講起大排檔，大家都會諗以前街邊嗰種煙霧瀰漫、人聲鼎沸嘅街頭風味。不過香港近年興起咗一批新派嘅室內大排檔，菜式有傳統亦有創新元素，仲可以嘆冷氣，啱晒大熱天時去食呀～一齊睇吓邊間啱心水！
必食荷葉清酒蒸青口 店小二
圖：南鯨
主打新派港式小炒嘅小店，同時保留懷舊風味，出品有誠意，無論三五知己或一家大細都啱齊齊嚟食餐好。荷葉清酒蒸青口以荷葉包住澳洲青口，加埋日本清酒去蒸，蒸出嚟啲青口又滑又入味，仲有淡淡酒香；萬字醬油雞用上日本萬字醬油、台灣醬油膏同李錦記甜豉油，雞肉皮薄肉嫩，醬汁香甜帶微微酒香，真係幾有層次。鍾意食香口嘢嘅朋友一定唔可以錯過避風塘茄子，外脆內嫩，炸得乾身唔油膩，配杯啤酒一流。仲有薑蔥爆鯇魚卜同糟鹵蒸馬友魚都值得一試㗎！
人氣靚裝大排檔 女人街食飯公司 
圖：餐廳走懷舊裝修風，氣氛有心思又有情懷，一入去就好似返咗細個嘅年代咁，配埋滿牆老香港裝飾，打卡度滿分！中西合璧嘅黑松露炸蝦多士係必點之選，蝦多士大大件，蝦肉爽彈，黑松露香味突出，香得嚟唔會太膩；黃金鮮魷炸得香脆，厚身有咬口，再裹上鹹蛋黃醬，邪惡又好味。海鮮就推介避風塘瀨尿蝦，鋪滿香脆炸蒜已經好吸睛，隻蝦仲長過手掌，肉質爽甜，啖啖肉冇得輸。另外小炒皇同啫啫芥蘭煲都係送飯一流，嗌支大啤用招牌戰鬥碗嚟飲，勁有feel呀～
西環摩登大牌檔 路邊攤
圖：joyceclt
新派大排檔嘅代表作，隱身街角但人氣極高，專攻創意小炒同懷舊風味，夠晒鑊氣之餘仲加入現代元素！主打自選菜式套餐可以揀6款或8款，就算少人去都可以食到多款餸菜。小食方面推薦胡椒雞白湯雲吞、蟹皇蒸水蛋同椒鹽雞髀菇，粒粒飽滿又惹味；豆豉粉絲蒸帶子都索晒醬汁，鮮甜得嚟唔會膩。主菜就不得了，脆皮南乳炸乳鴿香脆多汁；砵仔蠔上枱仲「jerjer」聲，夠晒熱辣辣！麻婆豆腐配油炸鬼好有新意，食落又辣又香。飲品方面都有驚喜，cocktail用上鹹檸薑、利賓納、益力多等港式元素，特色又解膩，啱晒打卡。
性價比高地道之選 鬆啲大排檔
圖：荃灣其中一間人氣大排檔風格小店，晚市時間特別熱鬧，唔少人同朋友嚟輕鬆聚餐。小店主打傳統港式小炒同煲仔飯，抵食又夠風味。小食涼拌魚皮分量多，爽脆兼調味啱啱好，非常開胃。主菜方面，蔥油雞嫩滑入味，椒鹽九肚魚外脆內嫩；咕嚕肉酸酸甜甜，炒得夠鑊氣都值得一試。最驚喜一定係豬油臘味煲仔飯，香噴噴帶飯焦，熱辣辣送飯一流。其他小菜例如黑松露蝦多士、沙薑雞腳、炸臭豆腐都做得唔錯，蛋白炒飯亦有水準。不過因為枱數有限，想去嘅朋友記預鬆啲時間。
文：Yanica
編：Cathy
