常鮮甜，筆墨盡難形容。最後就是拖羅刺身及鮫魚，拖羅的位置是包著心臟的部位，味道較滑而且比起其他部位更位濃郁。鮫魚：肉質潔白，口感柔韌有嚼勁，味道鮮甜。接著就是壽司其中包括：鮫魚、針魚、帶子、野生油甘魚、三文魚子海膽、深海池魚和火炙拖羅根。鮫魚：口感柔韌鮮甜，師傅於壽司内夾著紫蘇令整體味道更有層次。帶子：厚切的帶子質感爽脆又有彈性，師傅配上韓式辣醬新奇有趣！但卻出奇地夾。野生油甘魚：野生油甘魚比平時的油甘魚肉 質更為肥美，入口滑溜柔軟 ， 油潤得來有著濃郁鮮甜的魚味。針魚：外表有點銀光閃閃的感覺，但針魚味道鮮甜，而且清新不膩！令人一試上癮。三文魚子海膽：粒粒晶瑩通透的三文魚子同海膽鋪滿整個壽司，一口放入！鮮美到非筆墨能形容。坐在席前欣賞師傅的手藝也是一種極至的享受。火炙拖羅根：全晚令我最形象深刻的一道菜！首先拖羅根經過火炙油香不斷滲出。羅根入口即化，油脂的甘香充斥著口腔。和食：天婦羅食得多！鮑魚天婦羅真係第一次食，鮑魚食落去鮮味十足又軟腍。鱲魚湯：魚湯鮮美醇正，味道濃郁，湯呈帶少少啡的奶白色！加上葱花和豆腐令到整提更有口感。最後就是甜品來作這餐飯的結尾！我亦都要多謝某人精心的挑選我先可以食到咁高質的OMAKASE，整體很完美！而且用餐的時候能深深體驗到師傅用心的烹調，以及他們對用料的執著！希望之後依然有機會再來品嘗OMAKASE。…Read More